الموضوع: اسعار التوكيل النهارده خلتني اخاف اقرب من اي شارع فيه توكيل؟؟

طبعا بما اني شاري العربيه بقالي فتره لا تتعدي الشهر وكان من الاول خالص كنت مقرر اني اول اما اجيب العربيه اروح التوكيل عشان اقف علي حالتها وابقي عارف كل صغيره وبما اني كنت فاضي النهارده فقلت اروح التوكيل عشان اعمل تشيك علي كل صغيره وكبيره في العربيه واشوف لو حاجه عاوزه تتغير وكده فالمهم اني رحت علي المحمل موتورز اللي بين قليوب وشبرا وحصل كالاتي:-

اول حاجه لقيت المهندس جالي وراح فتح الكابوت وبص بصه كده عالعربيه وسالني العداد عامل كام قلتله 44 الف وشويه قالي اوكي وعملي قايمه كده بالحاجات اللي هتتغير في صيانة الاربعين الالف وكانت كالاتي
الفحص والمصنعيه وتربيط العفشه 300

سير باور 104

سير تكييف 158

فلتر هواء 135

بوجيهات 68

زيت فتيس مانيوال وقالي انا بنصحك بشيل ومن هنا حاولت استجمع قوايا بعد الاسعار اللي قالها اللي جابتلي هبوط وقلتله لا زيت الفتيس انا هغيره بنفسي وهغير لفالفولين لاني شيل سمعته مش كويسه قالي عامة احنا هنا في التوكيل مش بنستخدم زيت شيل احنا بنستخدم توتال قلتله لا لا خلاص سيبلي انا اغير الفتيس بنفسي وكان ليسه هيفتح بردو تغيير زيت موتور كامان قلتله لا لا صاحبها كان ليسه مغيره فقالي اوكي هندخل العربيه ولو فيه حاجه اضافيه هقولك المهم طلعت الاستراحه وقلبي علي كتفي وخايف ليطلعلي مصيبه في العربيه ولا حاجه المهم وانا فوق في الاستراحه لقيته طلعلي وقالي الحاجات دي ممكن نغيرها لانها هتحتاج تغيير فيما بعد بس هي تمام فقلتله وريني القايمه واول ما مسكتها سميت وكانت الصدمه في الاسعار وكانت الحاجات اللي محتاجه تتغير بعد مده كالاتي:-

عدد 2 مقص امامي 2 * 560

وعدد 2 كاوتش مساعد خلفي 2 * 190

عدد 2 باره 2 *200

والمصنعيات كانت الاتي:-

عدد 2 مقص 140

عدد 2 كاوتش مساعد خلفي 140

عدد 2 باره + ظبط زوايا 120

وبصتله بعد الاسعار دي ولقيت في وشه براءة السنين والابتسامه العريضه علي شفتيه

فقلتله لا لا انا مش هغير الحاجات دي دلوقتي قالي اوكي هما مش محتاجين تغيير دلوقتي بس بعرف حضرتك بالحاجات اللي هتتغير فيما بعد قلتله طيب

المهم العربيه خلصت وجالي التقرير بحالة العربيه والحمد لله كان تمام واني العربيه قرائاتها كلها علي الكمبيوتر مظبوطه واما جتلي بقي فاتورة قطع الغيار لقيته ضايفلي علي الحاجات دي حق غسيل العربيه خارجيا تلاتين جنيه وضريبة مبيعات 10% وكانت حوالي 79 جنيه و60 قرش وزود 2 ماء بطاريه بعشره جنيه

والمهم حاسبت وخرجت من التوكيل فرحان بنفسي قوي بعد المبلغ اللي دفعته اللي ما شاء الله بوزلي كل خروجات الاجازه اللي كنت ناوي اخرجها وبوزلي الميزانيه وخرجت بعدها من التوكيل وانا عارف اني مش راجع تاني وقعدت فكرت وانا راجع ياتري الواحد محتاج يقبض كام عشان يعمل صيانات العربيه في التوكيل ووانا راجع حسيت اني في حالة اشتياق للميكانيكي بتاعي والكهربائي وحسيت اني بحبهم قوي
والسؤال بقي المهم اني الحاجات اللي محتاجه تتغير بعد فتره دي لما هجيبها من بره هتتكلف كام سواء كانت الاصليه او التانيه ؟
وفي النهايه احب اقدم التحيه لكل اللي قررو من البدايه انهم يبعدو عن التوكيل ويصلحو عربياتهم بره