أشتري تايواني أو صيني جديد ولا ياباني أو ايطالي مستعمل؟

**all4wb** · 29-06-2012 07:21 AM

بسم الله الرحمن الرحيم

الموضوع بدون مقدمات يتلخص في أن أنا بعد تفكير عميق قررت أشتري ماكسي سكوتر.
بس علشان أنا معلوماتي على أدي في الاسكوترات احترت بين اني اشتري تايواني أو صيني جديد زي TGB X-motion 300 أو CF moto jet max 250 ؛ وبين اني أشتري يا باني أو ايطالي مستعمل زي YAMAHA و SUZUKI H أو PIAGGIO. مع العلم ان كل اللي أنا ذكرته تقريبا بيلعب في رنج واحد وهو العشرينات يقل أو يزيد على حسب النوع والحالة.

أنا حسبتها على أساس ان كل شق ليه مميزاته وعيوبه فمثلا:
1- شق الصيني والتيواني الجديد يتميز بأن له ضمان وقطع غياره أكيد هتكون موجوده عند المكان اللي هشتري الاسكوتر منه + ان الجديد جديد وانا أول واحد هركبه وأكيد هحافظ عليه وأكون عارف اللي فيه ومتابعه ؛ ولكن يعيبه انه صناعه صيني وتايواني والكل بيخاف منهم + أنه مهما على شأن هذه الصناعه في لا تقارن بالياباني أو الايطالي في السمعه والكفاءة والخامات والخبرة والايدي العاملة أيضا + ان المبلغ كتير على ( موتوسيكل صيني أو تايواني ) + عمره الافتراضي أقل نسبيا من الايطالي والياباني.

2- أما شق الياباني والايطالي المستعمل فهو يتميز بأنه ماركة معروفه + كفاءة عالية + تمنه فيه الى حد ما + عمرة الافتراضي أكثر بكثير + ان أنا أقدر أجيب العالي بتاعه اللي فوق 300cc + انه كفايه الاسم بتاعه لوحده ؛ وعلى العكس يعيبه أنه مش مضمون اللي كان راكبه قابلك كان بيتعامل معاه ازاي + ممكن يكون اللي بايعهولك اشتراه أصلا من واحد كان شاريه من واحد أشتراه من واحد كان شاريه مستعمل من الخارج + قطع غياره غاليه نسبيا مقارنة بالصيني أو التايواني وتقريبا صعب الحصول عليها بسهوله ولو لقيتها بتكون مستعمله تقريبا+ ملهاش توكيل في مصر وأنا مش متأكد من النقطة دي فبالتالي هتدوخ على ما تلاقي ميكانيكي فاهم وأمين يشتغل فيه وده صعب عليا شويه علشان انا من طنطا أصلا + ان المستعمل عاوز ايدك فيه باستمرار وأنا مش فاضيله وعاوز حاجه انساها وتنجزني + تمنه أيضا غالي على ( موتوسيكل مهما كان اسمه مستعمل).

علشان كده أنا محتار ومش عارف أخد قرار في الموضوع ده ، ونفسي حد يشور عليا بمشوره صائبه لها ما يبررها من أسباب ، أو على الاقل يصححلي معلومة تكون خطأ من كل اللي ذكرته جايز ساعتها أرف أفاضل بين الاتنين ، أو حد يكون مر بتجربة مماثله ينقلي فيها خبرته.

وأخيرا شكرا لكل اللي صبر على قراءة هذا الموضوع.

**GMC** · 29-06-2012 09:30 AM

الموضوع كبير اوي ومقرتوش كله D: بس الي انا فهمته انك عايز اسكوتر ويعيش معاك وقطع غيار متوفره ورخيصه

طيب ليه تدفع 20 الف وتركب فزبا قصدي اسكوتر D: حرام يعني هات ريس ولا كاستم افضل بكتر واشيك

20 الف يجبولك هوندا استيد ولا هوندا سي بي فور واسمك راكب V4 ولا v2 واهو كاستم ومريح وسريع

مش ماتور بصبابات ولا بستهم هههههه الاسكوتر اساسا للعيال الصغيره متزعلش مني

لاكن تجبلي واحد كبير وراكب اسكوتر ودافع 20 الف ولا 25 الف حرام

او من الاخر فزبا هندي جديده ب 6500 ولا 8000 او اسكوتر صيني ب 5000 جنيه وشكرا والاتنين قطع غيارهم موجوده