الموضوع: كل ساعة .. شخصية

السلام عليكم


.
طبيعي
كل ساعة في اليوم
شخصيتك بتتغير تبعا للمود بتاعك
في الحر.. تلاقي نفسك مش طايق نفسك .. ونفسك حد يقولك بم علشان تمسك فيه
أخر النهار والجو رايق ومفيش حر
تلاقي مودك حلو ..
تصحى الصبح
مودك مختلف
===
أنا بقا
===

تقريبا نفس المود في كل الأوقات مابتتغيرش غير لسبب واحد
النوم
لو قايم القبل الظهر من النوم
ونايم كويس..المودكويس طول النهار
وماأأخرش عند أي حد أي طلب أو خدمة .. وأضحك في وش الناس حتى لو عندي مشاكل
لومطبق لحد تاني يوم

الشخصية بتاعة الصبح دي لو مطبق
كنت بكرهها
كنت بكون غتت ورخم ... ولو قالي لو سمحت..قبل مايكمل الكلمة أقول مش فاضي
لو حد من زباين المخروبة .. وقف يرغي .. أقفل معاه وأقوله شرفت
وهكذا
شخصية الصبح دي لو أنا مطبق
إكتشفت مؤخرا
إن الناس الي بتعاملني وانا مطبق.. بتحترمني زيادة عن أي حد تاني بيعاملني في اليوم العادي
يعني الناس الي بتشوف الوش الحلو .. بيحترموني وكل حاجة..لكن ساعات بحس انهم شايفني(خفيف)
مش دكتور بقا .. يعني تنك وكلاسيك ومايقومش لأي حد .. والكلمة بحساب وهكذا
لكن
الناس الي بتشوف الوش الغتت لما بكون مطبق
إكتشفت إنهم بيحترموني بشكل مبالغ فيه
لو ناس اكبر مني بكتير ... يخشو الصبح وانا مطبق.. تلاقيهم يسلمو وعليا وكلمة حضرتك وسيادتك بتتقال مع كل جملة تقريبا




.
وعلى هذا

.
وبماإني قررت أبيع المخروبة في الارياف دي
وأفتح في مدينة بأي شكل..أو حتى اكتشف نفسي في مجال شغل تاني

قررت غصب عني
أعود نفسي الأيام دي
أرسم الوش بتاع التطبيق
إلي هو
التناكة .. والقنعرة .. وماسبش حد يرغي
لو حد عاوزني أديله حقنة .. أقوله لا مابديش إلا لو كانت من صيدليتي
من شوية
من نص ساعة.. ناس من الرخمين دول
جابو دوا من صيدلية تانية .. وجايلني أروح معاهم أعلق المحلول
((الحركة دي بتتكرر كتير.. وكنت باجي على نفسي وأقول كله بثوابه ))
بس الأشكال الرمم دي مش عاوز منهم ثواب
رسمت الوش الغلس
وإديتهم كلمتين في أجنابهم فيما معناه.. يعني مش مكسوفين من نفسكم وانتوا جايبين الدوا من برا وجايلني أقفل صيدليتي وأروح أعلق ليكم المحلول..فيما معناه برضووو انكم عالم ماعندكوش دم
إتحايلو عليا بكلام زي
"" وهنروح لمين دلوقتي ""
و
"" مش لاقيين حد والله يادكتور ""
و
"" يعني نسيب الراجل تعبان ""

وأن قاعد فارد رجلي على الكرسي قدامي وماسك الريموت بتاع التليفزيون
""" مش مشكلتي والله """


ماتعودتش أكسف حد قبل كده
لكن
الأحساس
إحساس راااااااااااااااااااائع إنك تكسف الناس البجحة كده


خلاصة الكلام من الموضوع ده
=================
الوش الغلس
والترفع عن الناس ((مش التناكة والغرور))
يعني تعامل الي يستاهل انك تعامله
يبقا كلامك مع اي حد.. على اد الكلام
خليك دايما مهاب .. ماتضحكش في وش الناس ... خليك رزل على طول
صدقوني
وعن تجربة سنين
طول مانت بتضحك وبشوش مع الناس
عمرك ماهتكسب إحترامهم
لازم تحسس الي قدامك دايما بمركزه .. وبمركزك
علشان يحترموك

وصدقني
إخدم إلي يستاهل
وإلي مايستاهلش
ماتقولش كله بثوابه



محدش يعترض على الجملة الأخيرة دي
عارفين ليه ؟
الي مايستاهلش الخدمة ..أكيد بيكون واطي وجاحد وناكر الجميل
يبقا انت كده بتطبق مبدأ ربنا "" كما تدين تدان ""