حاسس بإكتئاب و وخنقه وحزن .. محتاج علاج

**DreAmO** · 03-07-2012 04:58 PM

عندي إكتئاب وحزن وخنقه ملازمني بقالهم سنين تقريباً

بس بتيجي فترات والحكايه دي تخف شويه وتزيد شويه

زي اليومين دول .. عايش أفضل مراحل تألق الخنقه

موضوع النوم دة .. انا شبه مابنمش بجد .. ودة من زمااااااااااان جدا جدا

يعني اني انام اكتر من 6 ساعات .. او اتهنى بساعتين بس نوم عميق .. دة حلم بالنسبالي مش عايز يتحقق

المهم علشان انا نفسي مسدوده عن الاكل والشغل واي نشاط

عايز علاج اصرفه من الصيدليه بدون روشته .. اي بتنجان يطلعني من الحاله دي

وبنفس الوقت ماتعودش عليه

**m7mda7md** · 03-07-2012 05:46 PM

حاول تتخلص من السبب و لا يفضل اطلاقا الاتجاه الي ادويه الموود ... ربنا يكفيك شرها

**ahmad--ezzat** · 03-07-2012 05:59 PM

انت متجوز؟؟؟

حالك ايه مع ربنا
استعيز بالله ولازم الاستغفار واكثر من الصلاه علي النبي لو كنت مسلم

حاول تفضفض بستمرار مع حد مقرب ليك

**Screenplays** · 03-07-2012 08:39 PM

الحال من بعضه يا ريس بس حالتي اخف شويه ... الحمد لله علي كل حال

**mahmoud1973** · 03-07-2012 08:49 PM

سبحان الله . انا كمان نفس الحال بس ده حصل من بعد وفاة والدى من شهرين بالظبط و الحمد لله على كل حال بس بجد شاي الدنيا قلبت ضلمة خالص . انا طالع عمرة الاسبوع الجاى على امل تغير الاحوال باذن الله و هادعى للجميع ان شاء الله

**micromoud** · 03-07-2012 09:06 PM

روح لدكتور نفسى صدقنى دا انسب حل

**3mr Farrag** · 03-07-2012 11:01 PM

فكك من الادويه و الدكاتره النفسيه كله كلام فاضي
حاول تغير مودك بنفسك ...و انا عارف انه مش دايما هتعرف تغير مودك بمزاجك
لأن مود القرف ده بيجي بسبب حاجات عايز تغيرها في نفسك و مش عارف
و اسباب خارجيه خارج عن ارادتك محيطه بيك من قرف في احوال الدنيا
بس حاول تغير اي حاجه ...

**totaa** · 04-07-2012 01:05 AM

إبعد عن اي مهدئات وأى عقاقير لأنها ممكن تهديك شوية لكن جسمك هيتعود عليها وبعد كدة مش هتأثر فيك خالص ويمكن يكون ليها آثار جانبية وتدخل نفسك فى مشاكل انت فى غنى عنها ...

تانى حاجة.. (ألا بذكر الله تطمئن القلوب) من فترة مش بعيدة حسيت نفس الاحساس
لدرجة انى مش كنت بتكلم مع جنس مخلوق ..وأنا لما نفسيتي بتتعب بنام كتير بس مش نوم عميق وعشان كدة كنت بصدع.....فكنت بحاول اكتب لكن حتى الكتابة كرهتها ..
فلما سالت واحدة هنا محفظة للقرآن كانت اجابتها كالاتي:ـ
المواظبة على الصلاة.... سماع القرآن الكريم....ذكر الله
وأكثر من الاستغفار وقول لا حول ولا قوة الا بالله.. تفتكر إنت لما تكون فى معية ربنا بالشكل ده
هل هيصيبك هم؟ أو حزن؟ بالعكس هتحس بارتياح غير عادي واسمع كدة معايا :ـ

اطمئني يا قلوب..
بذكر علام الغيوب..
ولتخضعي في النداء..
في الشروق وفي الغروب..
ولتسلكي خير الدروب ..
ولتذكري رب السماء..
ذكراً كثيراً في الرخاء..
لتسلمي هول الخطوب..
وما أصابك من بلاء..
ففيه تكفير الذنوب..
ولتحذري درب الشقاء..
ففيه والله العناء..
ولتستري كل العيوب..
لا تبالي حينما ..تبكي العيون على الذنوب..
أما علمت بأنه..
ثمار ذكرك للرحيم..
( ضياء قلبٍ..وسعة عيشٍ..وتفريجٍ للكروب..)
وبه الدواء لكل داء..وبه شفاء للسقيم..
وهو السبيل إلى النجاة..وهو الطريق المستقيم..
.... سبق المفردون ..فسابقي نحو الكريم ....
واشتري الجنات بالذكر العظيم..
لا يكن حظك منه..
كحظ مسكين عقيم..
وربنا يفرج همك ..ويسر خاطرك وبالك..ويريح صدرك من أى كرب ومن أى حزن
بالله كلامي ليس مجرد كلام ولكن عن تجربة...
كمان فيه حاجة مهمة جدا (( إنك تحط ايدك على السبب الاساسي للحالة دي ))
إنك تغير نظام حياتك وروتين يومك..إنك تخرج للدنيا وتشوف اصحابك..إنك تعمل حاجة جديدة
وإن شاء الله هيتبدل الحزن لفرح ....احترامي

توتاااااااااا

**egyptiandiver** · 04-07-2012 01:38 AM

تخلص من السبب في المشكلة دي ...ربنا سبحانه و تعالى خلق الدنيا دي و حط فيها قانون اسمو السنن الرواتب، يعني الانسان يمشي ورى السبب و إن شاء الله لازم ربنا يكرم بالنتيجة. ربنا يصلحلنا و يصلحلك الحال إن شاء الله. تقبل تحياتي - أخوك أحمد سامي

**samyyousef** · 04-07-2012 02:01 AM

لتعلم أن حالك أفضل من غيرك و تحمد الله
حاول الا تدخل الى الفراش الا و عندك رغبة اكيده في النوم
حاول ان تمشي ساعة في مكان مفتوح
ابتعد عن كل انواع الكافيين
لا تدخن