المشاركة الأصلية كتبت بواسطة ahmed nouh
انا عربيتى اتسرقت ، طيب يا حبيبى ربنا يعوض عليك !!
هو ده بالظبط الحال اللى وصلناله بعد اكتر من سنة من الانفلات الامنى المفتعل واللى خلى كل من لم يكن متخصص اجرام انه ياخد كورسات مكثفة ويلتحق بالمجال ده ، واللى بالتبعية خلى كل من لم يصادف فى حياته حاله سرقة واحدة على ارض الواقع انه يعيش واقع السرقة بمختلف انواعه ، حتى ولو عن طريق شخص مقرب ليه جداً .
فأنا شخصياً اللى ربنا انعم عليا ان عمرى ما اتسرقت فى حياتى تعرضت السنة دى بس لحالتين سرقة ، الاولى شقة مقفولة اتعرضت لحالة سرقة مبكية من الكوميديا ( اتسرق شطاف الحمام ) ، والتانية عربيتى العزيزة اللى اتقلب محتواياتها امبارح بليل فى واحد من أزحم شوارع القاهرة .
وبما ان عربيتى متسرقتش بإنزال جوى ، او الابواب متفتحتش بأدوات من خارج كوكبنا فعلى الارجح التفاصيل مش مهمة ، بس برده نقول للحبايب علشان عندى اللى اهم من السرقة عايز اتكلم عنه .
العربية كانت مركونة ورا السراج مول ، فى الحتة اللى فيها بتاع 220 سايس دى ، سيبتها بقا مش 10 دقايق زى كل الناس ، لا انا مختلف ، انا سيبتها بتاع ساعة ونص ، ورجعت لقيت الشراعة اللى ورا ناحية الرصيف مكسورة ، ومتاخد منها لابتوب على موبايل على فلوس على شوية حاجات كويسة ، مع العلم ان كل ده كان فى الشنطة والعربية مفيش جواها اى حاجة باينة او مغرية ولا هى منفخة ولا مجنطة ولا حتى الحاجات اللى فى الشنطة طلعتها حطيتها ورا مكان ما ركنت .
فالواضح ان دلوقتى السرقة بقا ملهاش علاقة بمظهر العربية ولا بأى اغراء فى الصالون ، الموضوع بقا بالبركة .
المهم كالمعتاد اتصلت بالنجدة وكتر خيرهم وصلوا بعد ساعة ونص ورحت جبتهم من اول الشارع علشان مش عارفين العنوان ، وعملنا المذكرة علشان شنطة اللابتوب كان فهيا كل ورقى بما فيهم بطاقتى ورخصة العربية ورخصتى ( غباء ) ، وبعدين رجعت قسم اول مدينة نصر خلصت المحضر .
نيجى بقا لموضوعنا ، مين سرقنى ، شخص معروف جداً جداً ، فاسد من المجتمع ، خلقه اختياراته ، وكل وظيفته دلوقتى انه عبارة عن حلقة فى دايرة مغلقة اسمها كما تدين تدان ، الحقيقة انا مسرقتش حد علشان اتسرق ، على حد علمى يعنى ، بس انا واثق ومتأكد ان اى شر بيحصلنا هو نتاج اعمالنا ولسبب ما ، وده اللى قلق منامى امبارح .
الحقيقة انا بعد رجوعى البيت امبارح مقدرتش انام الا لما احاول اعرف انا اتسرقت النهاردة ليه ، انا اكيد عملت حاجة استاهل اتسرق عشانها ، مهو مش طبيعى انى اتسرق كدا ، مفيش حاجة بتحصل كدا ، ده على حد اعتقادى يعنى .
مخدتش وقت كتير علشان اعرف السبب الحقيقى ، حق المحتاجين من مالى ، اللى بقالى كام شهر نسيته ، واللى اخدتنى المصاريف والمشاغل والاحتياجات عن تسديده ، وكان لازملى قرصة ودن افتكر منها ان ما نقص مال من صدقة وانى لم ارزق الا لتأدية واجب على ، قصرت فيه ، فكان لازم افتكر .
يمكن فى ناس كتير هتحس كلامى ده ملوش علاقة ببعضه ، بس اهو كلام وخلاص يمكن ينفع اى حد بأى شكل ، الصدقة اهم مما قد تتخيل ويستحيل هتعرف هى مهمة ليه ، لأن اهميتها فى حاجات مبتحصلكش مش حاجات هتحصلك ، الصدقة فعلا وقاية ، ومين فينا مش محتاج وقاية فى الغابة اللى بقينا فيها دى .
احنا داخلين على شهر الكل بيحشد الصدقات فيه ، بس مش ده المهم ، المهم هو الصدقة بلا توقف طول السنة ، مش بس اللى فى المواسم ، حدد نسبة من مرتبك ، ولو حتى كانت 3% ، نسبة بتدفعها فى اى حاجة عبيطة ممكن تحصلك لأى سبب ، وخليها نسبة ثابتة او زودها لو تقدر ، المهم انك تلتزم بيها على رقبتك وايا كانت احتياجاتك ولو حتى مديون لراسك ، النسبة دى هى تامين الحياة والمخاطر بتاعك ، ده بعيداً بقا عن حق المحتاج عليك وكل الكلام ده .
متخليش الصدقة حاجة بتعملها بظروفها ، خليها دين بيدفع كل شهر ، وخليه اصعب دين ممكن تتأخر فى دفعه ، وجرب سعة الرزق والبركة وراحة البال والوقاية من كل شر فى حياتك .
وخليك فاكر ان لو حصلك اى شر فهو لسبب ، الاهم من لعن الدنيا هو معرفة سبب الشر اللى حصلك ، هل هو منك ؟ ، ولا هو مجرد اختبار من ربنا محتاج صبر ؟
ربنا يحفظكم جميعاً من السرقة