الموضوع: تحذير لكل من معه Samsung Galaxy Note و حدث لأخر تحديث Ice Creaem Sandwitch

السلام عليكم

إخوانى الكرام .. سامسونج مؤخراً أصبحت تصدر أجهزه بلا وقت كافى لدراستها جيداً .. و بالتالى أصبح نتيجة لذلك مشاكل كثيره تحدث للأجهزه .. مثل Galaxy S3 الذى إنتشرت صوره له منفجراً مؤخراً على الأنترنت.

انا لسه شارى جالاكسى نوت من يومين .. و حبيت أغير النظام لنظام أخر .. و بمجرد ما دخلت الريكفرى مود و عملت فورمات للنظام .. الجهاز توقف عن العمل .. و بعد بحث لمدة 4 أيام و قراءه على الأنترنت ليل نهار .. إكتشفت أن جالاكسى نوت به عيب تصنيعى مع كيرنل نسخة الأيسكريم الجديد .. و لو فكرت إنك تعمل اى فورمات للجهاز و أنت منزل الأيسكريم .. الكيرنل الرسمى من سامسونج يعمل على إتلاف ال eMMC الداخليه للجهاز .. وتكوين باد سيكتور فى فى الذاكره الداخليه .. الحل الوحيد لأصلاحه تغيير اللوحه الأم .. و سعرها يتعدى ال 1800 جنيه.. حسبى الله و نعم الوكيل .. كان معايا قبل هذا الجهاز .. htc Sensation و قبله أكثر من جهاز أندرويد و كنت بفرمت و أنزل مليون نظام فى اليوم بدون مشكله... حسبى الله و نعم الوكيل. طبعاً المطورين فى XDA Developers مبهدلين الدنيا و بعتوا ل سامسونج لغاية ما ساسمونج إعترفت بالمشكله .. و إحنا فى إنتظار تحديث منهم .. بس بالتاكيد مش هيصلح الجهاز التالف .. لكن هيحمى الأجهزه الحاليه.

يا جماعه .. تحذير تحذير تحذير .. محدش يفرمت النظام و هو منزل نسخة أيسكريم من أى كيرنل أيسكريم حالى .. إلا بعض الكيرنلات الموثوق منها فقط .. و نصيحه لو حابب تنزل روم جديده .. نزل كيرنل GB الأول .. فرمت منه الى إنت عاوزه و بعد كده نزل الى إنت عاوزه

و ده الموضوع الى الناس بتتكلم فيه عن المشكله الأن من هنـــــــــــــا

يا جماعه خدوا بالكم و أحذروا .. و ربنا يسترها علينا .. و حسبى الله و نعم الوكيل فى سامسونج

[OVERLINE]
-----------------------
اضافة بواسطة صاحب الموضوع تم تعديلها بواسطة الادارة
----------------
[/OVERLINE]معلش يا جماعه أنا كتبت الموضوع و إختفيت .. كان بقالى أكثر من 4 أيام بلا نوم تقريباً .. حتى إستطعت بفضل الله إنى أشغل الجهاز .. طبعاً مرجعش زى الأول إطلاقاً .. و أصبح حجم الأنترنال ميمورى تقريباً 1200 ميجا .. و الجهاز مش ثابت الأداء و بيهنج بداعى و من غير .. لكن على الأقل إشتغل ...

أنا حابب بس أنى أوضح كام نقطه للأهميه القصوى علشان محدش يحصله الى حصلى :

1- أى كيرنل أيسكريم للجالكسى نوت فى الفتره الحاليه غير أمن على الإطلاق .. و إنت و حظك .. نخيل إنك حتى لو عملت Reset Factory Settings من على روم أيسكريم نفسه الرسميه .. ممكن تبوظ جهازك (حصلت لناس كثير بره و جهازهم حصله Brick)

