صوت تزييق مش عارف سببه إيه .. و انا مسافر

**hotbird2271980** · 05-07-2012 10:55 AM

السلام عليكم جميعا .. عندى صوت تزييق بصفارة ( كأنى رافع اليد و ماشى عليها ) فى العربية مش عارف سببه إيه .. انا بقالى اسبوع بحاول اظبط العربية عشان مسافر ( ميكانيكا .. كهربا .. عفشة ) العربية بقت تمام لكن صوت التزييق ده مقلق و مجننى .. بتاع الزوايا قاللى روح زيت العفشة و خصوصا البطاحات .. روحت لبتاع العفشة قاللى ده صوت التيل بيحك فى الطنابير و عموما هزيتلك العفشة يمكن الصوت يروح .. و للأسف الصوت ما راحش .. هقولكم انا عملت إيه الاسبوع اللى فات يمكن يكون فى حاجة من اللى انا عملتها هى السبب :
- تغيير سير الدينامو و تغيير قاعدة الفتيس .
- تغيير أربع جنوط و عجلتين أمامى .
- ضبط زوايا و ترصيص و تربيط عفشة .
أرجوكم أفيدونى لأنى على سفر و قلقان جدا .. هل فعلا ممكن يكون التيل هو السبب .. منتظر ردودكم.

**mado83** · 05-07-2012 11:08 AM

غالبا ده بلى العجل
ارفع العربيه على الكوريك عجله عجله ولف العجل وشوف الصوت من انهى عجله وخلى الميكانيكى يغيرهالك لانك مش هتعرف

**hotbird2271980** · 05-07-2012 12:05 PM

المشاركة الأصلية كتبت بواسطة mado83

غالبا ده بلى العجل
ارفع العربيه على الكوريك عجله عجله ولف العجل وشوف الصوت من انهى عجله وخلى الميكانيكى يغيرهالك لانك مش هتعرف

جزيل الشكر لك أخى الكريم على سرعة الرد .. النهارده ان شاء الله هاروح للميكانيكى تانى و اقوللو على المشكلة .. و يارب الصوت يروح قبل ما اسافر عشان اكون مطمئن .. دعواتكم .

**amrelsaqqa** · 05-07-2012 12:19 PM

لو التيل يبقى الصوت هيروح بمجرد ما تدوس على الفرامل

بس انت ما قلتش اتجاه الصوت جاى منين
يعنى على اليمين ولا الشمال ولا قدام وخلاص ولا ورا ولا ايه ؟

**hotbird2271980** · 05-07-2012 12:37 PM

المشاركة الأصلية كتبت بواسطة amrelsaqqa

لو التيل يبقى الصوت هيروح بمجرد ما تدوس على الفرامل

بس انت ما قلتش اتجاه الصوت جاى منين
يعنى على اليمين ولا الشمال ولا قدام وخلاص ولا ورا ولا ايه ؟

اشكرك على المتابعة .. بيتهيألى الصوت زى ما يكن مسمع فى العربية كلها من تحت مش قادر احدد اتجاهه بالظبط .. بس فى ملحوظة ان الصوت بيقل و ساعات بيختفى لما ادوس فرامل و بيكون واضح لما امسك دبرياج .