شرح مشكلة جير (فتيس) الفانتازيا (التيبترونيك)

اقتباس:

---

السلام عليكم...
فى الفتره الاخيره ..بدأت الناس تخاف من الاوكتافيا ..خصوصا فى المستعمل ..وكله بيقول "فيها مشكله فتيس"
وكلامى بخصوص ال a5 و الفانتازيا ..لان هما نفس الفتيس...
وفى الموضوع ده هحاول اشرح المشكله و ازاى نتلاشى حدوثها ...ولو لا قدر الله حصلت نعمل ايه ؟؟


فى البدايه ..ايه هى المشكله ؟؟

المشكله بتحصل فى جزء معين من الفتيس اسمها البودى فالف ..او عقل الفتيس كما يسميها البعض ..
باختصار هى مجموعه صمامات او بلوف ..بيمر الزيت من خلالها ...(زيت الفتيس) ..


ايه المشكله الى بتحصل ؟


البلوف او الصمامات دى ..بتتسد ..تبدأ العربيه "ترزع" فى النقلات ..


طيب ايه الى بيسد البلوف ؟؟
نتيجه الاحتكاك الميكانيكى بين تروس الفتيس ..بينتج "رايش" من التروس و الاحتكاك ..الرايش ده بيمشى مع الزيت ...ومع كتر الرايش ..بيتراكم على الصمامات دى ..و يسدها ..وهنا تحصل الرزعه او الخبطه فى النقلات ..


طيب ايه ازاى نحافظ على الفتيس ؟؟
الموضوع سهل جدا و بسيط جدا جدا و بيتلخص فى كلمه صغيره ..وهى زيت الفتيس

زى ما قلت قبل كده ..الرايش ده بيمشى فى الزيت ..
يبقى عشان نحافظ على الفتيس ..هنغير زيت الفتيس كل 60 الف كم ..زى ما التوكيل قال ...
وللامان ..نغيره عند 50 الف كم ...
لكن بأى حال من الاحوال ..متعديش ال 60 الف بنفس الزيت
وتغييره فى التوكيل بحوالى 700 جنيه ...(غالى شويه لكن هيوفر عليك مبلغ خزعبلى هتشوفه دلوقت)


طيب ايه الفكره فى اننا نغير الزيت ؟؟
لما بننزل الزيت الى فيها ..بينزل بالرايش الى فيه ..وبكده بتكون فتحت صفحه جديده مع الفتيس :16:


طيب لا قدر الله لو حصل و المشكله دى ظهرت ايه الحل ؟؟
هيكون ادامك اختيارين ...
1-تشترى فتيس كامل استيراد سعره بيتراوح بين ..14 :17 الف ...انت و شطارتك ..لكن غالبا سعره مش هيتجاوز ال 15 ..
2-تشترى علبه بلوف جديده من التوكيل ..ب 11 الف ...ده غير التركيب وغيار الزيت ...

طيب ايه الافضل فيهم ؟
الافضل شراء فتيس كامل ...لان معروف عن الفتيس الاوتوماتيك انه لما بيتفك من بعضه ..مش بيرجع زى ما كان ..ومفيش احسن من "قفله الخواجه" ..فأنت لما تشترى فتيس استيراد ...مش هتفك فيه ولا اى حاجه ..هتركبه فى مكانه و تحط الزيت و تتوكل على الله ...

طيب اضمن منين الفتيس الاستيراد ؟؟
مركز نور الدين شريف ..المركز الوحيد المعتمد من ارتوك اوتو فى اسكندريه ..بيركب قطع غيار استيراد ..عليها ضمان 6 شهور ...وناس فاهمين ..
طبعا فى ناس كتير فاهمين ..لكن الميزه فى المركز ..انه ضمان 6 شهور على اى قطعه استيراد ..
طيب لو مش عاوز حاجه من المركز و هشتريه انا ...
1-الراعى الصالح فى الحرفيين
2-مجدى البيومى
3-ماجد البهى طنطا ..وليه فرع فى اسكندريه
4-الشيخ اسامه الديب طنطا ..سكه المحله

طيب دى كده الجزئيه الخاصه بواحد معاه العربيه و عاوز يحافظ عليها ..او معاه و باظت و عاوز يصلحها ..
الى بيشترى مستعمل بقى ..ياخد باله ازاى ؟؟

عند شراء سياره مستعمله ..
1-يا اما تشترى عربيه عدادها لم يتجاوز ال 60 الف كم ..بحيث ميكونش ميعاد تغيير الزيت جه و صاحبها اهمل ..
2-تشترى عربيه عدادها اكتر من 60 الف كم ..لكن معاها فاتوره تغيير الزيت فى التوكيل او اى مركز معتمد ...
3-تكون شاريها من حد ثقه ..ويكون فعلا غير زيت الفتيس ..المهم تكون تثق فى كلامه ...