2 - طبيعة المشكله كالأتى .. مطورين سامسونج الجهله .. طوروا أمر الفورمات فى كيرنل الأيسكريم عن ال GB فى نوت .. التطوير الى تم بلا وقت كافى للتجربه أدى الى تدمير ال eMMC للجهاز .. السبب فى كده إن فى GB كان أمر الفورمات بيفرمت البارتيشن الأول .. ثم يعيد إنشائه مره أخرى .. لكن الى عملوه فى كيرنل الأيسكريم إنهم خلوا أمر الفورمات يلغى البارتيشن فى الأول و بعدين يعيد إنشائه ثم يفرمته .. هذه العمليه هى الى بتدمر ميمورى الجهاز

3 - للدخول أكثر فى تفاصيل المشكله .. أى جهاز أندرويد بيكون مكون من 12 بارتيشن .. كل واحد له مساحه معينه و بيأخذ جزء معين من النظام .. على سبيل المثال .. هناك بارتيشن إسمه FACTORYFS ده مساحته تقريباً 900 ميجا و بيكون مخصص للنظام .. و هناك بارتيشن أخر إسمه DATAFS و ده مخصص لملفات الداتا الى بيتعامل فيها النظام و مساحته 2 جيجا تقريباً .. زى بالضبط فولدر WINDOWS و Program Files فى الويندوز .. على الترتيب

أى حد بيجى ينزل نظام جديد أو يمسح ملفات نظام قديم ( Reset Factory Settings ) علشان النظام الجديد ينزل على نظافه .. لازم بيفرمت البارتيشنين دول .. سواء من الريكفرى مود أو من داخل النظام .. المصيبه و الداهيه الكبيره إنك لما بتعمل كده من كيرنل أيسكريم .. بتخرب البارتشنين دول .. و بتفقد تقريباً 3 جيجا من مساحة الجهاز بالكامل .. و بيتملوا باد سيكتورز

الحل فى هذه الحاله .. إنك تدخل على الجهاز باليونكس بأوامر adb و (الشيل) و تعيد توزيع البارتيشنات للجهاز و تبتعد عن الأماكن المضرورة (الى فيها باد سيكتورز) .. طبعاً هذه العمليه معقده جداً و أجهدتنى للغايه حتى إستطعت أن أبتعد عن هذه الأجزاء الفاسده .. و برضه معرفتش أبعد عنهم 100% لأنهم إستشروا فى الجهاز

المشكله الأخرى الى إكتشفتها .. أن من الريكفرى معظم الناس بتفرمت أكثر من بارتيشن أخر علشان ينظف الجهاز من ملفات النظام القديم بالكامل .. منها مثلاً البارتيشن الى بتشوفه لما تركب جهازك ك USB و ده مساحته 10 جيجا تقريباً و إسمه UMS .. و من سوء حظى أنى لما لقيت الجهاز مش راضى يقبل أى روم .. فرمت هذا البارتيشن أيضاً و بالتالى أصبح عندى تقريباً 13 جيجا فيهم باد سيكتورز (الى إكتشفته إن مش انا بس الى وقعت فى المطب ده .. ألاف على الإنترنت وقعوا فى نفس المطب و فقدوا جزء كبير من الذاكره الداخليه)

ديه صورة لتقسيمة البارتيشنز من أحد المحاولات الى كنت بحاول فيها الأبتعاد عن الأماكن المضروره:


مش عايز أدخل فى تفاصيل أكثر .. بس لو حد حصل لجهازه brick يكلمنى و انا إن شاء الله ربنا يقدرنى و أساعده و أهم حاجه يبطل يعمل فورمات فوراً .. علشان مايزودش الطين بله

الملاحظه الأخيره .. من رأيى أن أى كيرنل موجود فى رومات الأيسكريم للنوت خطر جداً جداً .. و بلاش تتعامل معاه على الإطلاق أو تغيره أو تحاول تشوف واحد أحسن من التانى .. إبعد عن الشر و غنيله ..

