الموضوع: تقرير عن تركيب عازل حراري SunTek بمركز توبجير

السلام عليكم ورحمة الله وبركاته

أولا أحب أشكر كل أعضاء المنتدى سواء استفدت من مشاركاتهم أم لا على مدى أكثر من عامين منذ إشتراكي في المنتدى وفي الحقيقة تقريبا دة أول موضوع لي ممكن أفيد بيه الأعضاء بتقرير عن حاجة عملتها

ثانيا : التقرير

من بعد ما قريت موضوع العازل بتاع استاذ زلباني وانا عاجبني الموضوع ومقتنع إنه مفيد بس كنت مستني أجيب عربية بعد الاولانية، ومن تقارير الاعضاء عن تركيب الفيلم زادت ثقتي في المنتج فقررت أول ما جبت السيارة الجديدة اني أعمله فورا وعلطول كلمة استاذ زلباني وتفضل بتوجيهي لمهندس محمد فضالي صاحب مركز توب جير اللي إعلانه موجود في المنتدى بس أنا مش لاقي الموضوع ( ممكن حد يحطلي اللينك بتاعه)

اتفقت مع مهندس محمد على ميعاد التركيب وكان يوم السبت 28 ابريل اللي فات وبالفعل روحت في الميعاد وبعد ما صلينا الظهر وصل الفني أكرم وبدأ في التركيب وهو محترف إلى حد كبير وخلص في حدود 4 ساعات وفي منهم حوالي نص ساعة زيادة عشان بعد ما جهز الفيلم للزجاج الامامي شاله وعمل واحد جديد عشان لاحظ بعد العيوب الطفيفة فيه ( بصراحة اعجبت جدا بالحركة دي إنه من نفسه لو شاف حاجة مش مظبوطة بيعالجها أو يغير )

أنا مش هشرح عملية التركيب عشان بصراحة معنديش موهبة الكتابة وكمان نسيت لأن الموضوع عدا عليه أكتر من شهرين فأنا هكتب عن إنطباعي بعد تركيب الفيلم واعتقد هو ده اللي يهم الاعضاء الكرام

بعد التركيب محستش إن فيه عزل للضوء أو بمعنى أصح درجة التعتيم خفيفة لدرجة لا تلاحظ إلا لو كنت فاتح جزء من الزجاج ممكن تبان فرق درجة اللون واللي مائلة للاخضرار تقريبا بس خفيفة جدا

نيجي للاحساس بلسعة الشمس، دي بقى أحلى ميزة فيه وهي مربط الفرس، انسى انك تحس بلسعة الشمس الحارقة زي الاول، أخرك هتحس بشوية دفء في الجزء المعرض للشمس

لو العربية مركونة في الشمس كتير أول ما تركبها ممكن تتصدم وتحس انك دفعت فلوس في العازل على الفاضي عشان هتلاقي العربية صهد من جوة زي قبل تركيب العازل ودا تفسيره إن العربية وهي معرضة للشمس ومقفولة بتكتسب حرارة من كامل جسمها مش من الزجاج فقط، بس يكفي إن تفتح الإزاز 5 دقائق تهوي العربية كويس وتطلع الصهد اللي فيها وتبدأ تستمتع بتكييفك ومن غير لسعة الشمس المباشرة على الجسم

مش عارف أنا كدا غطيت جوانب الموضوع ولا لأ بس أنا مرحب بأي إستفسار أو سؤال من أي عضو فاضل

إعتذار خاص لمهندس محمد فضالي على التأخير في التقرير وبشكره جدا جدا على حسن استقباله لي ولذوقه معايا