سيدي الفاضل ..
طبعا أنت بتقارن الالنترا بعربيتين في غاية الاحترام و ورائهما أسمين كبيرين تويوتا و سكودا
طبعا انا في غني اني اتكلم عن الالثنين دول مع العلم أني جربت الكورولا قبل كده و ده السبب أني أخترت الالنترا
أما الأوكتافيا مش عارف ليه أنت أستبعدتها من أختيارك
بالنسبة للألنترا أنا هأحاول أشرح لك أمكانياتها بشكل عملي من خلال أستخدامي لها علي مدار 9 شهور دلوقتي و ارجو أني اقدر أرد علي كافة أستفساراتك عنها :
أولا.. العربية اللي معايا أول فئة اوتوماتيك
يعني مافيهاش ابي اس و لا وسائد هوائية (هيا جت غلطة و تسرع مني بصراحة لأني من أوائل اللي حجزوها وكنت فاكر أن كلها فيها وسائل أمان)
- الكيلومترات المقطوعة حتي الان 23600 كم معظمهم سفر علي طرق سريعة
- اقصي سرعة حققتها بالعربية 200 كم / ساعة و ده كان للتجربة فقط
- الثبات جيد جدا حتي سرعة 160 كم/ساعة حتي مع الهواء الشديد و مطبات الهواء
- استهلاك البنزين مثالي بتحقق معايا حتي سرعة 140 كم/ساعة 7.5 لتر/ 100 كم و في السرعات المنخفضة مع القيادة الهادية 6.5 لتر / 100 كم ووصلت بها الي 5.8 لتر / 100 كم مع قيادة مثالية بسرعة منتظمة
- الاستجابة جيدة جدا بفضل محرك قوي 128 حصان و ناقل 6 سرعات يتيح لها سرعة استجابة و سلاسة و هيا تتفوق علي الكورولا في النقطة دي من خلال مناظرة قمت بها علي الطريق مع الكورولا الجديدة و الالنترا تفوقت بشكل واضح
- العفشة ناعمة جدا و تكاد تكون نفس أحساس الكورولا و الكلام ده من مقارنة واحد ساق العربيتين
- الأرتفاع عن الارض الألنترا عالية مش منخفضة زي ما البعض بيقول و مسألة الهبوط عند التحميل تم تلافيها بفضل المساعدين الجديدة المختلفة تماما عن الموديل السابق و من خلال سفري و مروري علي مطبات زي الجبال عمرها ماحكت معايا حتي و هي في اقصي حالات التحميل
- عزل الصوت ممتاز و تقريبا زي الكورولا
- الصالون مريح جدا جدا و الحمد لله انا باسافر بيها 6 ساعات متواصلة و مافيش أحساس بألام فيي الظهر او تعب ده غير التابلوه الانيق و ياسلام لو ركبت شاشة lcd بدل الكاسيت الاصلي مع الكاميرات
- التكييف ممتاز و الحمد لله لدرجة أني وسط الحر الشديد ده بأشغل المروحة علي درجة واحد و الجو بيكون داخل العربية جيد جدا مع أن الحرارة خارجها بتكون 37 درجة مئوية مع ملاحظة أني مش فاضي نهائيا الفترة الاخيرة غير للصيانات الدورية كل 10000 كم يعني فلتر التكييف مش بيتنظف الا كل 10000 كم
أهم عيوب العربية :
1- الشكل الانسيابي الشديد من الخلف بيجعل أرتفاع الصالون قليل خاصة لطوال القامة في الكنبة الخلفية
2- درجة ميل الزجاج الخلفي تجعل من الصعب الاعتماد علي مراية الصالون ألا بظبط خاص و هو مسألة وقت و تعود و هي بذلك تماثل الاوكتافيا في مشكلة الرؤية الخلفية لكن مرايات الجانبين كبيرة و بتغطي كل المساحة الخلفية
3- صغر حجم الصالون مقارنة بحجم العربية لأن ميل الزجاج الامامي واخد كتير من مساحة الصالون
4- حجم الفوانيس الامامية و الخلفية كبير مقارنة بمساحة الرفرف مما يجعلها عرضة للاصابات
5- رغم الشكل الانسيابي الانيق ألا أن كثرة الخطوط و الكسرات في الهيكل تجعل من الصعب أصلاحه و هو عيب منتشر في معظم السيارات الحديثة
ده أنطباعي عن الألنترا من خلال أستخدامي لها طوال الفترة الماضية و بصراحة في رأيي الشخصي هي تتفوق علي الكورولا بعيدا عن الاسم و الاعتمادية فهيونداي الان أصبحت ذات أسم و أعتمادية و ستكون أختيار موفق أن شاء الله
اي أستفسار عن العربية تقدر تسألني أو تكلمني لو حبيت و أنا تحت امرك في اي وقت
تقييم ممتاز تحياتى
المفضلات