السلام عليكم
كنت متواجد بالصدفة في شارع عباس العقاد انا ومراتي
قلت اجرب مطعم ام حسن
مشمر ومحمر وطواجن
عامل اعلانات كتيرة بسمعها على نجوم اف ام
المكان من دخلته من الدور الارضي ما ترتحش نهائي وفيه شوية معدات تجهيز اكل بس مفيش حد شغال عليها
طلعت الدور الثاني الجو عموما عادي
لات تحسه مودرن وشيك ولا تحسه شعبه
حاطين شوية صور من الارياف علشان يديلك احساس بروح المكان لكن مهندس ديكور فاشل مع مرتبة الشرف
نيجي بقى للاكل
طبعا عند البرنس انت ممكن تشم ريحة الاكل من كيلو قبل المطلعم
ام حسن لا يوجد اي روائح
طقد الخدمات اللي عندهم كله شباب صغير وعديم الخبرة
قعدت انده على حد منهم ولا عبرو في ولما جال واحد قلتله انا قربت اقوم اجيب حد يشوف انا عايز ايه راح قالي ياباشا احنا سامعينك بس كنت مصر اني اجيلك بنفسي !!!! ما علينا
ابص على قائمة الاكل واتحسر مفيهاش اي حاجة من حاجات الرمرمة بتاعة البرنس
والاسعار نار - طاجن العكاوي 70ج + 12% خدمة
انا طلبت طاجن فريك باللحمة
ومراتي طلبت ربع سجق
الطاجن جالي ريحة الشياط فايحة منه واللحمة والله مطلعها سودة من كتر ما اتحرقت رجعته وطلبت حواوشي والحمد لله طلع شوية عدل بس والله حواوشي الامير بتاع سفير مصر الجديدة احسن واطعم منه وباقل من ربع الثمن
بالنسبة للسجق حاجة ملهاش اي معنى ولا اي طعم وعليه شوية فلفل اخضر وطماطم
وطلبت طبق مخلل قلت اضربه مع الاكل حسابه 4.5 ج لوحده
كان في راجل قاعد مع مراته في الطرابيزة اللي جنبنا اول لما دخل راح قالهم فين روائح الاكل وطشة الملوخية زي البرنس كده وبستفهم كلهم قبل مايطلب الاكل
وفي الاخر طلب طاجن فته ومراته تقريبا ورق عنب (الحساب بتاعهم كان 130ج محدش يسالني ليه؟)
طاجن الفتة راح واتبدل مرتين وفي الاخر عاملينة برز بسمتي الراجل بيسالهم ليه قالوله دي فته سوري مش مصري طبعا الراجل روقهم صراحة
حظي انا كنت قاعد جنب باب المطبخ كل شوية طلبات عمالة ترجع وناس من الاشراف داخلين طالعين وحاسس بحركة مش طبيعية
من الاخر تجربة سيئة جدا
انا دافع في ربع كيلو سجق (بتاع 5 صوابع سجق بطول صباع اليد) ومعاه حواوشي وطبق مخلل 50 ج
