الموضوع: استفسار عن عومان العربيه بعد ال 100

المازدا بتعوم جامد بعد ال100 خصوصا لو فيه اى فوارق فى الاسفلت حته عاليه وحته واطيه وساعات عين القط بتعومها !!! خصوصا من ورا
الكاوتش جديد على فكره ونضيف ومش مركب علايات والعربيه واطيه اصلا
هل المساعدين هى السبب ولا المقصات اللى ورا ؟
وهل السوست لها تاثير برضه؟
بانتظار ردودكم ياجدعان

مشكلتى اتحلت تماما والحمد لله وده اللى عملته للافاده

المشاركة الأصلية كتبت بواسطة mazagngi2010

ازيكم يارجاله
الموضوع المره دى كبير شويه علشان عملت شغل فى العفشه محترم لان اخر شغل عملته فيها من حوالى 8 شهور (كنت مركب مساعدين استيراد)
المهم
العربيه كانت بعد ال80 بتتمرجح من ورا ولو جيبت 100 بقرا الشهادتين مفيش اى ثبات خالص لدرجه ان عين القطه كانت بتطوح العربيه يمين وشمال
رحت لقشطه (ده ميكانيكى مازدا)

بالنظر -كانو غرقانين زيت- ادانى الصدمه الاولى جوز مساعدين وبلاش استيراد هات جوز صينى جديد ب 350 شغال زى الاكس او kyb ب 700
والمقصات اللى ورا عندى كانت ضايعه وجلبها بايظه كلها (بمشى فى حتت مكسره كتير)
غيرت المقصات من عنده (تايوانى جديده) جوز المقصات لكل فرده ب 150 ولما سالت عندنا فى الزقازيق كانو ب 130 :( بس كنت ركبتهم للاسف
ادى اول 300 جنيه للمقصات
وقلت افكر فى موضوع المساعدين ده براحتى
---------------
قلبت فى المنتدى لاقيت الناس مبتشكرش فى ال kyb وان فيه منه مضروب كتير وبيشكروا فى ال توكيكو ايه رايك ياقشطه فى التوكيكو قاللى هات ال kyb احسن !!!
نزلت على الزقازيق لاقيت ال kyb تايلندى ب 650 والتوكيكو ب730 نهائى يابانى محفور عليه
جيبت التوكيكو ده وعلى العفشجى ايه رايك فيه ياعم قاللى مساعد حاتى ابن كلب
شاف السوست قاللى ارتفاع العربيه عامل معاك ايه لان السوست طريه شويه
قلت له بتحك لو حد ركب معايا وواطيه المهم الله يكرمك انا عايز العربيه تبقى راسخه على الارض ومكلبشه فيها ومش مهم النعومه والراحه
قاللى عينيا هجيبلك سوست ناشفه وركبت جوز سوست بتوع فيات 124 بعد ماقص منهم حلقه
وركب جلد عامله زى الاوكرديون وجلبه كده معرفش ليه فى المساعد ودق دقتين على المقصات الجديده :( علشان العجل كان مضموم شويه وكان فيه علايات قديمه صغيره شالها وقاللى ركب 10 ورا وملكش دعوه الاحلى ان العربيه شكلها لسه واطى زى ماهو مش عليت كتير
سوست +جلب +قص السوست+مصنعيه عفشجى 160 جنيه :(
طلعت ظبطت زوايا عند شيبوب ب 25
واخبط المشوار المتين للقاهره تانى
باختصار مفيش كلام يتقال جيبت 160 ولا الهوا الكتكوته بتقول دوس كمان بس كشيت
وكنت متعمد اروح على مطبات الهوا والفوارق اللى فى الاسفلت على الدايرى بسم الله ماشاء الله ثابته جدا لايمين ولاشمال وعملت كام حركه غشيمه فى 4 ملفات ولا الهوا
فعلا السوست دى لها دور فظيع بس الراحه قلت شويه ومدلوقتى مش حامل هم الثبات خالص
بس عندى صوت تخبيط اهبل كده فى الناحيه اليمين هبقى اشوف بتاع ايه واقولكم
للعلم الجنط عندى 14 مش 13


من الاخر هى منظومه كامله لازم تكون كلها تمام علشان تحس بالثبات ده
ربنا يستر بقى وميجيبش زيت