الموضوع: هل بتراعي ربنا في نصايحك لاخواتك في المنتدي؟!!

يا جماعه المنتدي منتدي سيارات, و الغالبيه العظمي من المواضيع بتناقش مقارنات و مميزات و عيوب مختلف انواع السيارات...
و المناقشات اللي بتتم في المنتدي بيترتب عليها اخذ قرار الشراء من عدمه, و كأي عالم افتراضي في العالم بيكون في شك من المعلومه المكتوبه فيه لأن الرقابه عليها و علي جودتها ممكن تكون مش بالمستوي المطلوب....
و بعدين قرار الشراء ده قرار صعب, الناس مش لاقيه فلوسها في الشارع و الشخص اللي اخد كلام الناس في المنتدي هنا عن سياره ما ثقه و نزل اشتري علي هذا الاساس و بعدين يكتشف ان معظم الكلام ده اعجاب مبالغ فيه و وله و هيام بالعربيه اكيد هيدعي علي اللي عمله البحر طحينه, و مش بس كده و الناس اللي قرأت الكلام الغير صحيح ده و محاولتش تبين الواقع بعيوبه قبل مزاياه, و ساعتها لو حب يبيعها بعد الشراء هيخسر خساره محترمه و لو حاول يحتفظ بيها و يستعملها هتقابله العيوب او علي الاقل نقاط الضعف بتاعت العربيه دي و هيفضل قرفان منها و مستحمل علي مضض.....
طب بالذمه الكلام ده يصح ان احنا نعمله في ناس كتير بتشارك كل يوم في المنتدي علشان يعرفو مميزات و عيوب عربيات نفسهم يشتروها سواء مستعمل او زيرو او كسر زيرو و اكيد عايزين يستفادو من واقع خبره اللي سبقوهم بالشراء و التجربه, و دي ميزه ماكنتش موجوده قبل كده الا علي مقياس ضيق للغايه متمثل في شبكه المعارف و الاصدقاء و اللي بسهوله كلمه غلط او مبالغ فيها عن ميزه او عيب ما كانت بتبقي مصدق عليها خاصه انها كمعلومه بيتم تبادلها بين اتنين لا يتم اختبار مدي دقتها, و ده اللي المنتدي بيتيحه لأن الكلام عن ميزه او عيب ما بعربيه معينه كلنا ممكن نشارك فيه وده في النهايه بيخلي المعلومه اقرب ما تكون للحقيقه.....
بس تيجي طبيعه بشريه خالصه ان الناس اصحاب العربيه موضوع النقاش ميطيقوش كلمه سيئه عن عربياتهم, و تبدء المناوشات و تبادل الاتهامات ...........
و اللي بيضيع في الموضوع ده:
1- الراغب في الشراء
2- مصداقيه المنتدي و ثقه الناس فيه
3- الود و الاخوه بين الاعضاء

ارجو ان الناس تتفهم المسئوليه اللي بين ايديها و هيا بتمدح او بتذم في عربيه ما , لأن في ناس ممكن من ورا كلامهم ده يخسرو فلوس اشتغلو و تعبو عشان يجمعوها و مين عارف قرار شراء العربيه ده ممكن يكون مأثر علي حاجات تانيه في اسلوب حياتهم
و كمان ارجو من الناس انها تقدر ان كل عربيه لها مميزات و عيوب, ده غير ان سعر العربيه بدرجه معينه بيحدد مدي التوقعات لجودتها, و ياريت تبقي المناقشات دي بالذات بموضوعيه و حياديه تامه و اتمني اني مشوفش تاني حد بيسأل عن مقارنه بين عربيتين واحد يرد يقولو ماركه منهم كتابه و بس كده, طب ليه و اشمعنا و يشرح ليه اختياره ده بناء علي ايه لأن طعام زيد سم عبيد, و ممكن جدا نقطه اعجباك بعربيه ما تكون هي نفس نقطه عدم اعجابي بيها
و اتمني ان احزاب ماركات السيارات دي تختفي منها النزعه القبليه في التعصب و الغيره العمياء
انا النهارده معايا ماركه بكره اركب غيرها يبقي ليه الاستماته في ايهام الناس ان عربيتي من اروع ما انتج, و لو حتي مصر كلها نزلت تشتريها مش هكسب جنيه واحد من ورا الموضوع ده......
يبقي اضر اخواتي ليه؟؟
ارجو من الاعضاء انهم يراعو ربنا بجد و يحسو بالمسؤليه و هما بينصحو اي حد هنا في المنتدي لأنه منا و لينا و النهارده انا بجاوب عن مميزات و عيوب عربيتي و بكره اكيد هسئل حد عن مميزات و عيوب الماركه اللي بفكر اشتريها
ارجو ان الرساله تكون وصلت و الاعضاء ينتبهو ان في مواضيع كتير قوي خرجت عن موضوعها الاساسي و تحولت الي ساحات للقتال, و دي حاجه تؤسفنا كلنا و نتمني انها تختفي خالص قريب ان شاء الله

و اسف علي الاطاله