يا شباب انا شوفت العربيه النهارده و فتحتها و قعدت فيها و بصيت عليها كويس احب اقولكم ان العربيه دى هتعمل شغل عالى اوى ... العربيه شكلها جميل من جميع الزوايا و التقفيل بتاعها جيد جدا و ممكن تحس بيه عن طريق قفله الابواب من اقل لمسه الباب بيقفل و كمان ارتفاع العربيه جميل و وسعها الداخلى ممتاز بجد انا مكنتش مصدق ان العربيه الصغيره من بره هتبقى واسعه من جوا بالشكل ده ... بالنسبه بقى للخامات الداخليه اى نعم فى بلاستيك كتير بس نوعيه البلاستيك نفسها كويسه جدا و مش بالسوء اللى الناس بتكلم عليه هنا بالعكس انا شايف انها عمليه جدا و هتبقى مريحه فى التنظيف الداخلى لابعد الحدود و مش هتلاقى بقع سوداء فى الفرش مكان دراعك العرقان و دى مشكله بعانى منها فى عربيتى و كل فتره لازم تروح تنظيف كيماوى و مصاريف على الفاضى :) بالنسبه للعيوب انا اتفق مع التقارير من حيث الاوكر يفضل تكون نيكل من جوه و يتركب دراع فى السقف للاربع ابواب و كمان لفت انتباهى ان مرايات العربيه مش مرنه بمعنى انها لو اتتخبطت هتتكسر فورا و مفيش اى ليونه منها فى الحركه للاتجاه المعاكس ........... بصراحه العربيه دى عربيه مدينه رقم واحد و لو اداء الموتور بتاعها مع الفتيس مرضى هتحقق نجاح باهر الفتره اللى جايه
ملحوظه بس صغيره انا مستغرب من الجدال الحادث حول عدد احصنه الماتور و فرق ال 9 حصنه دول احب اقولكم ان شواعنا الحبيبه اللى بتتحرك بمعدل متر فى الساعه كفايه عليها اوى حصان واحد و متحسوسنيش انكم مقضينها خميس و جمعه فى الناسكار , تحياتى
المفضلات