الموضوع: حدث معي في التوكيل

السلام عليكم:
انا معايا تيجو 2010 2000سي سي وضماني يخلص ان شاء الله اكتوبر الجاي
انا مش بمشي بيها كتير عامل 20000كم بس
المهم:
كنت بعمل صيانة من سنة زيت وفلتر وكان في صوت من الشكمان وساعتها قالولي مش كل الشكمان بيدخل في الضمان هنشوف ونقولك...طبعا ساعتها الفار لعب في عبي وقلت هيلبسوني الموضوع إلا انهم بعد الكشف قالولي دي العلبة الوسطانية وهتدخل ضمان وفعلا غيروها....مرت سنة ورحت من شهر كدة صيانة كبيرة شوية زيوت وفلاتر وبوجيهات وتيل فرامل وسير الكاتينة...بالصدفة قبلها بيومين الشكمان رجع يعمل نفس الصوت فلما رحت الصيانة قلتلهم عليه رد علي مهندس الأستقبال وقالي ان مدة ضمان اي قطعة غيار تم تغييرها عندهم هو 20000كم او 6شهور ايهما اقرب طبعا نا استنكرت ده فقالي هيخليهم في الورشة يكشفوا
ويردوا رد نهائي ضمان ولا لأ
المهم:بعد فترة ردوا وقالوا هيعملوها ضمان بردو لكن القطعة مش موجودة دلوقتي واتابع بعد اسبوع....لما العربية خرجت لقيتهم عملوا المطلوب ما عدا التيل لأنهم كشفوا ولقوه كويس وسير الكاتينة انا مرضتش اعمله اصلا دلوقتي
مر اسبوع واسبوع واسبوع وانا بتابع لكن القطعة ماجاتش....ولأني المفروض اسافر بالعربية ومش معقول امشي بيها كدة فرحت رايح التوكيل(ابو رواش) وقلتلهم عاوز اقابل مدير المركز....الحقيقة ولاد الحلال دلوني على مهندس محترم وطيب كان مدير خدمة العملاء حكيت له الوضع والظروف فأتصل بالمخزن قالوله في واحدة بس....دخلت العربية وخلال ساعتين خلصت الحاجة ومشيت بعد ما شكرته
السؤال:برغم الكلام الكتير عن انهم وحشين وانهم كتوكيل مش قد كدة لكن الموقف ده وغيره خلاني اشوف العكس ليه؟
اولا كان ممكن يقولوا انها مش ضمان
ثانيا كان ممكن المرة التانية يتمسكوا بموضوع ال6 اشهر ويعملوها على حسابي علما بأنها تمنها عندهم 427ج
ثالثا كان ممكن يفضلوا يقولوا القطعة ناقصة لحد الضمان ما ينتهي
رابعا لو عاوزين يفتحوا شغل كان ممكن يغيروا التيل وهو فعلا مفروض يتغير في الأتوماتيك على 20000كم لكن قالوا كويس وسابوه
خامسا: تحليلي ده صح ولا انا طيب زيادة عن اللزوم ولا المسألة حسب الشخص اللي بتقابله هناك وللا ايه؟؟؟؟؟ ايه آرائكم
الحاجة الوحيدة اللي خرجت بيها من خبرة معاملة معاهم سنتين تقريبا هي المبالغة في الأسعار في بعض الحاجات لذلك بعد الضمان ان شاء الله ناوي اعمل برة الحاجات العادية وربنا يستر وما احتاجش لحاجة اكبر

م.ياسر

انا عملت تصويت نص نص بس مقصدش منه ان خدمتهم نص نص ولكن لان الخدمة هناك لاحظت انها بترجع لاكتر من حاجة:

1. اليوم اللى انت رايح فيه زحمة ولا فاضى .. لو فاضى بيدولك حقك والخدمة تكون ممتازة انما لو زحمة بتكون خلطبيطة
2. سوء التنظيم فى التوكيل ولكن فى اخر صيانة ليا من 3 شهور لاحظت انهم غيروا النظام فى الاستقبال خالص والموضوع بقى ارقى
3. المهندس اللى بيتسقبلك .. بدون ذكر اسماء كلهم هناك ممتازين واخلاق فيما عدا مهندس واحد مش هقول اسمه انا مش بقبله لله فى لله لان عملت معاه صيانة اول الف وكان زبالة بصراحة لا عجبنى طريقته فى التعامل ولا شخصيته اساسا

أعتقد أسوأ حاجة فى التوكيل هو عدم توافر قطع الغيار لشهور .. مثلا انا احتاجت بلى بطاحات على الضمان اتغير بعد 6 شهور! حاليا منتظر ماستر دبرياج علوى محجوز من شهر يناير اللى فات ولسه لو يتوفر!
وجهة نظرى فى الموضوع هو ان افرض ان عربيتك محتاجة قطعة غيار ضرورية عشان تقدر تمشى بيها ومتكونش موجودة لشهور يعنى تفضل راكن العربية مثلا شىء مش منطقى بالمرة!

غير كده اعتقد انهم كتوكيل اداؤهم جيد انا مشوفتش منهم حاجة وحشة غير بس عدم توافر قطع الغيار

تحياتى للجميع