أوعى تغسل الموتور

**mazenarays** · 28-06-2012 01:14 PM

نصيحة لكل بروتونى او غير بروتونى اوعى تغسل الموتور بالمياه والجاز وده عن تجربة شخصية عشتها الاسبوع الماضى
كنت مسافر وقلت قبل السفر اغسل السيارة ( انا معى جين 2 ) علشان يبقى شكلها نظيف وبرده اذا كان فى اى تراب او تراكمات ممكن تسخن العربية فى السفر تروح.
وفعلا رحت على المحطة والعامل قلى يا بية متقلقش حخليهالك فلة وفعلا مسك الجاز وخرطوم المياه الضغط العالى واتوصى ولكن
كانت النتيجة بعد ما روحت بالعربية بطلت العربية وفوجئت ان مروحة التبريد لسة شغالة قلت يمكن معلقة. دورت وبطلت تانى ولكن بدون فايدة قعدت جنبها ربع ساعه ولم تفصل واضطرت لفصل الكابل علشان احافظ على البطارية
قلت اسيبها تنشف
نزلت تانى يوم حطيت الكابل لقيت المروحة شغالة بردة ومفصلتش قلت اروح اكشف على الجهاز وانا ماشى شغلت التكييف مشتغلش
ولقيت كل حاجة فى العربية ملخبطة لمبة الاتشك انجن نورت ولمبة الايرباج ونور التابلوة طفى والانوار مش شغالة

المهم سافرت من غيرها ولما رجعت كانت نفس النتيجة فكيت علبة الفيوزات الرئيسية وفتحتها من الداخل لقيتها كلها أملاح وده طبعا عمل قفلة وده بسبب ان معظم المحطات بتسخدم مياه طرمبة فى الغسيل والمية دى تحتوى على املاح كثيرة وطبعا لما نشفت ترسبت الاملاح على بوردة علبة الفيوزات وعملت قفلة

المهم نظفت البوردة ببنزين وشلت اى املاح مترسبة وركبتها والحمد لله المروحة فصلت والامور عادت لطبيعتها ولكن لسة لمبة الايرباج منورة

نصيحة اوعى تغسل الموتور بمياه وجاز المرة دى ربنا ستر ولكن اى قفلة ممكن تطير الكنترول الرئيسى

السيارات الحديثة حساسة زياده عن الزوم خلى بالك وربنا يستر

**akmm** · 28-06-2012 02:35 PM

ده صحيح والحمد لله إنها جات على كده ----- تنظيف الموتورات الحديثه بيكون اولا بالهواء الضغوط للتخلص من التراب المتراكم ثم بعد كده بالفوم وهو رغوه بيضاء وبتتباع فى علب زى الإسبراى ويترك على الموتور 10 دقائق ثم يمسح ماتبقى منه والفرق شاسع بين قبل وبعد إستعمال الفوم على الموتور .. تحياتى للجميع .