مستشفى الدعاة

**sherif222** · 03-07-2012 03:29 PM

السلام عليكم ... انا ساكن فى المعادى وعايز اروح مستشفى الدعاة ومش عارف هيا فين بس متهيالى انها فى مصر الجديدة . فأرجو من يعرف يدلنى على الطريق وبالتفصيل لو سمحتوا ... اشكركم جميعا

**mohamed_selim** · 03-07-2012 04:40 PM

ايوه فى مصر الجديده قريب من ميدان هليوبوليس و مستشفى هليوبوليس و ميدان تريومف و لازق فى نادى الغابه...
وانت جاى من المعادى لو هتيجى من صلاح سالم تكمل لحد الميريديان و ماتطلعش كوبرى الجلاء و من تحته تخش يمين و يوترن فى يمين فى يوترن هتلاقى نادى الجلاء على يمينك و هتعدى من تحت الكوبرى و طوالى هتوصل ميدان تريمف هتلف 3\4 لفه و تخش يمين (اليمين اللى بعد جاد) و تمشى شويه هتلاقى جامع كبير و كنيسه كبيره و فى تقاطع تخش يمين و تمشى شويه هتلاقى المستشفى على شمالك

لو هتيجى من ناحية ميدان روكسى تخلى سينما روكسى على يمينك و تمشى فى اتجاه ميدان المحكمه و تعدى ميدان المحكمه و هتمشى تلاقى ميدان هليوبوليس بعده و المستشفى على يمينك تخش يمين مع سور المستشفى هتوصل لميدان صغير و فيه جامع هتكمل طوالى (الجامع على يمينك) هتلاقى المستشفى بعد الجامع على طول على اليمين

لو هتيجى دائرى تعدى ال JW mariot و تعدى فوق طريق السويس و تنزل النزله اليمين هتلف بيك فى اتجاه القاهره تكمل طوالى هتلاقى كوبرى تطلعه و تمشى شويه هتلاقى فوقك كوبرى بالعرض و اول ما تعدى من تحته مطار الماظه على يمينك تخش يمين مع سور المطار و تفضل طوالى هتعدى على مستشفى مصر للطيران و بعديها نادى الجلاء و الكوبرى بتاع صلاح سالم فوقك تعدى من تحته و و طوالى هتوصل ميدان تريمف هتلف 3\4 لفه و تخش يمين (اليمين اللى بعد جاد) و تمشى شويه هتلاقى جامع كبير و كنيسه كبيره و فى تقاطع تخش يمين و تمشى شويه هتلاقى المستشفى على شمالك (زى الوصفه الاولى بالظبط)

**sherif222** · 03-07-2012 10:43 PM

اشكرك

**_hema** · 15-07-2012 10:24 PM

مستشفى الدعاه خلف مستشفى هليوبوليس بمسافه سير قليله جدا وبالقرب من نادى الغابه

لو حضرتك قدرت توصل لمستشفى هليوبوليس تبقى وصلت لمستشفى الدعاه

لو حضرتك جاى من المعادى كورنيش هتكمل فى الكورنيش لغايه المتحف المصرى وتطلع كوبرى اكتوبراتجاه غمره وتظل سائراً حتى تصل الى نزله صلاح سالم اتجاه المطار وتمضى حضرتك فى صلاح سالم لغايه كوبرى نادى الجلاء ( نادى ضباط الجيش) ويمين مع يوترن شمال وهتعدى من تحت الكوبرى اتجاه المحكمه وعند محكمه مصر الجديده تدخل يمين وبعد مسافه سير قصيره ستكون مستشفى هليوبوليس على يمينك ادخل من جنيها يمين وكمل على طول وخلى بالك ان ورا المستشفى شارع فى الخلف لاتدخله وتكمل لغايه الجامع على اليمين مستشفى الدعاه بعد الجامع بقليل

اما لو حضرتك جاى اتوستراد كمل لغايه ميدان رابعه وادخل شمال من الميدان فى شارع الطيران وكمل فيه الى اخره حتى تجد نفق الطيران على شمالك فلا تدخله وخلى بالك فيه مطب معمول جديد قبل النفق وخليك فى اليمين لحد ماتدخل صلاح سالم يمين وتكمل فيه لغايه نادي الجلاء وتابع باقى رحلتك بالسلامه

انا حاولت فى وصفى ان تكون الطرق رئيسيه ومعروفه وسهل الوصول الهيا لان الشوارع فى مصر الجديده لو حضرتك مش عارفها كويس ممكن تتوه فيها

والطريق للمستشفى له الف طريق ممكن ان تصل اليها من طرق كثيره ولكن كما اوضحت لحضرتك حاولت ان اصف طرق رئيسيه معروفه

لك تحياتى