طيب اختبر ازاى فتيس العربيه و اعرف انه سليم ؟؟
اختبار الفتيس بيتلخص فى ..ارهاق الفتيس..
اتعبه معاك ..
دوووووووووووووووووووووووو س و شيل رجلك فجاه ..
ودوس تانى ..كيك داون ..وهكذا و على سرعات مختلفه ,,بحيث ان الفتيس يفضل فى مرحله تغيير نقلات باستمرار ومتنساش تجرب تمشى على المانيوال موود ..لو فى مشكله فى البودى فالف هتلاقى الفتيس بدأ يعمل "دبه" و هو بينقل ...

المعلومات المذكوره فى الموضوع ..من اجتهادى الشخصى وتجارب شخصيه واقعيه ..ودردشه مع مهندسين فى التوكيل ..ومراكز خدمه ..وبعض الخبراء ومعلومات من المنتدى هنا ...والموضوع بأكمله يحتمل الصواب و الخطأ ..

يا رب يكون الموضوع مفيد ويعجبكو ..:b4_611:

---

الموضوع دا من مشاركة الاستاذ خالد ايمن ويرجي التثبيت للاهميه

فتيس ب 15الف ياخبر داحنا فى نعمه وربنا يدومها علينا....*

اقتباس:

---

المشاركة الأصلية كتبت بواسطة sakr1964

فتيس ب 15الف ياخبر داحنا فى نعمه وربنا يدومها علينا....*

---

يا باشا فتيس بـ 15 الف بسبب الاهمال
ولو حضرتك ركبت العربيه دي وفتيسها في وضع العادي عامل زي اللعب الاطفال فكرين الدركسيون والدوسات بتاعت البلايستشين الي كان بيتلعب بيها لعبة دريفر عامل زي الفتيس دا تلمسه لقدام ينقل السرعه التاليه تنزله لتحت ينقل السرعه الاقل

بصراحة إنت معلم وتشكر على المعلومات القيمة دي

طيب يا باشا ممكن نضيف مقترح رابع عند شراء أوكتافيا مستعملة لو الواحد عايز يبعد عن وجع الدماغ تماما: يشتريها مانيوال.. إيه رأيك؟

اقتباس:

---

المشاركة الأصلية كتبت بواسطة ashrafatef

بصراحة إنت معلم وتشكر على المعلومات القيمة دي

---

واللهي يا باشا المفروض الكلام دا يتقال للاستاذ خالد ايمن هو صاحب الموضوع الاصلي وانا عملته اقتباس تاني عشا التثبيت

اقتباس:

---

المشاركة الأصلية كتبت بواسطة ashrafatef

طيب يا باشا ممكن نضيف مقترح رابع عند شراء أوكتافيا مستعملة لو الواحد عايز يبعد عن وجع الدماغ تماما: يشتريها مانيوال.. إيه رأيك؟

---

بص يا باشا عشان تبعد دماغك عن الوش دا تروح تشتري a4 مفيهاش مشاكل في الفتيس نهائي
وبعدين حضرتك ممكن تشتري a5 وتجربها زي ما موضحين في المشاركه

اقتباس:

---

المشاركة الأصلية كتبت بواسطة AhMeD MeTwAlY

واللهي يا باشا المفروض الكلام دا يتقال للاستاذ خالد ايمن هو صاحب الموضوع الاصلي وانا عملته اقتباس تاني عشا التثبيت

بص يا باشا عشان تبعد دماغك عن الوش دا تروح تشتري a4 مفيهاش مشاكل في الفتيس نهائي
وبعدين حضرتك ممكن تشتري a5 وتجربها زي ما موضحين في المشاركه

---

شكر وتقدير للأستاذ / خالد أيمن

الـ a4 هتكون عاملة كيلومترات كتير + أقل فخامة + ضيقة من الخلف
طيب ممكن أعرف ليه حضرتك مستبعد خيار a5/فانتازيا مانيوال؟

اقتباس:

---

a4 مفيهاش مشاكل في الفتيس نهائي

---

مين قال ؟

اقتباس:

---

المشاركة الأصلية كتبت بواسطة amrelsaqqa

مين قال ؟

---

هي a4 فيها نفس الجير بوكس

لا مش نفس الجيربوكس ، وفي منها ستب ترونيك بس مش عارف هو هو ولا لا (ما اعتقدش ) المهم ان هى نفس القصة لااااااااازم تغير الزيت كل 60 الف

والله كويس أنك حضرتك طلعت الموضوع ده تاني فعلا استاذ خالد هو ألي كان عمله من فتره وياريت يثبت لأن بيهم ناس كتيره

شرح ولا اروع
تسلم علي التوضيح ..

