اسعار قطع غيار اوبل فيكترا 96 يوم 2-7-2012 بالصور

**karkor30** · 02-07-2012 11:20 PM

السلام عليكم

النهاردة اشتريت طقم سيرفيس للعربية من عند موزع معتمد اسمه الوطنية متخصص اوبل وشيفورليه فى شارع الطيران مدينة نصر خلف محطة بنزين شيل عرفته من واحد صاحبى معاه اوبترا بيشترى كل حاجتها من هناك

سير كاتينة ايطالى DAYCO السعر 75 جنيه

سير دينامو ايطالى DAYCO السعر 75 جنيه

شداد كاتينة السعر 240 جنيه

جوان غطاء تاكيهات المانى السعر 60 جنيه

فلتر زيت السعر 25 جنيه

فلتر هواء السعر 60 جنيه (عند ربيع اللى فى صقر قريش جنب محمد عبد الراضى ب 50 جنيه)

فلتر بنزين السعر 50 جنيه

بوجيهات بوش +9 السعر 90 جنيه

واخيرا المعلوم اللى دفعته عدد 675 جنيه

وبعدين طلعت على بنزينة شيل بس اللى فى التجمع اشتريت الاتى

جركن زيت شل الاصفر 4 ك السعر 120 جنيه طبعا مش محتاج صورة

جركن زيت شل الاصفر 1 ك السعر 37 جنيه

اسبراى منظف انجيكشن السعر 25 جنيه

اللى دفعته فى شل 182 جنيه

يبقى كده الاجمالى 675 + 182 = 882 جنيه

وطبعا منسيتش اروق على نفسى بجملة المصاريف بقى روحت ضارب واحد كيمو كونو ب 2 جنيه ونص

**tananybasha** · 02-07-2012 11:54 PM

اهم حاجة الكيمو كونو كان شيكولاته و لا فانيليا
مبروك يا باشا
و تركبهم على خير

**M.Osama** · 03-07-2012 03:04 AM

هوا مش الكيمو كونو ده من كام سنه كان بجنيه ونص ! دا وانا صغير كنا بنجيب الاربعه ب 3 جنيه :d :d

**hamdy916** · 03-07-2012 10:21 AM

بجد موضوع مفيد جدا وياريت كل الناس تعمل كده

**karkor30** · 03-07-2012 10:50 PM

المشاركة الأصلية كتبت بواسطة tananybasha

اهم حاجة الكيمو كونو كان شيكولاته و لا فانيليا
مبروك يا باشا
و تركبهم على خير

لا فانيليا يا باشا ههههههه والحمد لله ركبتهم النهاردة

**karkor30** · 03-07-2012 10:51 PM

المشاركة الأصلية كتبت بواسطة medoghaly

مبروك يا باشا المهم العربية تبقي تمام

الف شكر يا باشا الحمد لله ركبتهم النهاردة

**karkor30** · 03-07-2012 10:52 PM

المشاركة الأصلية كتبت بواسطة m.osama

هوا مش الكيمو كونو ده من كام سنه كان بجنيه ونص ! دا وانا صغير كنا بنجيب الاربعه ب 3 جنيه :d :d

مظبووووط وكمان كانت كل واحدة تكسب واحدة مجانا صح؟؟ ههههههههه

**karkor30** · 03-07-2012 10:53 PM

المشاركة الأصلية كتبت بواسطة hamdy916

بجد موضوع مفيد جدا وياريت كل الناس تعمل كده

الف شكر يا حمدى

**karkor30** · 03-07-2012 11:08 PM

غريبة يعنى يعنى كله مركز فى الكيمو كونو ومحدش قاللى الاسعار دى كويسة ولا غالية ولا معقولة ولا الراجل اللى انا اشتريت من عنده ده كويس ولا لأ

امال هتعملوا ايه لما تعرفوا انى ضربت ساندوتش من عند ماكدونالدز اللى فى بنزينة شل التجمع

المهم نرجع بعقارب الساعة لورا شوية قبل الساندوتش يعنى الساعة 3 روحت للميكانيكى فى المقطم وقبل ما يبدا شغل لقيت مايه جاية من تحت المتور بصينا عليها لقينا ماسورة خلف المتور واسفل الجزء العلوى رجعت للراجل اللى فى مدينة نصر بتاكسى طبعا اشتريتها ورجعت وسعرها 300 جنيه ودى صور الماسورة القديمة

وقاللى هى دى السبب فى نقصان المياه من القربة لان هى دى اللى بتوصل المياه للمتور وبعد ما قاللى هاسيب العربية وارجع اخدها بكرة قام اشتغل فيها هو والصبى اللى معاه وخلصوها وقفلوها على الساعة 6 ونص تقريبا والحمد لله مظبوطة وميت فل و 14

وفى الاخر اخد منى 200 جنيه

وبعدين طلعت على بنزينة شل غيرت زيت وفلتر ودخلت غسلت المتور كار كير ب 30 جنيه وهتابع المياه بقى وهاشوف هتنقص تانى ولا لا وبرضه هشوف هيبقى فيه رشح زيت تانى ولا خلاص

وهنا وصلنا للنهاية بعد ماغسلت العربية ضربت الساندوتش اللى قولت عليه قى اول الموضوع معلش كل مرة لازم اكل حاجة لانى بره البيت من 6 ونص الصبح