الموضوع: و هكذا عاد الآيفون .... الشرطة و الشعب ايد واحدة

الموضوع منقول :)


لازم تقرا علشان لو الايفون اتسرق ازاى ترجعه فى نص ساعة

عندما يعود موبايلك المسروق في ساعة واحدة ! ابل والشرطة والشعب ايد واحدة !

النهاردة حصلي موقف غريب جدا...وانا راجع في عربيتي ومعايا عمرو زميلي الجديد من شغلي في شبرا الخيمة عند كوبري عرابي مرة واحدة لقيت حد بيخبط ع العربية من ورا ..ببص في المرايا لقيت واحد شكله غلط وعمال يزعق مش تحاسب وخبطني في رجلي وقطعتلي الشبشب وبتاع! ياعم انا لمستك؟ طب معلش وحقك عليا..هوب لسه همشي لقيت حد بموتسيكل عدا من جنبي وبيقولي يا استاذ وانت بتكلم الواد في واحد مد ايده في العربية!! ببص طبعا مالقيش الموبايلين بتوعي ..طبعا الحمد لله بس هتجنن مش مشكلة النوكيا لكن الاي فون الفور ..وا ايفونااااااه
المهم طبعا اول حاجة جت في بالي البرنامج بتاع الايفون اللي الحمد لله اني مأكتفه بتاع اعثر علي اي فوني (find my iphone) ..البرنامج باختصار عن طريقه بتخش بيوزر نيم وباسورد بتوعك على موقع بتاع ابل على النت فبيجبلك خريطة جوجل ويجيبلك موبيلك فين بالضبط وف اي شارع كمان وييتحرك معاه ((: وتقدر تبعت رسايل للموبايل او تعمله لوك او تمسح الداتا من عيله ..وكله من على الموقع
والحمد لله عمرو زميلي كان معاه اللاب بتاعه واليو اس بي ..ودخلت فعلا وشوفت مكانه ع الخريطة وكانوا لسه في شبرا قريب من مكان السرقة
نسيت اقول اني كمان مسطب برنامج لما حد يحط باسورد بتاعت فتح الجهاز غلط الموبايل اتوماتيك بيصوره بالكاميرا الامامية ويبعتلي صورته عل الايميل بتاعي (:..فدخلت على ايميلي فعلا لقيت البرنامج باعتلي اول صورتين الجمال اللي فوق للاشكال اللطيفة اللي انتوا شايفينه دي
قشطة جدا طب اعمل ايه ..اتصل بيهم اشتغلهم ولا ..المهم عمرو ربنا يكرمه
قاللي دا فيه قسم جنبينا هنا (قسم اول شبرا الخيمة) ..قولتله صح كده يلا بينا ع القسم وربنا يستر ونلاق خد يفهمنا ويهتم بينا!
دخلنا القسم بالاب ..يجماعة اتسرق موبايلي وانا معايا صور اللي سرقه وعارف مكانه فين كمان...ايه بتقول ايه؟ طب اتفضل اتفضل ع الباشا ضابط المباحث ..دخلت للضابط شاب محترم جدا(النقيب احمد ناصف) ..اتفضلوا شرحتلوا الموضوع انبهر طبعا هو والامناء والمخبرين ..طب ورينا الصور..هوب راح امين شرطة عرف الواد اللي فوق ع الشمال ده وقاللي ده محمد اسماعيل صاحب محل موبيلات جنبينا..الضابط قالهم طب اطلعوا عليه ..واحنا هنتابع هنا ع الخريطة تحرك الموبايل ف شارع ايه...مفيش ربع ساعة بنكلمهم ..تمام ياباشا الموبايلين معانا...احمدك يااااارب ...طبعا الواد صاحب المحل قالهم دول باعهولي ومشيوا وبتاع بس الضابط قالهم مليش في الحوار ده ..وخلاني اعمل محضر وطبعنا صورهم مرفقة مع المحضر وهيتعملهم ضبط واحضار كلهم ...والحمد لله رجعلي اي فوني حبيبي ...وتحيا ابل ..وتحيا الشرطة (:

طبعا مايفعش بعد ده كله ما اشكرش هشام يوسف النجم عبقري الاي فون اللي علمني وسطبلي البرامج دي..وعمرو زميلي الجديد اللي حبيت اعمل معاه واجب واوصله بدل مايركب مواصلات فاتأخر اكتر من ٣ ساعات !