عربيه خبطتني وفضلت عشرين يوم في السرير
وانا نازل من بيتي لا ليا ولا عليا وفي اول فيصل قولت انزل من العربيه اشتري حاجه من الصف التاني
وانا بعدي الشارع اتفاجأت بعربيه سيراتو بتاخد غرزه وطااااااااااااخ دخلت في ركبتي الشمال طرت لفوق حوالى مترين ونرلت على الارض مش داري بالدنيا
شويه شويه ابتديت افوق والاقي صوت عالي وشتايم واصوات ضرب ابص الاقي الناس متجمعه حوالين اللي خبطوني وهاتك يا ضرب
الناس اللي حواليا حاولوا يساعدوني اني اقوم بس للأسف حسيت بالم شديد جدا مقدرتش اقوم نقلوني بسرعه على المستشفي والدكتور قلي حصلك تهتك حاد في اربطة الركبة الشمال وهتاخد علاج اسبوعين وان محصلش تحسن هتعمل عملية توصيل اربطه
طبعا فضلت في السرير الاسبوعين دول والحمد لله استجبت للعلاج بس هاخد علاج طبيعي لفتره كبيره عبال ما اقدر امشي كويس زي الاول
سؤالي:
هنعمل ايه مع ولا التيت دول اللي مبيهمهمش ارواح الناس وكل واحد فيهم فاكر نفسه في سباق
انا زنبي ايه دلوقتي اني افضل اعرج واتألم فتره كبيره جدا علشان شاب سيس
انا غلطت لما مسمعتش كلام اصحابي وعملتلهم محضر بس ساعتهه قلت ثواب بدل ما حد يإذيهم
اخيرا بحمد الله ان الموضوع جيه على كده والموضوع مكنش اكبر
