الماتور بيترعش

**yahia** · 19-06-2007 07:42 PM

معايا 131 مو81 ماتورها بيرعش علي طول -سواء واقف أو ماشي-و صوتة عالي,أنا عارف طبعا أن العربيه قديمة
بس مفييش حل عشان الصووت دا بيخليني أهرش ف وداني :lol:

**vooooo** · 19-06-2007 08:10 PM

لو الموتور بيرعش و تحس ان العربيه هتبطل منك
و لو انت ماشى بيها و مابتسحبش و تحس انها بتنط منك
يبقى اكشف على البوجيهات

**hazem_khidr** · 19-06-2007 08:47 PM

اتاكد الاول من ان اسلاك البوجيهات كويسه علشان دا بيخلي العربيه بلغه السوق(تّتلت) و لو مش كده راجع الميكانيكي لا قدر الله ممكن يكون في شنبر باي و الزيت بينطر علي بوجيه .لو دا سليم يبقي الكرابيراتير مش مضبوط تخلي الميكانيكي يبط الهوا و الصوت بتاعها .

**Abdallah** · 19-06-2007 09:19 PM

اتفق مع كلام الاخ حازم وفى احتمال اخر ان يكون عندك قاعدة موتور مقطوعة او بايظة وتكون هيا سبب الرجرجة دة, ممكن تكشف على قواعد الموتور عند عفشجى او ميكانيكى ولو فى حاجة منهم بايظة غيرها.

**memo_hefnawy** · 19-06-2007 11:39 PM

كل الأسباب إللى ذكروها الأخوة الكرام صح 100 %

شوف إنت الصبح راجع على مستوى الزييت و لزوجته (يعنى سليم مش مطحن لقدر الله ولا حاجة)
إتأكد إن أسلاك البوجيهات راكبة سليمة
لسه بترعش إكشف على الوجيهات و شوف الميكانيكى هايقول إبه

و بعدين إستهلاك البنزين عامل إيه؟ بتاكل بزيادة ولا طبيعى ؟

و الكهرباء عالية ولا واطية ؟

**yahia** · 20-06-2007 07:28 PM

شكرا يا جماعة بس المشكلة مش فالبوجيهات و لا الأسلاك بتاعتها والبنزيين طبيعي و الماتور لسة طالع من عمرة
بس العربية فبها زنة كأنك ماشي بالرابع علي خمسيين. هو أنا بلاحظ أن الصوت دا بيقل لما الميكانيكي بيظبط الكاربراتير
بس لما بيقل العربية ما بتسحبش -واضح أن المشكلة ف وداني أنا أروح لدوكتور أحسن-

**ahmed1981** · 21-06-2007 01:55 AM

لو الصوت كإنك ماشي في الرابع على خمسين
الصوت ده إسمه تصفيق أو بكلام الميكانيكية إسمه تسقيف
العلاج:
1- إتأكد من ضبط الكهربا
2- إتأكد من ضبط هواء الكربراتير
3- إتأكد من التقسيمة بتاع الكتينة مضبوطة ولا لأ معرفش هي عربيتك على سير ولا جنزير
4- هذا السبب والذي أتمنى أن لا يكون هو السبب إن في العمرة يكونوا قشطولك وش السلندر ولم يضعوا جوان وش السلندر المناسب بعد القشط المفروض لو قشط من غير فرايز يحط جوان دبل المهم الحتة دي تعرفها لو العربية حرارتها بتعلى عن الطبيعي بعد العمرة
5- ممكن تكون عربيتك كانت محطوط لها قبل العمرة جوانيين لوش السلندر وبعد العمرة حط واحد وده نفس المعنى في السبب السابق

لكن إن شاء الله مش هتكون حاجة وحشة