بعد تفكير طويييل اتخذت قرار شراء سيارة نيسان صنى ايام الشكل القديم و فوجئت باعلان نيسان صنى الجديدة

بصراحة دخلت دماغى شكلا و موضوعا خصوصا موضوع ضيق الكنبة الخلفيه و استهلاك البنزين العالى تم معالجتهم فى الجيل الجديد .

كلمت اوتو ايجيبت عشان احجز قالولى الاستلام بعد شهر و انا اصلا مستعجل عشان رايح اصيف بعد اسبوعين و كنت عايز العربية معايا ، كلمت معرض القرش على اساس ان فى تعامل سابق معاه اشترينا عربيتين من عنده قبل كده و الناس معاملتهم ممتازه معانا ،
قالى تمنها ١٠١٠٠٠و هوفرهالك بعد يومين بالكتير فاصلت معاه و خدناها ب ١٠٠٥٠٠ و جاي معاها طقم دواسات و غطاء هديه ، روحت استلمت مع ابن خالتى و فحصناها فحص دقيق الحمد لله

- مفيهاش اى مشاكل فى التقفيل كله تمام
- دورنا العربيه صوت الموتور هادى جداًً
- و طبعا كان فيها بتاع ٣ نقط بنزين روحنا فولناها و طلعنا بيها على الدائرى العربية بسم الله ما شاء الله ثابته جدا على المنحنيات
- و الباور بتاعها بيفكرنى بالالنترا
- و سحبها ممتاز
- و العفشة ناعمة لا تقارن بالصنى القديمه بصراحة (الصنى القديمة مع ابن خالتى اللى استلم معايا و هو لاحظ كده) ،
- الخامات الداخليه مش بالسوء اللى فى بعض الناس اتكلمو عنو اديها جيد علشان هتبقى عمليه اكتر فى التنضيف
- لون الفرش بيچ شكله شيك جدا و تنجيده ممتاز و الكراسى مريحه جدا
- قعدنا نلف بيها بتاع ٣ ساعات و عملنا حوالى ١٥٠ كيلو و التانك لسه فيه بنزين يمشينا ٣٥٠ كيلو من قراءة كمبيوتر الرحلات اللى فى العدادات استهلاكها رائع و اكيد هيتحسن اكتر بعد التليين ان شاء الله ،

لفت نظرى كام نقطه كده عايز حد يفيدنى فيهم جزاكم الله خيرا :
- الايريل بيتركب على المكان بتاعه فى مقدمة سقف العربيه يدويا مفيش طريقه اثبته بيها على السقف عشان محديش يقدر يفكه و يسرقه .
- وصلة ال AUX قالولى مبتنزلش مع العربيه اشتريها منين و تمنها فى حدود كام جنية .