شكوى وتحذير ضد البنك العربى الافريقى
السلام عليكم
أولا : الموضوع ده مش هيكون مفيد غير للناس اللى تهتم أنها تأخد حقتها ومتفرطش فيه لأنه نوعا ما موضوع طويل لأنى كاتب كل التفاصيل .
انا فى يوم الخميس الموافق 14-6-2012 قررت انى هعمل انترنت فيزا كارد لانى بشترى حاجات من مصر وكانت لازمانى الوقت ده جدا
قبلها كنت عامل سيرش على كذا بنك وفى الاخر استقريت على بنكين هما
البنك العربى الافريقى
Arab African International Bank-the best bank in Egypt-Home Page
كريدي أجريكول
www.ca-egypt.com/index-ar.html
الاولانى مصاريفه لفتح الكارد 20 جنيه فى السنه والرصيد اقل حاجه 100 جنيه . قلت تمام
والتانى كريدي أجريكول مصاريفه 60 جنيه اعتقد ال 3 سنين .. والرصيد اعتقد برضه100 اقل حاجه
الفرق الوحيد ان فى كريدي أجريكول ممكن تعمل ايداع من بعض الماكينات عكس البنك العربى لازم تروح البنك ودى مكانتش مشكله ليا لانى هعمل ايداع مبلغ واسحب منه براحتى ف اتوكلت على الله وعملت البنك العربى الافريقى
وقبل ما اروح البنك فرع مصر الجديده امام الميرلاند كانت مكالمتى كالتالى :
انا : لو سمحتوا الكارت بيطلع فى قد ايه وقت ؟
البنك : فى يومها
انا : المصاريف والمطلوب وكمان بيشتغل بعدها ب قد ايه ؟
البنك : 20 ج وصوره بطاقه ومبلغ 100 على ف الرصيد .. وبيتعمله اكتيفشن فى نفس اليوم بليل ويبقى جاهز للشراء
اتوكلت على الله بعد المكالمه بالظبط كانت الساعه 12 ظهرا ورحت البنك وفعلا مليت الابليكشن وعملت كل حاجه وحطيت مبلغ من المال مش قليل لانى كنت عاوز اشترى حاجات كتير والموظفه هناك كانت برضه بتقولى الشروط ان اقل حاجه 100 جنيه ومينفعش أسحب
الفلوس لأى سبب غير قبل 35 يوم من عمل الحساب قلتلها مش هحتاج أسحبهم لانى هشترى كذا حاجه من النت
تمام واستلمت الفيزا وروحت البيت بعد ما قالولى اتصل 8 بليل اكلمهم عشان اعمل الاكتيفيشن للكارت
وفعلا اتصلت بيهم وعملت اكتيفشن الساعه 8 وكله تم تمام جدا
دخلت اشترى من المواقع اللى انا بشترى منها كانت مواقع بتعمل خصومات على حاجات فى مصر
ده اول واحد
استمتع بأحلى العروض والتخفيضات مع الموقع رقم واحد للتخفيضات في القاهرة | دير'ان'ديل
المهم اجرب اشترى ميرضاش .. كلمت الموقع بتاعهم وقتلتهم هو انتوا مش بتدعموا كارت فيزا فو يو ؟ قالولى لا عادى .. قلتلهم اصلى عملت كارت ومش شغال قالولى ارجع للبنك لانهم مش عارف السبب ..
كلمت البنك قلتلهم الكارت مش شغال مع الموقع اللى بشترى منه مع انى قبل كده اشتريت من نفس الموقع بكارت ابن خالتى اللى هوه نفس النوع وهوه فيزا فور يو .. قالولى من الواضح ان الموقع اللى انا بشترى منه فيه مشكله .. قلتلهم فيه مشكله ازاى انا اشتريت منه
بنفس نوع الكارت بتاع ابن خالتى .. قالولى بس احنا منعرفش المشكله بالظبط بس واضح انه مش بيدعم نوع الكروت ده ..قلتلهم هو انتوا حافظين مش فاهم .. انا شارى بنفس النوع قبل كده .. قالولى طب هنقول للتيكنيكال سببورت ونرد عليك و بعدها محدش رد عليا
انا قلت يمكن يكون فيه مشكله قائمه فعلا .. وجربت اشترى من موقع تانى برضه بتاع خصومات والموقع مكتوب فيه انه بيتعامل مع البنك العربى الافريقى وموضح كده تحت على الشمال
Offerna.com
وبعدها اشتريت اللى عاوزه ودفعت بالفيزا عادى و دست شراء طلعلى برضه ان فيه مشكله وكتبلى
Authentication failed
رحت كلمت خدمه العملاء بتوع موقع أوفرنا .. قالولى احنا مش عارفين المشكله فين بالظبط حضرتك كلم البنك عشان واضح ان الفيزا فيها حاجه
كلمت البنك تانى وكان نفس الرد الأولانى واضح ان الموقع ده مش بيدعم نوع الكروت بتاعنا !! قلتلهم ازاى يعنى يا جدعان ده تانى موقع اجرب اشترى منه وانا المفروض عامل فيزا اون لاين تشترى من أى حاجه ..
قالولى السبب مش واضح بس فى مشكله فى الموقع اللى بتشترى منه .
