طرق بيع وشراء السيارات المستعمله

**Abo.Omar** · 30-06-2012 06:03 PM

مصاء الخير على احلى منتدى

الموضوع فى كلمتين

ان شاء الله انا ناوى اشترى عربيه مستعمله وابيع اللى معايا

المطلوب من الخبراء (وذوى الشرح السلس والبسيييييط) يقولولى ايه انسب الطرق اللى ماشيه وأأمنهم و يشرحهالى تفصيلا
يعنى مثلا مصروفات كذا بتبقى على مين وبنحتاج ورق كذا واحنا رايحيين فين وكده

ودا بالنسبه لحاله البيع والشراء

لانى قريت كذا موضوع هنا عن الحوار دا وبصراحه حاسس انى تايه

شكرا

**Abo.Omar** · 01-07-2012 05:40 PM

ايه يا رجاله ولا واحد عايز يرد ؟؟؟؟

**mem** · 01-07-2012 09:08 PM

انا هبسط لحضرتك الموضوع بالنسبة لسياره حضرتك ممكن تبعها عن طريق النت تعرضها مثلا فى موقع كونتكت كار
وده موقع مشهور جدا حضرتك تغسل العربية وتصورها من بره ومن جوه والموتور وتكتب مواصفات السياره
الموديل سنة الصنع عاملة كام كيلو حضرتك اول يد ولا فيها توكيلات السعر
وحاول يكون الفعلى مش مبالغ فيه وتحط رقم تليفونك للتواصل
وناس كتيير باعت عن طريقة اهم حاجة معلومات حقيقة عن السياره والحالة الفعلية لتجذب اقبال عليها
وومكن كمان تشوف عليه السياره اللى حضرتك عايزها
اما لو عن طريق سمسار معرض يعنى هتعرض عنده السياره فمنهم بيقول انا هاخد نسبة ومنهم بيقول انا هاخد كذا
وللعلم السمسار بياخد فلوس من الطرفيين لكن بياخد من اللى بعله اكتر لانه بيقله انا اللى جبت لك الزبون وبعتهالك باعلى سعر والكلام ده
واللى هايشترى العربية هو اللى بيبقى عليه التسجيل او لو هتعمل توكيل وهو بعد كده يسجل وكل الاوراق
بس اللى على حضرتك شهاده المخالفات حضرتك اللى بتجبها له

**semi** · 01-07-2012 10:41 PM

3 طرق للبيع والشراء اما تنزل اعلان على موقع زي كونتكات كارز مثلا
او عن طريق معرض تشتري او تبيع
او تشتري او تبيع من او الى صديق او حد معرفة
شخصيا افضل الشراء من صديق او حد ثقة تعرفه لانه هيصارحك بعيوب العربية وتعرف تفاصل معاه
او بمعنى اوضح مش هيضحك عليك لانك هتشوفه بعد كده
تاني طريقة افضلها هي الشراء عن طريق معرض له سمعة لانه مكان ثابت وموجود ترجعله لو في حاجه
تالت طريقة هي الشراء عن طريق النت ومن مميزاتها انك بتوصل للمشتري مباشرة
وبتوفر موضوع ان حد يقولك عايز نسبتي وكده ومن مميزاتها انك ممكن تقع في عربية تحفة
استعمالها كويس وممكن العكس حد ينصب عليك ويبعيلك عربية مركبة نص ومش تشوفه تاني
بس مع الطريقة دي هتتعب شوية وممكن تروح تلف على كذا عربية لحد ما تلاقي اللي يعجبك

وفي كل الحالات لازم يكون حد معاك بيفهم جدا في المستعمل
يمسك العربية يفحصها جزا جزا بالتفصيل الممل
لو مخبوطة يقولك لو الشاسيه فيه حاجه يعرف ويقولك حالة الماتور والعفشة
ونصيحة من اخ مش تصدق ولا كلمة يقولهالك صاحب العربية وافحص كل شئ بنفسك
خصوصا لو رايح تشتري من معرض هيكذب عليك وهيحاول يخفي عيوب العربية بأي شكل

