عملت حادثة و انا رايح المقابلة

**Akram** · 22-06-2008 11:40 AM

قدر الله و ما شاء فعل , عملت حادثة يوم الجمعة اللي فاتت و انا رايح المقابلة على الدائري بعد كارفور قبل الربوة بـ كيلو واحد ,
كنت ماشي على 90 في الشمال و ماشية قدامي عربية نقل و كنت سايب مسافة كويسة بيني و بين النقل و فجأة العربية النقل انتقلت للحارة الوسطى في الطريق (في جزء من الثانية) و أفاجأ بعربية هيونداي i10 راكنة في الشمال و المسافة مع السرعة دي مكنتش تسمح بأي حاجة غير إني أفرمل و لكن خبطت العربية دي من الخلف ,
تخيلوا واحد يقف في طريق سريع ذي الدائري في الشمال , و عارفين طلع واقف ليه , طلع واقف علشان تايه و عايز يسأل يمشي منين !!!!!!!!
الحمد لله محصلش إصابة و بعد شوية حوارات وصلنا إن كل واحد يتكلف الحاجات اللي عنده ,

و بعد الحادثة رحت برده المقابلة , ( أصل اللي حصل حصل يبقى على الأقل الواحد يشوف اخوانة علشان يخففوا عنه شويه) ,

انا رحت لسمكري أعرفه و هو قاللي لازم يتغير الكبوت و الإكصدام , و رحت جبت كبوت جديد تايواني و إكصدام استيراد و كشافات , و لسة بقيت الحاجة زي السربنتينة و الصدر و الله و أعلم ,
و الحمد لله على كل شيء .

**أبو ياسين** · 22-06-2008 11:53 AM

الحمد لله الذى لا يحمد على مكروه سواة
قدر الله و ما شاء فعل

**tutankhamoun** · 22-06-2008 11:56 AM

سواقين مصر ........... اذكى سواقين في العالم حاجة تشل

.................................................. ........................................

قدر الله و ما شاء فعل ........... بس أعتقد إن صاحب الهيونداي كان المفروض يتحمل تكاليف تصليح عربيتك
ده الكلام ده لو إنت في بلد محترم و مع ناس محترمة
إنما هنا
الناس تبقى غلطانة و تبوق فيك
و خدوهم بالصوت
و الحمد لله إنك بخير ياباشا

**goodwave** · 22-06-2008 12:01 PM

قدر الله وما شاء فعل
ربنا يصبرك ويأجرك في مصيبتك ويخلف لك بالخير

**عمرو عمارة** · 22-06-2008 12:04 PM

السلام عليكم

قدر الله ما شاء فعل......أهم حاجة ان انت بخير

انا نفسي أعرف الناس دي بتفكر ازاي!!!؟؟ أكيد عندهم خلل أو قصور في التفكير
أنا ياما فاديت ناس مش واقفة على الشمال...لأ...راجع بضهره على الشمال عشان اليوتيرن فاتوه!!!!!!!!!!
والله الناس دي مفروض الرخص بتعاعتهم تتسحب ويتعرضوا على طبيب أمراض نفسية وعقلية.....اه والله مش بهزر

عمرو عمارة

**MohabSaeed** · 22-06-2008 12:05 PM

قدر الله وماشاء فعل
ربنا يعوض عليك

للاسف ده جهل وغباء الناس الى وصل لمرحله لا يمكن السكون عليها .
جهل وغباء شديد من صاحب الI10 انه اساسا يقف على الشمال علاشان يسأل " حيسأل الرصيف مثلا ؟؟؟؟؟ " .
وجهل و غباء اشد من سواق العربيه النقل الى كان المفروض يفرمل ويشغل الانتظار علاشان الى واراه ياخد باله ان فى حد واقف . مش يكسر كده وخلاص .

للاسف الموقف ده حصل معايا مرتين على كوبرى 6 اكتوبر بسبب العربيات الى بتعطل و الكوبرى اساسا حرتين ف مش مستحمل كنت ماشى 80 تقريبا و الى ماشى قدامى كسر مره واحده من غير لا اشارات ولا اى حاجه بالرغم من انه كان شايف العربيه الى واقفه من بعيد لان مكانش فى عربيه قدامه , لكن استنى لحد مقرب جدا للعربيه الى واقفه وراح كاسر مره واحده . وافاجأ بعربيه واقفه فى وشى على بعد 20 متر مثلا . روحت كاسر مره واحده وربنا ستر ان مكانش حد جمبى .