.................................................. .................................................. ....................
لكل من يريد تنزيل روم أيسكريم على النوت .. نصيحتى ليه حاجه من إثنين:

1 - لو عايز تنزل نسخه رسميه من سامسونج (زى نسخة الأمارات مثلاً) إستخدم برنامج إودين و نزلها من خلاله بدون ما تعمل أى عملية فورمات على الإطلاق .. تعامل مع كل المميزات الى بتقدمهالك .. بس إبتعد عن أى حاجه ليها علاقه بفورمات النظام أو الداتا أو الكاش .. أى فورمات من أى نوع

2 - لو حابب تنزل روم متعدله و عايز تفرمت النظام قبله .. مفيش مشكله طالما هتتبع الخطوات ديه .. فلاش الأول أى كيرنل أمن ل GB و أدخل بيه الريكفرى .. فرمت الى عايزه .. و بعد كده نزل أى أيسكريم روم إنت تحبها .. بس لازم تكون فاكر كويس جداً متعملش أى أمر فورمات من خلال روم الأيسكريم .. معجبتكش الروم و عايز تغيرها .. طبعاً هتحتاج تفرمت النظام .. مفيش مشكله .. فلاش مره تانيه من الأودين أى كيرنل GB و من خلاله إدخل الريكفرى مود .. فرمت .. نزل النظام الجديد .. مبروك

من الأخر .. إستخدم أى كيرنل GB علشان تعمل أى عملية فورمات

.................................................. .................................................. ....................


طبعاً تعليقى على الموضوع إن سامسونج فعلاً أحبطتنى منها جداً جداً جداً .. غلطه زى ديه عيب قوى قوى على شركه بحجمها .. ماينفعش أبداً إن مصيبه زى ديه تكون موجوده فى جهاز ليها بثمن يتعدى ال 600$ ..

لأن فكرة الأندرويد أصلاً قائمه على المطورين و إنه نظام مفتوح للكل علشان الناس تعدل فيه زى ما تحب .. و شركات كثيره جداً بتعمل أجهزة أندرويد اعطتك هذه الأمكانيه و عمر ما كان أى أمر فورمات ممكن يأثر على الجهاز .. و مستحيل كانت تخطر على بال أى شخص .. أنا كان معايا أكثر من 5 أجهزه أندرويد قبل ده .. و كنت هاريهم رومات ليل نهار و فورمات صبح ليل .. محدش قل بأصله أبداً .. إنما مشكلة Bug eMMC ديه بجد سقطه كبيره لسامسونج .. و حتى معملوش اوفر إنهم يغيروها على حسابهم لأنها هتفتح باب مصايب عليهم

ملاحظه .. من كلام المطورين .. سامسونج فى التحديث الجاى للأيسكريم هتكون - المفروض - صلحت العيب ده فى الكيرنل و رجعت أمر الفورمات يبقى زى كرنلات ال GB بس حتى هذا الحين .. إحترس جداً جداً جداً .. و لغاية ما يطلع كلام رسمى منهم إن الوضع أمن .. تعامل مع كل الكيرنلات على أنها سم قاتل

توضيح أخير .. أحد مطورين سامسونج كان قال فى مشاركه ليه فى منتدى المطورين .. ان المشكله حصلت فى تعريف ال eMMC نفسه فقط .. و محصلش ضرر فى الشيب نفسها و العيب فى ال Driver حصله كربشن و بالتالى الجهاز ما بقاش بيقرأ الأنترنال ميمورى صح .. و حله إن يعاد تفليش التعريف .. لكن ده مش هينفع يعمله مستخدمين عاديين و لازم الجهاز يتفتح و يتوصل ب JTAG و يتم تفليش التعريف بعمليه معقده جداً لازم تتم فى مراكز صيانة ساسمونج .. و الله اعلم

أخر حاجه .. انا عرفت إنه بيتصلح فى الهند و بيتغيرله المذربورد ب 120 دولار .. انا غالباً هبعته هناك مع أى صديق ليا مسافر هناك معايا من الشغل .. هنا فى مصر تكلفة تغيير المذربورد قرابة ال 1800 جنيه .. و مش مضمون

أنا عارف إنى طولت .. بس لكم أن تتخيلوا إنى تقريباً مكنتش بنام و كنت مخنوق جداً بس الحمد لله قدر الله و ما شاء فعل .. و الواحد مش بيتعلم بالساهل برضه

لو حد حابب يستفسر عن أى حاجه .. انا هكون سعيد أنى أخدمه و ربنا يحفظلكم أجهزتكم كلها أمين يارب العالمين.

م. محمد الشافعى