استفتاء بتركن فى أى مكان فاضى تلاقيه فى الشارع ؟؟

**Mohamed.Fawzy** · 22-06-2008 04:19 PM

انا حبيت أعمل الأستفتاء ده بعد ما حصلى موقف غريب جدا هحكيلكو عليه :
امبارح كان عندى ميعاد عند الدكتور و مكانه فى شارع عباس العقاد المهم أخدت مراتى و بنتى وروحنا للدكتور و قلنا نتغدى بره بالمره و فعلا دخلنا مطعم فى شارع متفرع من عباس العقاد و قعدت ادور على ركنه مش لاقى خالص لغايه ما لقيت ركنه فاضيه تحت أحد المنازل المهم اتغدينا ومأخدناش اكتر من 35 دقيقه تقريبا المهم ذهبنا للسياره لقيت عربيه مرسيدس قديمه واقفه قدامها ونازل منها راجل سنه يقترب من الستين ابيض الشعر كبييييير الكرش و دار بيننا هذا الحوار :
انا : السلام عليكم
هو : مردش
انا : بعد اذن حضرتك ممكن تطلعنى
هو : و لو مطلعتكش هتعملى ايه يعنى
انا : مش هعمل لحضرتك حاجه بس حضرتك مش عايز تطلعنى ليه هو انا عملت لك
حاجه
هو: ايوه عملتلى انا بقالى ساعه طالع ----- أمى بلف بعربيتى علشان اركن قدام
بيتى و مش لاقى مكان
أنا : بداءت اتنرفز و صوتى يعلى و عرفت انه راجل مش محترم فقلتله طب وأنا
مالى هو المكان مكتوب عليه اسمك وبعدين لو مش عايز حد يركن مكانك متحط
جنزير :boxing_smiley:
هو : ممنوع
انا : يبقى انت بتناقض نفسك منين ممنوع و منين عايز تحتكر المكان ليك
هو : الناس كلها عارفه ان كل السكان عندها عربيات ومش مفروض تركن هنا
انا : صلى على النبى يا حاج انتا شايف انا معايا مراتى و بنتى و الموضوع بسيط
هو : صلى عليه انتا
أنا : يا حاج انا معملتيش جريمه و مافيش قانون يديك الحق تحتكر المكان ليك
هو : انت هتعلمنى الأدب طب ورينى بقى هتطلع أزاى وراح واخد بعضه و داخل العماره
المهم انا مارديتش امسك فيه علشان راجل كبيير و معايا مراتى و بنتى و الناس بدأت تخرج من البلكونات علشان الصوت العالى المهم قلتله أنا هاوريك هخرج ازاى
و مسيكت الموبايل علشان أطلب النجده لقيت واحده ست فى اعماره واقفه فى البلكونه و بتنده عليا يا استاذ ثانيه واحده و كان واضح انها قريبته المهم قلتلها يا ستى انا ما عملتلوش حاجه كل اللى عملته انى قلتله خرجنى قالتلى انا عارفه
المهم قعدت فى عربيتى فسمعت صوته من فوق بيجعر و يزعق وبعد دقيقه لقيت مراته و بنته نازلين علشان يرجعوا عربيته علشان اعرف اطلع و ساعنها اتأكدت ان الراجل ده مش محترم خالص و تقريبا فى عنده ربع ضارب و أهله عارفين كده
انا دلوقتى عايز أعرف هل انا غلطان ولا صح
و انتو لو مكانى فى الموقف ده كنتو عملتوا ايه ؟

**Abo_Lina** · 22-06-2008 04:27 PM

مش غلطان طبعا و كمان احييك على طول بالك في التعامل مع هذا الشخص ابيض الشعر كبير الكرش عريض المنكعين شلولخ..
ده مريض نفسي يعني قاعد جوه العربية مستنيك عشان يعمل الهبل ده..
60 سنة و لسه مانضجش..ربنا يكون ف عون مراته و بنته..

**MaiKY** · 22-06-2008 04:29 PM

أنا لو مكانك و قالي شوف بقة هتطلع ازاي ، والله لأكسرلة ازاز العربية و انزل الهاند و ارميلو العربية في نص الشارع

و هو الجاني علي نفسة

**ASD peugeot** · 22-06-2008 04:30 PM

لو حصلي الموقف بتاع حضرتك
هسايس الراجل وهحترمه لان السن له حكمه و انا من الناس اللي بتحترم كبر السن جدا
بس ممكن يكون كان عصبي او حاجه مضيقاه بس وكانت ظروفك انت كده

**memo_hefnawy** · 22-06-2008 04:40 PM

تصرفك سليم و أحييك على هدوئك و تمالك أعصابك

أبسط حاجة تعملها تركب مراتك و بنتك تاكس أو تقعدهم فى أى كافيه أو أى مكان و تخرج تجيب من أقرب مكان عربية نص نقل أو ونش و تديله 100 جنيه و تخليه يقطر العربية يرميها فى أى داهيه و يبقى يدور عليها و من غير خناق ولا كلام أنا كنت هاسيبه يهوهو و أنفذ إللى قولتلك عليه و يخبط راسه فى الحيط

**AhmedElsayed** · 22-06-2008 05:08 PM

الموضوع ده مهم اوى
وناس كتير شايفة ان مش من حق حد يركن قدام بيتها
طيب لو كل واحد فى الدنيا قالك محدش يركن قدام بيتى
اومال لو انا طلعت فى اى مشوار اركن فيييييييييييييييييييييييي ييييييييييييييييييييييين

**mohamed2002** · 22-06-2008 05:14 PM

تصرف سليم جدااا وكويس انك بالك طويل

**Ahmed Selim** · 22-06-2008 05:15 PM

المشاركة الأصلية كتبت بواسطة Tyler_Durden

شلولخ..

بجد مقدرتش أمسك نفسى من الضحك و أنا قاعد فى الشغل وسط الناس

الله يجازيك يا تايلر :)

**Xpert** · 22-06-2008 07:31 PM

وده السبب الرئيسي اني مابنزلش القاهره بعربيه ....او بمعني اصح مابنزلش القاهره اساسا ُ..
i have a bad temper و ممكن حاجه زي كده يكون حلها عندي اصدرله الاكصدام في عربيته و ازقهاله و امشي انا demolition derby style .. او بقي اتصل بالنجده و استعمل نفوذي (اجنبي بقي و جنسيه اجنبيه و افضل وراه لحد ما اسلمله عربيته في القسم)....

مشاهدة نتائج الإستطلاع: هل من حق اى شخص احتكار مكان ليه فى الشارع و محدش يقدر يركن فيه غيره ؟

الموضوع: استفتاء بتركن فى أى مكان فاضى تلاقيه فى الشارع ؟؟

LinkBack

أدوات الموضوع

عرض

-

-

-

-

المواضيع المتشابهه

استفتاء بتركن في الشارع ولا في جراج و بكام؟؟

ياريت الناس تخلى بالها وهيا بتركن فى اى مكان

بتركن عربيتك فى جراج ولا بتسيبها مرمية فى الشارع؟؟؟؟؟؟

استفتاء على مكان مقابلة شهر نوفمبر

استفتاء علي مكان المقابلة القادمة

الكلمات الدلالية لهذا الموضوع

المفضلات

المفضلات

ضوابط المشاركة