الموضوع: الزحمه الرهيبه اليومين دول

معقولة مفيش مرور ده المفروض ان في خطة لحل ازمة المرور
ربنا يستر وميكنش عند مع الرئيس
لحسن الداخلية من بعد الثورة اتجننت خلاص على الاخر
بس انا ارجح نظرية ان الناس نزلت تجيب حاجه رمضان خصوصا ان الثانوية العامة
لسه مخلصة فالدنيا مكربسة

المرور موجود في ميدان العتبه لكن لحد الساعه 8 بعد كده وسط البلد كله لفيته امبارح مافيهوش عسكري , وصلاح سالم مافيهوش عسكري مرور , وشارع زاكر حسين في مدينه نصر مافيهوش مرور .
ربنا يعديها على خير

عساكر المرور على الاشارات مش دايماً موجودين يعني مثلاً طريق اعدي منه وانا رايح الاقي اجي راجع ملاقيش عسكري
فيها ايه لو كلفوا نفسهم شوية من فلوسنا الي بندفعها ضريبة للعربية وجمارك والذي منه واشتروا اشارات بكاميرات في كل حته بدال الراجل الي بيقف فالشمس زي اي بلد متحضرة
ولا بلاش اشارات كهربا يركبوا الاول عمدان نور في الاماكن العتمه ويحطوا حواجز عاليه شوية بين الطريقين علشان الناس متتعميش من نور بعض
ولا بلاش ده وده يصلحوا الطرق الي مابتخلاش من النقر والبلاعات والمطبات العشوائيه الي بتخلي الواحد باصص عالارض اكتر ما بيبص قدامه
او يسيبوا النقر والمطبات ويشوفوا سواقين المكروباصات والميني باص وحتى اوتوبيسات النقل العام وهي بتحمل من نص الطريق وتقف عالشمال كمان
ولا خلاص سيبكم من ده كله يشوفوا حل للركنات في الشوارع بدال ما الشارع يكون 3 حارات والناس راكنه صفين والشارع ماشي حاره واحده ويعطل الدنيا
او يشوفوا الناس الي اي باركنج يقوموا راصين فيه كراسي ويعملوه قهوة ويادوب يسيبوا فيه مكان لكام عربية من عربيات الزباين
ولا البياعين الي بعربيات ويقفوا يبيعوا فالشارع
ولا الناس الي بتسوق عربيات موديل 1800 وتعطل ويقفوا يصلحوها فنص الشارع المفروض في احلال يراعوا فيه ظروف صاحب العربية

او عالاقل يشوفوا حل للرخص الي بتطلع بالحب من المرور ويجي الواحد من دول ياخد الرخصة ويمشي يتعلم فالشارع ولا هو فاهم اشارات ولا علامات ولا اي حاجه

كل الحاجات دي نتيجة سنين من الجهل والاهمال وعدم التخطيط
والله ربنا يكون في عون الريس والحكومة في مواجهة كل ده وعلى حد قولهم انه خلال 100 يوم هتحصل حاجات كتير كويسه للمرور وادينا مستنيين