السلام عليكم :
ارجو الافاده انا عندي مشكله ومش لاقي ليها حل خالص انا معايا هوندا سيفيك 1991 وحابب اني احكي القصه من الاول ومعلش لو كنت هطول عليكم بس معلش استحمولوني لاني خلاص بدأت اقفل من العربية خالص
انا جبت العربية وطبعا لفيت كتيير علي ما لاقيت واحده اساسيات نظيفه بس منظر من بره مش تمام قلت مش مهم وبدأت اظبطها واحده واحده وقلت انا هخلي حاله العربية ده بحاله 2012 وفعلا بدأت سمكرة ودوكو وعفشه
كله جديد المهم جابت جوان وعملته وبقت تمام وقلت ضماني الوحيد انيي اركب ترموستات الكوعه علشان اطمن الجوان معمول تمام وده من وجهة نظري المهم الدنيا مشيت تمام لغاية ما دخلنا في الصيف وبدأت المشاكل
العربية بتسخن مع التكييفوبعد ما تقف كتيييييييييير في الزحمة وتيجي تتطلع بكيكاية تقيله شوية المهم رحت للميكانيكي قاللي الكوعتين الالومنيا مملحين وكمان في خرطوم صغير جنب خرطوم السخن شكله هيتقطع محتاجين نغير دول
عملت ده كله ولسه برده بتسخن مع التكييف قاللي شيل ترموستات الكوعه وشيلتها وبرده لسه بتسخن اللي انا فعلا محتاجه منكم هل في حاجه معملتهاش مع اني غيرت الاتي
طلمبه المياه وجايبها اصلي - ماسوره المياه اللي ورا الماتور-الخراطيم بتاعه المياه وكمان الكوعات الالومنيا كلها ومتاخد منها هواء وكمان مفيش نفخ في الردياتيير ولا في مياه بتنقص من القربه ولا كمان في غليان للمياه
كل اللي بيحصل انها بتسخن مع التكييف لما بقف كتيير واطلع بكيكايه حتي لو بسيطه مع العلم كمان اني رحت لواحد كويس بتاع تكيفات خليته فضي الفريون والزيت وحط تاني لما شكيت انه ممكن يكون محمل علي الموتور وكمان المراوح زي الفل
انا بجد محتاج اعرف منكم ايه هي المشكله لاني خلاص مش قادر.

شادي