واخيرا موضوع البيع او الشراء واحد تقريبا
هيتم كتابة عقد للعربية بين البائع والمشتري لو حابب تدفع عربون عشان تحجز العربية
مش مشكلة ويتم كتابة العربون بالعقد والمبلغ المتبقي
هتروح الشهر العقاري وتكتب توكيل للمشتري لو مش ناوي يرخص دلوقت
اما لو هيرخص وينقل ملكية يبقى هتكتب عقد موثق بالشهر العقاري
وفي حالة دي مصاريف التسجيل على المشتري
صاحب العربية بيجيب شهادة براءة ذمة للمخالفات ويسلمها للمشتري
المشتري هيروح يعمل بصمة ماتور للعربية بمرور العربية القديم
وياخد العقد وورق البصمة والمخالفات ويروح المرور التابع له عشان نقل الملكية والترخيص

وفي النهاية كل اللي فات ده ولا حاجه بجانب استخارة الله قبل شراء العربية
لان هتعمل ناصح ومفيش زيك اتنين في الاذكى منك واللي يقدر ينصب عليك

**Abo.Omar** · 01-07-2012 10:56 PM

اولا شكرا للردود

ثانيا اكيد هيكون معايا واحد بيفهم جدا بس انا كنت حابب اعرف الاجراءات مش اكتر لكن الفحص كاملا هو اللى هيتولاه

ثالثا معلشى عندى كام استفسار كده

البايع بيسلم المشترى العربيه امتى بالظبط؟

هل من الاضمن نقل الملكيه اثناء البيع او الشراء ولا موضوع التوكيل دا مفيهوش اى مشكله (انا شايف انه اسهل واسرع خصوصا للبايع )

اهل البايع بيكون مرافق للمشترى فى كل المراحل (التوكيل - عقد موثق - نقل الملكيه ) ؟

نقل الملكيه فى المرور ولا الشهر العقارى ؟

هل نقل الملكيه بيتضمن الترخيص والرخصه تبقى باسم المشترى وكده ؟

شكرا يا جدعان على الاطاله بس دا لانى مييييح فالاجراءات دى

**semi** · 02-07-2012 01:46 AM

بمجرد كتابة العقد بينك وبين المشتري ودفع مبلغ العربية كاملا
اصبحت العربية بتاعتك وتقدر تستلمها
والعقد ده بيتباع في اي مكتبة عادي
بعد كتابة العقد بتروح للشهر العقاري عشان تكتب عقد موثق هناك
وتدفع قيمة محددة على حسب موديل العربية وسنة الصنع
في خلال 5 ايام تقريبا كحد اقصى لازم تروح المرور عشان تنقل ملكية هناك
ويكون معاك العقد الموثق من الشهر العقاري
خلي بالك ان يكون اللي باعلك العربية هو نفسه اللي رخصة العربية بأسمه
او يكون معاك التوكيل اللي بينه وبين مالك العربية الاصلي
وكل ما تكتر التوكيلات دي بيكون مش كويس وامر مشكوك فيه
طبعا لحد ما تعمل نقل ملكية بالمرور مفيش حاجه تضمن لك ان العربية دي ورقها سليم
لان في توكيلات بتتباع دلوقت وعليها ختم النسر ب600 جنيه
فيفضل توثق العقد بالشهر العقاري وتطلع ترخص علطول
بمجرد استلام الرخصة انت كده في السليم