اقتباس:

---

المشاركة الأصلية كتبت بواسطة amrelsaqqa

لا مش نفس الجيربوكس ، وفي منها ستب ترونيك بس مش عارف هو هو ولا لا (ما اعتقدش ) المهم ان هى نفس القصة لااااااااازم تغير الزيت كل 60 الف

---

اكيد هو الاوتوماتيك كدا اساسا

اقتباس:

---

المشاركة الأصلية كتبت بواسطة hisham80

والله كويس أنك حضرتك طلعت الموضوع ده تاني فعلا استاذ خالد هو ألي كان عمله من فتره وياريت يثبت لأن بيهم ناس كتيره

---

انا لقيت في ناس كتيره معاها فانتازيا بدأت علي صيانة 60 الف كيلو قولت اعمله تاني

اقتباس:

---

المشاركة الأصلية كتبت بواسطة ahmed1006

شرح ولا اروع
تسلم علي التوضيح ..

---

ربنا يبارك في الاستاذ ايمن وان شاء الله نشوف ليه مشاركات افضل وافضل

شكرا جزيلا للمعلومات القيمه .
بس انا قريبي كان معاه العربيه دي وكانوا بيقولوا ان الزيت بتاع ال Steptronic مش بيتغير الا لما يحصل منه مشاكل
Sealed For Life يعني

اقتباس:

---

المشاركة الأصلية كتبت بواسطة madiahmed

شكرا جزيلا للمعلومات القيمه .
بس انا قريبي كان معاه العربيه دي وكانوا بيقولوا ان الزيت بتاع ال steptronic مش بيتغير الا لما يحصل منه مشاكل
sealed for life يعني

---

لا يا فندم الزيت لازم يتغير

الف شكر على الشرح والمعلومة دى

المشكلة ان صيانة الـ 60 الف فى التوكيل بتكلف اكتر من 2200 جنيه فالناس مش بتعملها فى التوكيل
ومش عارفة ان هى مهمه اوى كده

اقتباس:

---

المشاركة الأصلية كتبت بواسطة zacklat

الف شكر على الشرح والمعلومة دى

المشكلة ان صيانة الـ 60 الف فى التوكيل بتكلف اكتر من 2200 جنيه فالناس مش بتعملها فى التوكيل
ومش عارفة ان هى مهمه اوى كده

---

ممكن حضرتك تعملها في مركز من المراكز المحترمه
والحجات الي بتتغير دي بتكون حسب الاستخدام

شكرا علي الشرح بس ال a4 فيها نفس المشاكل بالظبط ولازم تغير الزيت لانها كانت معايا بس الفتيس بتاعها ب 5500 تقريبا

اقتباس:

---

المشاركة الأصلية كتبت بواسطة rompo10

شكرا علي الشرح بس ال a4 فيها نفس المشاكل بالظبط ولازم تغير الزيت لانها كانت معايا بس الفتيس بتاعها ب 5500 تقريبا

---

حضرتك اكدت المعلومه بردو ان دا ينطبق علي a4
شكرا يا باشا علي الاضافه الجميله
والله الموفق

أي فتيس لازم يتغيرله الزيت كل 60 الف
سواء بقى مانيول أوتو سيمي أوتو عفريت أزرق
مفيش حاجة في الدنيا إسمها زيت مدى الحياة ولما بيقولوا هما كده في بعض العربيات عشان مفيش عربيه بتقعد كتير معاهم العربيه الي فات عليه 5 سنين تبقى قديمة 10 سنين بتتكهن
ويمكن خطر عدم تغير الفتيس المانيوال أقل بكتير من الفتيس الأوتو لإن الزيت في الأوتو بيعمل هيدرولك مش تزيت بس على عكس الفتيس المانيوال تزييت بس
وزيت الباور لازم يتغير برده كل 60 الف

اقتباس:

---

المشاركة الأصلية كتبت بواسطة yoko

أي فتيس لازم يتغيرله الزيت كل 60 الف
سواء بقى مانيول أوتو سيمي أوتو عفريت أزرق
مفيش حاجة في الدنيا إسمها زيت مدى الحياة ولما بيقولوا هما كده في بعض العربيات عشان مفيش عربيه بتقعد كتير معاهم العربيه الي فات عليه 5 سنين تبقى قديمة 10 سنين بتتكهن
ويمكن خطر عدم تغير الفتيس المانيوال أقل بكتير من الفتيس الأوتو لإن الزيت في الأوتو بيعمل هيدرولك مش تزيت بس على عكس الفتيس المانيوال تزييت بس
وزيت الباور لازم يتغير برده كل 60 الف

