ألف مبروك المحور فتح .. غُمة وانزاحت :)

امبارح رحت الشغل عادي من طريق الدائري الطويل، والمحور منيل على عينه زي كل يوم ..
اتأخرنا في الشغل أكتر من المعتاد .. ومع تعب اليوم والأسبوع الواحد كان في قمة القرف واستعد لمشوار الساعة ونصف قرف من اكتوبر للمهندسين .. وإذا بأحد الزملاء يبشرنا "المحور فتح النهاردة" .. بصراحة مصدقتش !! معقولة؟ ده معاده آخر الشهر ..
المهم المحور فتح فعلا والتعديلات خلصت والمشوار من أول المحور للمهندسين 10 دقايق الواحد والله نسي كل التعب بتاع اليوم والأسبوع، وكنت فرحان جداً ومبتسم طول الطريق .. وحسيت إحساس غريب .. إن مصر حلوة جداً النهاردة !! تتصوروا؟!
كل ده عشان طريق واحد اتحلت عقدته وبقى سالك ..

المهم قلت أباركلكم وازفلكم البشرى السعيدة دي

رغم ان عمري ما طلعت علي المحور و معرفش شكله ايه حتي....لكني انبسط جدا بالخبر ده:)

يارب يكون فلا معمول بنضافة و الناس تقدر ده و تمشي مظبوط...

ألف مبروك لمستخدمي المحور:)

ألف ألف مبروك لكل المصريين والعابرين المحور بالأخص.
المهم أنه ميظهرش شغل تاني سواء في المحور أو في ميدان لبنان ، وعقبال كوبري 6 أكتوبر يا رب

اقتباس:

---

المشاركة الأصلية كتبت بواسطة NaderNabil

رغم ان عمري ما طلعت علي المحور و معرفش شكله ايه حتي....لكني انبسط جدا بالخبر ده:)

يارب يكون فلا معمول بنضافة و الناس تقدر ده و تمشي مظبوط...

ألف مبروك لمستخدمي المحور:)

---

آخر نضافة، معمول فيه شغل كويس جدا والطريق مريح مافبهوش الفواصل اللي تقطم الوسط زي زمان, كمان لما كانوا شغالين كنا بنشوف طبقات الأسفلت ووهما بيحطوها، بصراحة كانوا بيحطوا أسفلت بضمير بدل اللحسة اللي بيسفلتوا بيها شوارع البلد :)

بخصوص الناس بقى أنا معاك في الدعا لأن الناس كانت بتعمل حوادث فظيعة وهو الطريق واقف !! ربنا يستر

أهم حاجة لسلامة المحور .. بعد ما عانيت منه الأمرين خلال عام ونصف .. وفي الآخر فتح بعد ما التيرم التاني خلص ..
أولاً الالتزام بالحارة المرورية ..
ثانيا : الالتزام بسرعة معقولة مش هانقول 80 لكن مش أكتر من 120
ثالثاً وده أهم حاجة على الإطلاق المنع التام لسير النقل والأوتوبيسات الكبرى ، فحمولتها الشديدة هي السبب الرئيس في تكسير الطريق .
وربنا يسهل

تقبلوا خالص مودتي

انا كنت فعلا هناك امبارح اول ما اتفتح ومكنتش مصدق وبقيت برقص طول الطريق لاكتوبر .....شعور غريب اوي ...ان الواحد يرتاح ويبقى واخد حقه في البلد

الف مبروك لمستخدمى المحور والحمد لله ان هو اتصلح

والله والواحد حاسس ان فيه امل يعنى حاجه فى البلد بتخلص قبل معيادها

فعلا البلد ببتحرك

حاجه غريبه لما بقينا نسمع عن حاجه اتعملت وخلصت والناس بقت فرحانه

تم الحذف لمخافة القواعد

ب- كما يلتزم المنتدى بعدم توجيه اية اهانات او سخرية-سواء كان ذلك فيما يخص السيارات او فيما لا يختص بها-، لأفراد موجودين فى السلطة فى الوقت الحالى، سواء تم تعريفهم بالإسم او التلميح المباشر ،كما يلتزم المنتدى بعدم ترويج ..................الخ
ستعامــل هــذه المشاركـــات بالحــذف

مشرف القســــــــــــم العــــــــــــام

تم الحذف لمخافة القواعد

ب- كما يلتزم المنتدى بعدم توجيه اية اهانات او سخرية-سواء كان ذلك فيما يخص السيارات او فيما لا يختص بها-، لأفراد موجودين فى السلطة فى الوقت الحالى، سواء تم تعريفهم بالإسم او التلميح المباشر ،كما يلتزم المنتدى بعدم ترويج ..................الخ
ستعامــل هــذه المشاركـــات بالحــذف