**PANERAI** · 02-07-2012 03:29 AM

المشاركة الأصلية كتبت بواسطة semi

بمجرد كتابة العقد بينك وبين المشتري ودفع مبلغ العربية كاملا
اصبحت العربية بتاعتك وتقدر تستلمها
والعقد ده بيتباع في اي مكتبة عادي
بعد كتابة العقد بتروح للشهر العقاري عشان تكتب عقد موثق هناك
وتدفع قيمة محددة على حسب موديل العربية وسنة الصنع
في خلال 5 ايام تقريبا كحد اقصى لازم تروح المرور عشان تنقل ملكية هناك
ويكون معاك العقد الموثق من الشهر العقاري
خلي بالك ان يكون اللي باعلك العربية هو نفسه اللي رخصة العربية بأسمه
او يكون معاك التوكيل اللي بينه وبين مالك العربية الاصلي
وكل ما تكتر التوكيلات دي بيكون مش كويس وامر مشكوك فيه
طبعا لحد ما تعمل نقل ملكية بالمرور مفيش حاجه تضمن لك ان العربية دي ورقها سليم
لان في توكيلات بتتباع دلوقت وعليها ختم النسر ب600 جنيه
فيفضل توثق العقد بالشهر العقاري وتطلع ترخص علطول
بمجرد استلام الرخصة انت كده في السليم

كتر التوكيلات دة عيوبه ايه ؟؟

**semi** · 02-07-2012 05:53 PM

المشاركة الأصلية كتبت بواسطة panerai

كتر التوكيلات دة عيوبه ايه ؟؟

يعني لما مالك العربية الاصلي يبيع لمشتري بتوكيل يقوم ده يبيعها لشخص تاني بتوكيل
يقوم التاني بيعها للتالت بتوكيل اصبح في 3 توكيلات للعربية عشان تمشي بها
وده بيبقى مش كويس طبعا لكذا سبب اولا ليه الناس باعت العربية بالسرعة دي
والمشكلة التانية ان ممكن يكون في توكيل ساقط او مضروب في الوسط
فالافضل دايما انك تشتري من المالك الاصلي او على الاقل توكيل واحد

**AHMED MOHSEN** · 02-07-2012 10:02 PM

جرنال الوسيط حلو اوي برضه
واحد صاحبي استلقط عربيه منه

**mem** · 03-07-2012 02:34 PM

المشاركة الأصلية كتبت بواسطة abo.omar

اولا شكرا للردود

ثانيا اكيد هيكون معايا واحد بيفهم جدا بس انا كنت حابب اعرف الاجراءات مش اكتر لكن الفحص كاملا هو اللى هيتولاه

ثالثا معلشى عندى كام استفسار كده

البايع بيسلم المشترى العربيه امتى بالظبط؟

هل من الاضمن نقل الملكيه اثناء البيع او الشراء ولا موضوع التوكيل دا مفيهوش اى مشكله (انا شايف انه اسهل واسرع خصوصا للبايع )

اهل البايع بيكون مرافق للمشترى فى كل المراحل (التوكيل - عقد موثق - نقل الملكيه ) ؟

نقل الملكيه فى المرور ولا الشهر العقارى ؟

هل نقل الملكيه بيتضمن الترخيص والرخصه تبقى باسم المشترى وكده ؟

شكرا يا جدعان على الاطاله بس دا لانى مييييح فالاجراءات دى

البايع بيسلم العربية لو مثلا الاتفاق كان ليلا بتعمل عقد ابتدائى وبتدفع نص ثمن العربية او حسب الاتفاق بينك وبينه بس لا تعطى له ثمن العربية كاملا وبتاخد العربية والرخصة
والصبح بتروح معاه الشهر العقارى اذا كان ها يسجل او ها تعمله توكيل بالبيع وبتكمله باقى الفلوس
هو الافضل التسجيل لكن التوكيل ايضا لا يوجد ضرر به الا اذا كان اكثر من توكيل بيخلى هناك محل للشك
حضرتك بتكون مرافق المشترى فى التوكيل بس
ونقل الملكية بالشهر العقارى
بعد التسجيل بالشهر العقارى بيكمل الباقى بالمرور
وبالتوفيق