---

شكرا يا باشا علي المعلومات الاضافيه
ونتمني المزيد من التقدم
والله الموفق

معلومات جيدة جدا تسلم الايادى

سلام عليكم ورحمة الله وبركاته

ممكن سؤال؟ إن شاء الله ناويين نشتري فانتازيا هايلاين 2013 بإذن الله .. وكنت عايزة أسأل هل المشكلة دي برده موجودة في الفتيس بتاعها؟

شكرًا جزيلا .. وكل عام وأنتم بخيـر

اقتباس:

---

المشاركة الأصلية كتبت بواسطة la_luz

سلام عليكم ورحمة الله وبركاته

ممكن سؤال؟ إن شاء الله ناويين نشتري فانتازيا هايلاين 2013 بإذن الله .. وكنت عايزة أسأل هل المشكلة دي برده موجودة في الفتيس بتاعها؟

شكرًا جزيلا .. وكل عام وأنتم بخيـر

---

وعليكم السلام ورحمة الله وبركاته
حضرتك مدام الفتيس ستيبترونيك لازم تغير زيت كل 60 الف كيلو
وبعدين دي مش مشكله لان حضرتك بتاخد في المقابل راحه وتقدر تستمع بالقيادة الي تريحك اذا كان مانيوال او اوتوماتيك

اقتباس:

---

المشاركة الأصلية كتبت بواسطة AhMeD MeTwAlY

وعليكم السلام ورحمة الله وبركاته
حضرتك مدام الفتيس ستيبترونيك لازم تغير زيت كل 60 الف كيلو
وبعدين دي مش مشكله لان حضرتك بتاخد في المقابل راحه وتقدر تستمع بالقيادة الي تريحك اذا كان مانيوال او اوتوماتيك

---

تمام .. ألف شكر يافندم
ولو ممكن حضرتك كمان تقدر تفيدني عندي كام سؤال كنت حاطتهم في الموضوع ده http://www.nilemotors.net/Nile/301366-2013.html
.. وشكرا جزيلا لحضرتك

حصلتلي في a5 2005واشتريت بودي فالف 10000ج.م وركبته عند محمد أصلان، الزيت كان متغير بس بعد 60000كم، وحصلتلي في البيجو 406 واشتريت بلفين ب 3000ج.م........ هتقولي هو انت غاوي تفور فتيسات؟؟؟؟؟
أقولك لأ بس الواحد مايتعلمش ببلاش، والزيت يكون الأصلي مش أبو 40ج.م ومعظم الأوروبي كده حتى الميجان.
اللي بيحصل كمان إن الفيتيس بيكون فيه مغناطيس قوي في الحلة عشان يلم الرايش ده، بس كإجراء وقائي بعد ما السعت مرتين لازم الزيت يتغير كل 55000كم كحد أقصى.

أنا رحت التوكيل (مركز كارتك العبور) من اسبوعين علشان اعمل الصيانه 50,000 لفانتازيا 2010 و قولتلهم غيروا زيت الفتيس الراجل قالى بدرى و مش بدرى قولتله غيره احتياطى و علشان نكون فى الأمان و الحمد لله غيرت الزيت عند ال 50,000 بدل ال 60 و تكلفه التغير غاليه شويه بس ارحم من حد يشيل تمن فتيس ...... والاسعار كالاتى تمن الزيت نفسو 5 كيلو تقريبا ب 780 جنيه و فلتر زيت الفتيس ب 340 جنيه و المصنعيه مش فاكر كام بالظبط

السلام عليكم
الله يكرمك على الموضوع ده

بس عند مشكلة مع فانتازيا 2010 انها
بتشب لما تطلع والسرعة مبتعلاش الا لما بتسقط غيار
لازم المكنة صوطها بيعلا معايا

مشكور ياباشا علي الموضوع

اقتباس:

---

المشاركة الأصلية كتبت بواسطة ahmed metwaly

والله يا باشا المفروض الكلام دا يتقال للاستاذ خالد ايمن هو صاحب الموضوع الاصلي وانا عملته اقتباس تاني عشا التثبيت

بص يا باشا عشان تبعد دماغك عن الوش دا تروح تشتري a4 مفيهاش مشاكل في الفتيس نهائي
وبعدين حضرتك ممكن تشتري a5 وتجربها زي ما موضحين في المشاركه

---

السلام عليكم
تصحيح
لفظ الجلالة يكتب هكذا عند الحلف (( و الله )) و ليس كما كتب فى البوست
و لأنه لفظ الجلالة فرأيت ضرورة التصحيح ، و لا أزكى شئ على الله سبحانه و تعالى

ملحوظة :
لقد قمت بتصحيح الخطأ عند اقتباس البوست