-
موسم الصيف مع الفيرنا
صباح الخير على جميع الاعضاء
دلوقتي جه الصيف بمشاكله وبالحر بتاعه الشديد
انا معايا فيرنا 2009 عاملة 40000 كم
لما بطلع على طريق في وقت فيه شمس وليكن بعد الساعة 11 الصبح وسحبت بالعربية بسرعة فوق ال 130 كم ومشغل التكيف بلاقي عداد الحرارة بيسخن وبيبعد عن النص
اضطر اوقف العربية وبعد ما افتح الكبوت بلاقي في غليان لكن المية لسة متسربتش لأني بلحق العداد قبل ما يسخن على الاخر
مجرد ما استني بس عشر دقايق واغير المية الامور بتتظبط ولكن بعد فترة وليكن ساعة ونص مثلا ممكن الاقي الحكاية بتتكرر تاني
طبعا بضطر اني مزودش السرعة واقلل التكيف على اد ما اقدر حتى لو اضطريت افصله
المشكلة ان الواحد بعد الثورة بيقلق من السفر بالليل وبضطر اسافر بالنهار خصوصا في الطرق اللي مفهاش شبكة محمول زي طريق الكريمات وطريق الصعيد البحر الاحمر
انا عارف ان سخونة الاسفلت الشديدة مع حرارة الجو مع التكيف مع السرعة يبقى كتر الف خير الرداتير بتاع العربية لأنه في اي ظروف تانية عمره ما بيعمل كدة لو وسط البلد او مسافر في الشتا او حتى بعيد شوية عن شهور الصيف
رحت لواحد بتاع رداتير ورحت التوكيل مرتين وبرضو نفس القصة
انا كنت عايز اتأكد اذا كانت دي مشكلة عامة في الفيرنا يبقى خلاص متعبش نفسي وادور على حل واحاول اظبط الامور دي واعمل حسابي
وان كانت عندي انا بس ياترى ايه حلها
تحياتي للجميع
شكرا
-
غالبا عندك مشكلة في دورة التبريد
اكشف عليها كويس
-
عندك مشكلة
لان دى مش طبيعة الفيرنا
الفيرنا بتستحمل الى ابعد الحدود
-
باشا حضرتك عملت غسيل لدورة التبريد بتاعت الصيف !!!!
حاول تعمل غسيل لان الفتره الي فاتت كانت كلها مطر وطين وتراب وحجات كتيره
-
ابن بلدي انت بتستخدم ميه حنفيه ولا ميه خضرا؟؟؟؟؟
-
تصدقوا انا محبط !!
انا رحت للتوكيل مرتين ولواحد بتاع رداتير مرة ورحت لكل الناس مش فاضل غير اني اودي العربية لكنتاكي يكشف على دورة التبريد !
وان شاء الله هروح التوكيل تاني لأن مشكلة الحرارة مؤرقة لأنها بتزيد في اي لحظة والواحد ممكن يغفل دقايق عن عداد الحرارة يلاقي الوضع كارثي !
شكرا للجميع على الاهتمام
-
لا مية خضرا من موبيل والله
-
مشكلتك في طرمبة المياه محتاجة تكشف عليها والافضل تغيرها بدون سؤال
-
طرمبة المياه... او ترموستات الكوع
Content Relevant URLs by
vBSEO 3.6.0 PL2