بفكر فى مشروع مصرى 100% و أستيراد بس محدش يفكرنى مجنونه
فى يوم من الأيام حسيت أن العالم كله فيه سيدات نجحت جدا لدرجة إنها وصلت لحكم دول كبيرة طبعا أنا طموحى مش كدة طبعا :brn: أنا طموحى أغرب من كدة بكتير
على طول لما بنسمع أن فيه مصنع كبير بيبقى دايما لصاحبة (راجل)
طيب فيها أية لو فيه مصنع لصاحبتة (واحدة) و بالأخص لما تكون صغيرة فى السن و أهى تجربة نفعت نفعت منفعتش أكيد مش هتخسر
التجربه هيا فى الحالتين سواء الأنتاج المصرى أو الأستيراد هو (ملابس رجالى) :wink:
أو بمعنى أصح قمصان فقــط من باب التخصص برضة و طبعا مع المتابعة و البحث هتظهر موديلات جديدة ممكن تتقلد أو تتطور
زى مابنشوف ماركات عالمية متخصصة فى الكوتشى أو البوت أو الحاجات دى
و هشرحلكم الموضوع بالشكل المبدئى إلى حطيتة فى دماغى
الأنتاج المصرى
دة هيكون عبارة عن خط أنتاج مكون من 5 أفراد على سبيل المثال
لازم يكونوا فاهمين فى تفصيل القميص من البدايه للنهايه يعنى من أول التقطيع لحد الأوفر و العراوى و طبعا لازم نحط أنه Made In Egypt و طبعا التصميم هيفرق كتير أوى فى أنه يخلى صورة المنتج المصرى كويسة دا غير طبعا الفنيش و السعر هينافس كتير جدا المستورد
هيتم أنتاج 15 قميص من اللون و الشكل دة (على أساس أنه قريب من 1 بيس و تبقى ماركة مميزة فى يوم من الأيام)
و طبعا طاقة الأنتاج اليوميه هتوصل لرقم كويس لسبب واحد بس
أن العامل هيتحاسب على القطعة الكاملة و دى هتديله تحفيز عشان ينتج أكتر
طبعا الأحتياجات ممكن تكون أرض فى منطقة جديدة و أسعارها رخيصة + سور على الأرض + مبنى مكون من دور أرضى و فيه المرافق أو دورين و الأرضى يكون زى معرض للمنتجات و الأول المصنع + وسيلة مواصلات للعمال + المعدات و الماكينات + إلى أصعب من دة كله التراخيص و رضا الحكومة
الأستيراد
ممكن بالأضافة مع الأنتاج المصرى يتم أستيراد أكسسوارات زى الأحزمة و البوتات و البنطلونات من مواقع على النت و تتشحن و تدخل مصر و لكن دا طبعا بعد مايثبت الأنتاج المصرى نفسه فى الأول و بعد كدة يتعمل فرع فى منطقة حيوية
شايفين فى كلامى دة هزار ولا أمل زايد عن اللزوم ولا شئ كويس ؟
و التكلفة المبدئية لمشروع زى دة أية ؟