مشرف القســــــــــــم العــــــــــــام

الحمدلله غمّه و انزاااااااااااااااااااااا اااااااااحت
انا مشواري محور كل يوم و بكره الدائري بسبب العربيات النقل و قرفها
و كنت بفضل قاعد في اكتوبر لغاية لما المحور يهدى على باليل و اقدر امشي فيه براحتي, بس الحمدلله
بس لاحظت انهم عملوا حاره مخصوصه عشان الاتوبيسات الي هيعملوها لاكتوبر,
بس الرصيف الي في النص متشال و لاحظت حاجه غريبه جدا,
انهم كانوا بيرصفوا مكانه و عملوا ما بين الاتجاهين طريق في النص!!!!
انا مش عارف هيعملوا فيها ايه بس عامله زي ما تكون طريق خدمات

اقتباس:

---

المشاركة الأصلية كتبت بواسطة د.أحمد سمير

أهم حاجة لسلامة المحور .. بعد ما عانيت منه الأمرين خلال عام ونصف .. وفي الآخر فتح بعد ما التيرم التاني خلص ..
أولاً الالتزام بالحارة المرورية ..
ثانيا : الالتزام بسرعة معقولة مش هانقول 80 لكن مش أكتر من 120
ثالثاً وده أهم حاجة على الإطلاق المنع التام لسير النقل والأوتوبيسات الكبرى ، فحمولتها الشديدة هي السبب الرئيس في تكسير الطريق .
وربنا يسهل

تقبلوا خالص مودتي

---

أنا كنت سمعت في العاشرة مساء إن المحور هيبقى مراقب بكاميرات و رادارات ثابته و دوريات طريق على طول علشان يقضوا على السرعة الجنونية ، و ده جامد جدا لو طبق

اقتباس:

---

المشاركة الأصلية كتبت بواسطة mosso

بس لاحظت انهم عملوا حاره مخصوصه عشان الاتوبيسات الي هيعملوها لاكتوبر,
بس الرصيف الي في النص متشال و لاحظت حاجه غريبه جدا,
انهم كانوا بيرصفوا مكانه و عملوا ما بين الاتجاهين طريق في النص!!!!
انا مش عارف هيعملوا فيها ايه بس عامله زي ما تكون طريق خدمات

---

تقريبا هتبقى للخدمات ، بس لازم يكون عندنا ثقافة عدم الاعتداء على طريق الخدمات ، بس إحنا للأسف لو الواحد شاف متر فاضي بيحط بوز عربيته فيه ، و أنا شخصيا أعاهدكم أمام الله ألا أستخدم أي طريق للخدمات أبدا و ياريت كلنا نعمل كده .

انا من كتر منا فرحان نزلت خته من أوله لأخره كدة من غير ما يكون عندي مشوار !
بس اصل متتخيلوش يا جماعة انا كنت متبهدل قد ايه بسبب التحويلة اللي كانت بتجبرني امشي الدائري كله وسط التريلات و كأني وسط الغابات .. و طريق طويل و مبهدل

و اللي فاجأني اكتر .. انه معمول بنضافة !! انا كنت متوقع الناحية دي تكون اتعملت اي كلام عشان اتعملت بسرعة بس ما شاء الله .. عملوها الوحوش

و بصراحة لو هيبقي متراقب بالكاميرات (يعني الناس هتحترم نفسها) دي تبقي حاجة خيال فعلا

ياااااااااااااااااااااااا ااااااااااه .. غمة و انزاحت فعلا
مبروك لكل رواد اكتوبر

ايه ده
يا نهار ابيض
انا مشاركتي اتحذفت


عموما انا كنت باعبر عن رأيي

الحمد لله لله يا رب

أنا كنت كرهت نفسي وشغلي وبلدي وعيلتي وقربت أنتحر

إنت متعرفوش يعني تمشي في المحور حارة واحدة وبعد كده تمشي طريق مصر إسكندرية حارة واحدة مرتين في اليوم

عموماً أشكر بشدة شركة المقاولون العرب على هذا المجهود الجبار (رغم أنها الشركة الأصلية المنفذة) لكن الإستعجال في المرة الأولى مكانش غلطتها

بجد المقاولون العرب أثبتت بهذا الطريق اننا لدينا شركات محترمة تستطيع تنفيذ طرق محترمة إذا ما أعطيناها الوقت والمال

على فكرة في 3 مشاريع تانية لا تقل أهمية عن المحور وهي:-

1- محور المريوطية : وده من أفضل المشاريع الي هتتعمل الفترة الجاية في البلد لأنه هيربط القوس الغربي للدائري (السلام-المرج-نزلة قليوب-الوراق-شبرا الخيمة -الهرم) مع القوس الشرق (المطار-القاهرة -الجديدة المعادي-المنيب - المريوطية - المنصورية.

2- إكتمال الطريق الدائري

3- محور صفط اللبن من عند الجامعة لغاية الطريق الدائري ويعديه لغايه ما يوصل لطريق مصر إسكندرية الصحراوي

4- تحسين طريق مصر إسماعيلية الصحراوي.

بجد أنا بحب البلد دي لما بألاقي فيها أنجازات وبتخليني أنكسف على نفسي وأقول أشمعنى دول أحسن من لسه البلد بخير

استاذ صابر دياب اعتقد ان شركة النصر العامه للمقاولات (حسن علاّم) هي المنفذه الاصليه للمحور بالشراكه مع شركه اجنبيه لكن المقاولين هما الي رمموه قبل كده
والله اعلم