الموضوع: أسعار المستعمل في usa

المشاركة الأصلية كتبت بواسطة tito29

صباح الخير يا حضرات

أنا عندي شوية خبرة في حكاية الجمارك و التخليص و عارف الأجراءات و عملتها قبل كده و خلصت جمارك شوية حاجات و موتوسيكل من جمرك أسكندرية
الأجراءات مش معقدة للدرجة بس لازم يكون معاك مخلص جمركي كويس و علي فكرة أنا عندي واحد متخصص و متمكن جدا في جمرك الأسكندرية
و أستيراد الموتوسيكل مش محتاج أي موافقات و لا أذن أستيراد و لا بطاقة أستيرادية ما دام موتوسيكل واحد و للأستعمال الشخصي يعني لو حتفرج علي عدة موتوسيكلات يبقي لازم كل موتوسيكل يكون ورق الشحن بأسم واحد مختلف
المخلص الجمركي فقط بيحتاج صور البطاقة الشخصية وورق الشحن و شوية فلوس لزوم الأرضيات و الجمرك و الأكراميات و أتعابه
الأجراءات بتكون علي أساس موتوسيكل بصحبة راكب و للأستعمال الشخصي

المصاريف و الجمارك بتكون طبعا علي أساس البايك و سنة الصنع و برضه الفترة من وصول البايك و حتي أنهاء الجمارك و الحصول علي الأفراج النهائي
أتعاب المخلص بتكون بالأتفاق و علي أساس الوقت المستغرق في العملية و عموما بتكون في حدود ال500 جنيه لو بايك واحد و لو أكتر من بايك مش حاتفرق كتير علشان هي هي نفس الأجراءات
أقصد مثلا ممكن 5 بايكات يبقي أتعابه حوالي 800 جنيه ولا حاجة علي الخمسة بايكات
الجمرك بيتحدد علي أساس تقييم مأمور الجمرك للبايك و ده كله يكون بالشاي بالياسمين
بس برضه في حدود معقولة يعني مش حاتقييم بوليفارد 1800 بسعر 5000 ألاف مثلا

الفرق الكبير أللي التاجر بيكسب منه هو الشحن و سعر الشراء من الخارج
التاجر بيحشر كمية بايكس في الكونتينر حتي عين أمه و سعر شحن الكونتينر ثابت
الأرضيات و مصاريف التخليص و الأكراميات ثابتة للكونتينر
التاجر بيشتري بسعر أفضل من أي واحد فينا لأنه بيشتري من معرض في الخارج بالعشرين بايك و أكتر
أنا جربت الموضوع بتاع الأستيراد و أكتشفت أنك علشان توفر يبقي لازم كمية كبيرة تملئ بيها علي الأقل كونتينر 20متر مكعب
أما في حالة بايك واحد تمتلكه و بتاعك من الزيرو في الخارج يبقي تجيبه معاك أفضل و أرخص من أنك تبيعه بخسارة و تشتري غيره من مصر

خد بالك برضه من نقطة غاية في الأهمية:
معظم التجار أللي أنت شايفهم عندهم بايكات أستيراد بيكونو شارينها من المستورد في بورسعيد
المستوردين في هذا المجال مش كتير زي ما أنت فاكر يمكن 5 أو 6 تجار فقط لا غير
و تتأكد من ده أنك لما تطلب تشوف ورق البايك تكتشف أن صورة الأفراج الجمركي بأسم واحد تاني خالص غير صاحب المعرض أللي بتشتري منه و غالبا الواحد ده من تجار بورسعيد

هي دي الحقيقة في موضوع الأستيراد و كاملة
يارب أكون قد أفدتكم

كلام موزون ومنطقي وجميل...

أعتقد كونتينر 20 قدم يشيل بتاع 7 أو 8 بايكات...مش كتير أوي يعني. أنا شايف كل المنتدى عايز أهو :)

وتمام الشحن زي ما حضرتك قولت.

يبقى خلاصة الصعوبات هي شراء البايكس من الخارج وفحصها...ثم التخليص من مصر انك تلاقي حد كويس وأعتقد الشباب كلهم مش هيقصرو.

أعتقد دلوقتي التركيز يكون على الشراء والفحص.


1000 شكرا يا ريس على المشاركة الحلوة دي

انااااااا كمااان معاكو بس لازم كل الكلم دة يبقى فية جدية ف التعامل