الموضوع: مشكله مريت بيها و حلها .. حتى يستفيد الجميع :)

و أخيراًُ يا رجاله ربنا كرمنى و عرفت حل المشكله الى كانت مغلبانى بقالى شهرين و خلتنى صرفت على العربيه أكثر من 3500 جنيه ..

المشكله بإختصار كانت إنى بشم رائحة عادم فىى صالون العربيه بعد سرعة 100 كم .. و على حس الموضوع ده روحت للتوكيل 3 مرات كشفوا على العربيه و قالولى طقم دبرياج كل مره و بدون أى نقاش .. مع العلم إن العربيه عامله 40000 كم فقط .. المهم غيرت طقم الدبرياج على أمل إن المشكله تتحل .. و لكن الرائحه إستمرت .. روحت مغير كل الفلاتر و الزيوت فى العربيه بالكامل و لم يتغير الوضع .. روحت مغير سير الكاتينه و المجموعه و بلية الكاتينه .. و لم يتغير برضه الحال!!!!!!!!!!

وصل بيا اليأس إنى فكرت فى علبة البيئه فى الشكمان (3000 جم سعرها جديد تقريباً) و لكن قبل ما أتهور و أعمل الموضوع ده .. قعدت مع نفسى فى تفكير هندسى عميق .. و الحمد لله ربنا كرمنى و عرفت المشكله منين .. بإختصار:

بعد سرعه معينه .. الهواء المزاح من العربيه بيكون قوى جداً .. بيمر من جانب العربيه يمين و شمال و من أسفلها و أول ما يخلص العربيه بيتقابل وراء الشنطه بقوة .. يقوم يقابل العادم الى خارج من الشكمان و يدفعه بقوه بإتجاه الشنطه .. العادم يتسرب من أى فتحات فى الشنطه (لو لم تكن محكمة الغلق) و يدخل الشنطه و منها للصالون !!!!!!!!!!!!!!!!! ..

و لأنى كنت عملت حادث و عربيه صدمتنى من الشنطه من تقريباً 8 أشهر .. و سمكرت الجزء الخلفى .. اليوم الى بعده مباشرة نزلت للعربيه فى النهار و قفلت الشنطه و نزلت الكنب الخلفى و بصيت جو الشنطه .. لقيت نور الشمس باين من جميع الأجزاء تقريباً !!!!!!!!!! و السمكرى لما إستعدلها ما ضبطش شفف الشنطه كويس .. و الشنطه لم تكن محكمة الغلق!!!!!!!!!

قمت بغلق كل الفتحات فى الشنطه .. و بنفسى فكيت الجلد من الشفف و إستعدلتها ف 4 ساعات تقريباً و ضبط كل حاجه .. و طلعت جريت بالعربيه .. و لم أشم أى شىء عى الإطلاق الحمد لله

أنا كلمت واحد ميكانيكى أعرفه و حكيتله على الى حصل .. قالى إن لو كنت عديت على الميكانيكيه الى فى مصر كلهم .. مكنش حد هييجى فى باله الموضوع ده :d :d :d

الحمد لله ... ربنا هو الى هدانى للحل ده .. بعد ما التوكيل و كل مراكز الصيانه فشلت فى حل المشكله .. و حبيت إنى أشارككم بيه .. العربيه كانت كويسه و طقم الدبرياج الى كان فيها كان يمشينى بتاع 50000 كم كمان .. بس الحمد لله قدر الله و ما شاء فعل

تصبحوا على خير .. النهارده بس هنام :]

الله يبارك فيكم يا جماعه .. شكراً على ردودكم و إهتمامكم .. و فعلاً التوكيل و المهندسين الى فيه معندهمش الصبر إنهم يفكروا بتسلسل المنطقى لحل المشكلات .. هو حافظ مش فاهم .. و مش بيحاول يتعب نفسه .. أسهل الطرق إنك تغير و تريح دماغك .. تخيلوا إن تكلفة تركيب الدبرياج الجديد فى التوكيل 2500 جنيه !!!!!!!!!
الحمد لله على كل شىء .. انا كان كل همى إنى أنقل تجربتى علشان لا قدر الله محدش يشوف الى أنا شفته .. و لو حد قابله مشكله زى ديه يلاقى حلها و مايغلبش الغلب الى أنا غلبته

و لأخى pro_samir .. جرب و إن شاء الله كله هيتضبط و مش هتشم أى روائح تانى بإذن الله
ربنا يحفظلنا عربياتنا جميعاً و يستر طريقنا أمين يارب العالمين