-
شكرا جزيلاً
انا فعلاً اشتريته من هناك من محل العالم العربى، كاتب عليه 245 فى الفاترينه، ولما اشتريته ادهونى بـ 240 جنيه
تجربتى الشخصية:
على فكره انا روجت الاول عند العريبى (تقريباً بعده بـمحلين او تلاته، وكاتب عليه فى الفاترينه 239 جنيه)
عند العريبى: اولاً معندوش ضمان، يعنى على التجربه وشكراً،
ثانياً: بعد مادفعت الفلوس ، من حقى يجرب كل حاجه فيه قدامى، جرب الفلاش اشتغلت تمام، جرب الريموت اشتغل تمام، جرب الخرج على شاشه، اشتغل تمام، طلبت منه يجرب الكارت SD، قالى معنديش كارت مع انه كان مجرب الكارت للزبون اللى قبلى ولسه الكارت على البنش، روحت شاورت له على الكارت وقولتله مانت لسه مجرب دا للراجل اللى مشى، قالى طيب ... حط الكارت فى الكاسيت ماشتغلش، قالى يمكن يكون الكرت بايظ (مع انه كان لسه شغال من 3 دقايق) ، وسألنى معاكى كارت ؟ بالصدفه كان معايا موبيل فيه كارت من الكبير، خلعته من الموبيل عشان يجرب بيه، برضوا ما اشتغلش! وبيطلع على الشاشه No Card ... قولتله واضح ان فى مشكله فى الكاسيت، لو سمحت انا باجربه عشان اطلع من المحل معايا حاجه مجربه، فهات لى واحد غيره. قالى الكاسيت سليم ومفهوش حاجه، والعيب فى الكارت، ومش هاغير الكاسيت، والبيع مش بالعافيه، لو عاجبك خديه، مش عاجبك يبقى خدى فلوسك. قولتله هات الفلوس.
روحت لمحل (العالم العربى، تليفون: 23904522) : بمنتهى الذوق جرب لى كل حاجه، وسألته على الضمان، قالى معاكى أسبوع جربى فيه زى ما انتى عايزه بس قبل ما تركبيه فى العربية، لو أى مشكله رجعهولى فى خلال اسبوع الضمان. اشتريته منه وادانى فاتوره، والكهربائى جربه لما طلع عينه ، والحمدلله طلع سليم وركبته فى العربيه.
الكاسيت بجد تحفه ، فيه 2 مخرج فيديو، ومخرج اوديو RCA، وايكوليزر، وصوت نقى جدا وعالى جداااااااااااااا، وريموت (حجمه كبير شويا)، ومدخل Aux وكارت وفلاش ، وشاشه الوان جميله، وممكن يوصل على الكونتاكت عشان يطفى الساعه لما اطفى العربيه، من غير ما يحذف القنوات او يلخبط الساعه، وبيخرج لاربع سماعات ، وفيه راديو AM/FM قوى جدا وصوت واضح جداً، جاب محطات FM الكاسيت القديم Sony مش كان بيجيبها، بيشغل الامتدات MP3/WMA/MP4 ، حطيت فيه فلاش 8 جيجا قراها، وفلاش 16 و 32 جيجا قراهم (عشان كنت خايفه مش يقرى الفلاشات الكبيره)، الريموت بتاعه حساس جداً مش لازم اوجه نحيته بالظبط، بيلقط من اى حته. بيرفع الاريال الكهربا اتوماتيك اول ما تشغل الراديو.
كمان عندى الموبيل بيخرج على سماعه ، وصلت الموبيل بفتحت Aux بوصله اشتريتها بـ 3 جنيه اسمها (واحد لواحد، عباره عن جاك سماعه فى النحيتين)، وبقى الموبيل متصل بالكاسيت، وعملت مكالمات وانا سايقه والصوت خارج من السماعات نقى جدا وواضح جداً واقد اعليه واوطيه من الكاسيت، كأنى فاتحه Speaker الموبيل بس على الكاسيت.
اخر حاجه اللى كان نفسى فيها بس مش موجوده، كان نفسى يكون معاه الريموت اللى بيركب فى التاره، لكن للاسف جاى معاه الريموت العادى.
-
-
-
-
Content Relevant URLs by
vBSEO 3.6.0 PL2