في اول ايام الاسبوع وانا داخل مستشفى الجامعة بعربيتي الماروتي المتواضعة وجدت عربية فضية اللون ماركة فيات موديل 131 بس من الاخر بحالة المصنع وطلعت بتاعة الدكتور علي استاذنا في الجراحة وبما ان علاقتي طيبة بالدكتور علي وخصوصا انه راجل اجتماعي وحبوب لم اتردد لحظة في اني اعمل معاه لقاء مخصوص على عربيته وخصوصا انها ملفته جدا للنظر والعربية يا ساده مواصفاتها كالاتي
اللون بره وجوه بتاع المصنع فضي ميتالك ( لون غريب بالنسبه لعربية موديل 1984 )
الفرش من جوه اسود وللمفاجئة جلد طبيعي والراجل الحقيقة مأتخرش في انه يركب لها كسوة وفرش ارضية عشان يحافظ على الثروة القومية اللي فيها
اربع ابواب زجاج كهرباء ( المفروض اتنين بس قدام وعاده ورا زي ما احنا متعودين )
سنتر لوك
باور ستيرنج
جنوط سبور ( غريبة لموديل قديم )
مثبت سرعة في التابلوة
عداد ضغط زيت في التابلوه
اضائة التابلوه وازراره فيبر اوبتك
موتور 1600 اتنين كامة
تكييف فيريون ( ديب فريزر )
ردياتير المونيوم اربعه ماسورة
المروحة بتشتغل مباشر بسير مش زي المراوح العادية اللي بالكهرباء
الغرابة يا سادة ان العربية كلها شغل المصنع ومفيش ايد اتحطط فيها ودا لان الدكتور علي من كلامه كان مخللها والغريب ان فيه تعديلات احنا بنعملها بنفسنا زي المروحة المباشرة اللي استحالة تنزل من المصنع مع الفيات 131 وحاجات تانية كتير بس هو وضحلي انه لما كان بيحضر الدكتوراه بره كان فيه نظام منزلاه شركات السيارات وهوانك تحدد مواصافات عربيتك لنفسك على حسب ظروفك واحتياجاتك والشركة تعدل المواصفات دي زي ما انته محدد لها والغاوي بقه ينقط بتقيطه ومن هنا بقه زال اندهاشي بالعربية والتعديلات اللي فيها وطبعا لم اتردد في اني اخد المفاتيح منه واخوض تجربة القيادة بهذه السيارة التي اكن لها كل الاحترام والتقدير
العربية ناعمة جدا
بتسحب بشكل ملحوظ وده تقريبا بسبب الكامات
قفلت بيها الامبير والموتور مستريح
ثبات مفيش احسن من كده
العربية زي الوحش
مش عارف ليه عربيات جيدة زي الفيات 131 ليه ما يحدثوهاش ليه وينزلوها بشكل جديد بس طبعا مش زي الشاهين لان الشاهين محدثتش قوي في شكل الـ 131
صابر