عملت عمرة لماتور ال127 فى 1/2012
السلام عليكم و رحمة الله و بركاته
انا حبيت بس اقول تفاصيل العمرة (على قد ما افتكر لانها بقالها حوالى 6 شهور ) يمكن تفيد حد و ربنا يسلم لنا الطريق كلنا
المهم انا لما رحت للميكانيكى منه لله قالى الموضوع مش حيعدى ال 700 جنيه و لما قبضت المكافاة رحت له ( اصل الاخت مدرسة هههه ) و هو ما صدق و حل الماتور
المهم لقيته عايز طلبات بمبلغ كبير (مش فاكرة كام اصل جالى الظاهر زهايمر من ساعتها ههههه) المهم نا اخدت الورقة اللى فيها الطلبات و لفيت على محلات قطع الغيار و لاقيت حوالى فرق عن الاسعار اللى قالى عليها بتاع 400 فرحت زى الهبلة و قلت له قالى لا اصل اللى باجيب منه حاجاته اصلى و كده فانا قلت له انا حاجيب لك اللى انت عاوزه و اللى مش عاجبك نرجعه
المهم الطلبات كانت كالتاى
طقم بستم تايلاندى ب 270 ج
طقم جوان ايطالى ب 75 ج
طقم هلال ترنك 010 ب 25ج
طقم صباب ب 150 ج
عمود كامة و الجلب ب 280 ج
طقم كستبان ب 150ج
طقم طبب مياه ب 25ج
طقم اويل سيل ماتور 25ج
طقم كهربا ب 50 ج
طقم تروس و كابينة ب 9 ج
طقم شنبر 010 ب 15ج
طقم دبرياج فاليو ب 300 ج
2 قاعدة ماتور فوقية ب 60ج
1 قاعدة ماتور تحتية ب 35 ج
بصوا دى كانت اسعار انا كاتباها مش عارفة دى اللى جبت بيها و لا كانت مقارنة للاسعار
المهم بقى التسلسل التارخى اللى جاب تاريخى انا الارض ههه
16/12/2011
300 ج للاسطى علشان يبتدى
19/12/2011
جبت طقم بست تايلاندى +طقم شنبر المانى + طقم صبب ايطالى ب 535 ( و على فكرة لاقيتهم ارخص عند احمد محرم بس مابنتعلمش ببلاش الحمد لله على كل حال )
27/12/2011
280 ج مصنعية خراط الماتور من عند خراط كده مشهور بعد قباء جنب توكيل شركة مرسيدس بس مش فاكرة اسمه
28/12/2011
جبت بقية حاجات من احمد محرم ب 590 ج
+ عامود الكامة و الجلب ب 280
30/12/2011
حاجات ب 235 و هى كالتالى
طقم سبيكة استاندرد ب 90 ج
اويل سيل خلفى و امامى ب 17 ج
كوع المياه لطلمبة المياه+ جوان ب 25ج
1 جركن زيت التعاون ب 55ج
طقم هلال ترنك استاندرد ب 15ج
لحام كرتير ال زيت ب 10 ج
غسيل الفتيس ب 10 ج
ازاحة مسمار ب 10 ج
31/12/2011
غسيل حوض لماتور ب 15 ج
2/1/2012
تشغيل الماتور
زيت فتيس 56ج
2 كاوتش زيت كوبلن ب 30ج
1 ترموستات ب 15 و ماعاشتش لسه مغيراها بالقديمة من حوالى اقل من شهر
ترضية للاسطى و الصبى 25 ج
4/1/2012
رحت للميكانيكى (على العلم انه ساب اسطى عنده هو اللى يتولى العربية على الرغم من ان الميكانيكى ده و هو هو صاحب الورشة معرفة من بعيد لناس ناسيب و طبعا كان مش طايقنى و شفت منه معاملة زى الزفت و ده طبعا اول ما حل الماتور بس قبل كده كان زى العسل )
و ده لانى رحت جبت الحاجة بنفسى مش من المحل اللى جاب لى اسعاره فى الاول و حسبى الله و نعم الوكيل
المهم فى يوم و ليلة ( على راى وردة الجزائرية الله يرحمها ) لاقيته بيقولى انا جبت حاجات و ركبتها و طلعلى فاتورة ب 250 و قاللى مصنعيته علشانى و علشان الحج الكبير ابويا 450 ج
طبعا واصل له فى الاول 300 يبقى الباقى 400 اديت له 200 و بعدها بيومين 200
انا اخدت العربية كانت طلقة الحقيقة بس دلوقتى عادى جدا ده غير ان مرة بعدها رحت له قلت له ان العربية بتقطع و تقريبا (البتاع الى بيسلكوه و ينفخوا فيه عند الكربراتير ده مش عارفة اسمه ترس السلنسيه و لا ايه معلهش بقى اصلى خايبة شوية ) عايز يتسلك
راح قاللى لا و قعد يربط فى الماتور من تحت و اضبطت و بعدها يادوب يومين و العريبة بقت تقف خالح اول مارفع رجلى من البنزين و رحت له راح باصص لى بشماتة و مشى و ابنه هو اللى عملهالى
طبعا لعمرة دى دخلت تقريبا فى 3000 جنيه و زيادة و الله اعلم ان كان ركب الحاجات دى و لا لأ و حاولت اخد منه الحاجات القديمة اللى طلعها من العربية مارضيش بصنعة لاطفة و انا ماعرفتش احادل معاه
المهم انا اسفة على الاطالة
الخلاصة ان الراجل ده تعب لى اعصابى و استغل انى لوحدى و افترى عليه جامد و الحقيقة انا حسبنت عليه كتيير و قضيت ليالى باعيط من قهرتى ( مش علشان الفلوس و الله رغم انها وجعتنى طبعا لانها مش بتيجى بالساهل ) علشان حسيت بالعجز و القهر و الاستغلال حقيقى و عدم الامانة و الامان حسبى الله و نعم الوكيل
المهم بعدها بفترة انا سمعت ان المكنة اكلت صباعه ( اللهم لا شماتة ) و رغم اللى عمله فيه و بهدلته لى و لابويا لكن و الله انا زعلت عليه و دعيت له ان ربنا يهديه لنفسه و لبيته رغم انه كبير فى السن تقريبا 65 سنة و لا حاجة بس الهداية من عند ربنا
و والله انا دلوقتى عايزة ميكانيكى و عفشجى يضبظ لى شوية حاجات و بابقى خايفة اروح لحد من قلة الامانة و الضمير
بس حاعمل ايه ربنا يسهل و يتمها على خير
معلهش دى تجربتى فى عمرة الماتور يمكن تفيد حد
و ماتنسوناش من صالح دعائكم
فى امان الله