قلت فى نفسى طيب .. انا بقى هجرب كذا موقع وبعدها لينا كلام تانى وقفلت معاه
جربت بقى
Les Meilleurs Deals à Strasbourg - LivingSocial
ونفس الحوار اللى فات
قلت بقى المره دى انا هجرب مواقع مينفعش يبقى فيها نسبه خطأ غير نادرا
رحت داخل على فودافون مصر وببساطه شديده جدا دخلت قلت بعت لنفسى رصيد اون لاين ودخلت رقم الفيزا
https://www.vodafone.com.eg/vodafone...ymentMain_Page
وبعد ما دخلت كل البيانات دست شراء
طلعلى sorry the transaction failed from the bank
ومن اللحظه دى بدأت اتجنن بجد .. جربت كذا مره منفعش
رحت داخل على Te Data
التجديد بالفيزا
ADSL للبيت - خدمة تجديد الإشتراك
مرضيش برضه
وبدأت اتجنن على خدمه العملاء بتوع البنك العربى الافريقى
كلمتهم المره دى كان يوم 19-6-2012 قالولى نفس الكلام بتاع كل مره قلت لخدمه العملاء الكلام ده مش هياكل معايه وادونى ال مدير بتاعك .
كلمت المدير .. وبدأت بقى اتعصب قالتلى انا هقولك الصراحه .. قلتلها قولى .. قالتلى فيه مشكله فى نظام الفيزا دوليا !!
قلتلها نعم !!!!
قالتلى فيه مشكله ف Visa international system
قلتلها يعنى ايه ؟ وانا ازاى اجى اعمل كارت وفيه مشكله أساسا
قالتلى الموظفين فى البنك مكانوش يعرفوا !!
قلتلها انا مالى .. ازاى يعنى الكلام ده .. ده استهتار .. ازاى تخلونى اعمل الكارت وفيه مشكله عندكوا أساسا من غير ماتقولولى من الأول قبل ما اعمل الكارت ..
قالتلى متأسفين بس فعلا موظفين البنك مكانوش عارفين !
قلتلها دى مش مشكلتى وده استهتار منكوا جدا وانا مش هسكت وانا عاوز حقى وعاوز أرجع فلوسى وانا مش هعدى الموضوع بالساهل وهكتب عليكوا فى كل حته على النت وهشتكيكوا
قالتلى : هوه سياسه البنك ان مينفعش تسحب فلوسك قبل 35 يوم ومش هينفع نغير سياسه البنك
قلتلها : الكلام ده لو النظام شغال عندكوا صح من ا لأول
قالتلى معلش احنا اسفين اوى ومش عارف ايه وهنحاول نحل المشكله ..
قلتلها وانا مش هسكت على حقى .
المهم يوم 20-6-2012
فتحت النت وأول حاجه عملت بحث عن الشكاوى وكده وجه اللينك ده قدامى ف نايل موتورز
http://www.nilemotors.net/Nile/3872686926-post1.html
لقيت فيه ارقام الشكاوى وحمايه المستهلك
كلمت شكاوى البنوك على 16777
ده البنك المركزى
كلمنى اول واحد وقلتله كذا كذا حولنى على واحده تانيه شرحتلها حولتنى على المدير
مدير عام قطاع الرقابات والاشراف
شرحلته المشكله بالتفصيل الممل وبصراحه ده كان أول شخص اتكلم معاه واحس انى استريحت من كلامه معايه وقالى ده حقك و انى مش غلطان فى انى اشتكى
وقالى اكتب شكوى فعلا وبعدين قالى انه هيكلم البنك بنفسه وفعلا انا مشوفتش معامله محترمه اكتر من كده والراجل بجد عداه العيب وادانى رقمه الشخصى كمان واخد رقمى
بعد 3 دقايق بالظبط اتصل بيا وقالى انه فعلا اشتكالهم
ودقيقتين بالظبط لقيت مديره الفروع فى الفرع الرئيسى بتتصل بيا وقالتى احنا اولا اسفين وكده وياريت تشرحلى بالظبط مشكله حضرتك
شرحتلها كل حاجه وقلتلها برضه على خدمه العملاء اللى كل ما أقولهم حاجه يقولولى نفس الكلام اللى حافظينه وقالتلى طبعا اكيد معاك حق تضايق بس جرب تشترى تانى كده
جربت اشتريت .. وبرضه نفس الحوار !
قلتلها أهو !
قالتلى طيب انا هقفل واكلمك تانى
وفعلا قفلت و5 دقايق كلمتنى
قالتلى : احنا فعلا اسفين بس فعلا مشكله الفيزا انها مش شغاله دوليا دى حاجه حصلت طارئه
قلتلها الكلام ده مش صحيح لأن فى كروت شغاله
قالت اه حصلت فى بعض الكروت .
قلتلها طيب انا المفروض كان يتقالى كده فى البنك من الأول ..
قالتلى : الموظفين فى البنك معرفوش كده غير بعدها ب شويه
قلتلها ده استهتار من البنك يا فندم ودى مش حاجه كويسه !
قالتلى معلش اسفين برضه .. وهيه هتتابع معايه وتكلمنى النهارده الموافق 21-6
وانا هستنى تليفونها عموما
اه وبالمناسبه انا النهارده الموافق 21-6-2012 قلت اكلم خدمه العملاء عادى بعدين قلتلهم انا كنت عامل شكوى
قالتلى هوه الرد لسه مجاش بس هتتحل على الأحد ان شاء الله يا فندم
قلتلها شكرا انا هرجع بقى للناس اللى هشتيكيلها
وده كان الموضوع كله
وعشان أكون صريح دلوقتى أكتر انا الموضوع بقى بالنسبالى مش فارق أوى ماليا لكنه فارق معنويا وطز فى الفلوس انا مكلم خدمه العملاء بتاعتهم من موبايلى الشخصى اكتر من نصف ساعه فى مره واحده وفى غيرها كذا مره برضه كل مكالمه حوالى 10 دقايق
اسف للاطاله