انا محتار يا جماعه و عايز اراءكم و خبراتكم و معلوماتكم عن المدارس الخاصه

انا ابني في اول اكتوبر ان شاء الله هيكون 4 سنين و كام يوم مش مكمل شهر

المدارس المتاحه كالأتي

1- مدارس تجريبيه لغات (الحكوميه )

دي لا يمكن يقدر يدخلها لان تنسيقها بيعدي 5 سنين يعني مش هيدخلها لا السنه دي و لا السنه اللي بعدها
لكن ممكن يدخل السنه الجايه في مدارس تكون في القري البعيده شويه علي امل اني انقل له بعد سنه او اتنين في مدرسه تجريبيه قريبه مني

2- مدارس خاصه (عربي) داخل المحله

الكويس منها في المحله برضه تنسيقه بيكون اكبر من اربع سنين بشهور ناس بتقولي ممكن بواسطه و كده يدخل لكن انا اصلا بأستحرم موضوع الواسطه و بحس اني بأخد حق حد
المدارس الخاصه اللي ممكن يقبل فيها داخل المحله من غير واسطه مش كويسه و ملهاش سمعه كويسه

3- مدارس خاصه (عربي ) خارج المحله في طنطا او المنصوره

دي ممكن يقبل في مدارس معقوله فيها (مش كويسه أوي برضه)
لكن انا قلقان من المواصلات كل يوم مسافه ساعه و نص الصبح و زيهم اخر اليوم في الاتوبيس لطفل 4 سنوات

4- مدارس خاصه (لغات) خارج المحله في طنطا او المنصوره

الفرص ممكن تكون اقل شويه بس انا قلقان من المسافه و كمان قلقان من اللغات و المتابعه في البيت و كده
خصوصا اني باشوف من زمايلي اللي بيقول لو رجعت الايام مكنتش هدخل ابني لغات و فعلا ناس من زمايلي الطفل الاول في لغات و التاني عربي



ده الموقف اللي انا فيه تنصحوني بايه و لو حد يعرف مدارس كويسه او له خبره في الموضوع ده و يكون من المحله او طنطا او المنصوره يدلني
وجزاكم الله خير