خطوات نقل ملكية سيارة منطقة حرة بورسعيد ..... بالتفصيل
اخوانى ابناء شعب بورسعيد العظيم اعضاء منتدى نايل موتورز العظيم
لقد من الله علي بلدنا العظيم بور سعيد وعلينا بالمنطقة الحرة واصبحنا موضع غيرة وحسد للمحافظات الاخرى:breakpc2: ( موتوا بغيظكم) ومن اهم هذه المميزات السيارات المنطقة الحرة نتيجة اعفائها من الجمارك ولكن على رائى المثل - الى ميعرفش يقول عدس- الموضوع مش كله مميزات وبه بعض العيوب مثل سيارة واحدة فقط للعائلة و 90 يوم خارج البلد فقط طوال السنة
ولكن اهم مشكلة واسخفها هى مشكلة نقل الملكية
طبعا هى موضوعها طويل نتيجة البيروقراطية ونتيجة ان فى حد تانى مشاركك فى عربيتك - المحسودة- وهو [SIZE="5"]مصلحة جمارك بورسعيد[/SIZE وهو ده الى هشرحه باذن الله بالتفصيل
طبعا نقل ملكية العربية الخالصة مبيقعدش اكتر من يوم او اتنين ولكن بالنسبة لسياراتنا المنطقة الحرة الموضوع بيطول وممكن يوصل لحد اسبوع
ملحوظة: لو انت هتنقل ملكية لازم تكون الرخصة سارية عشان ماتتعطلش وتعرف تتحرك بالعربية
ومتعملش زى حالتى وتستنى لما الرخصة تنتهى وتتعطل
انا فى حالتى كنت بنقل ملكية من خالتى لاختى يعنى الحمد لله كان الموضوع بينا وبين بعض وكان معايا توكيل من خالتى ....... ويستحسن يكون فى توكيل من البائع للمشترى عشان يخلص هو اجرائته من غير مايرجعله
بسم الله نبدء الاجراءات
1- هتروح تتطلع شهادة المخالفات
ودى هتاخد صورة بطاقة صاحب العربية وصورة الرخصة وتطلع على نيابة المرور فى المحكمة وتجيب ملف ب 50 قرش وتدخلهم المكت وهيقولوك عدى كمان ساعة
ملحوظة: لو دى اول مرة هتطلع شهادة مخالفات بعد الثورة احب ابشرك واقولك انها هتطلع صافية من غير مخالفات لان نيابة المرور اتحرقت ايام الثورة بالملفات كلها ( صقفة حلوة كده للخال الى ولعها)
2- تروح المرور الى تبعه العربية سواء مرور بورسعيد او مرور بورفؤاد
هتصور شهادة المخالفات ولو معاك توكيل من صاحب العربية هتصوره وصورة بطاقتك وبطاقته
وتدفع الضريبة لو الرخصة منتهية ورسوم 3 شهادات بيانات موجهين الى: الشهر العقارى وجمارك بورسعيد والمرور الى هيبقى تبعه المالك الجديد سواء بورسعيد او بورفؤاد وبيتكلفو 18 جنيه
هتروح للراجل الكاتب الى قاعد برة يعملك طلب ب 5 جنيه وتقدمه مع الورق الى قلتلك عليه ده وتدخل للموظف هيراجع الورق وهيكتبلك شهادات البيانات على ايده لان الكومبيوتر على طول عطلان وتستلمهم من الظابط بالتوكيل الى معاك
ملحوظة :: لو انت اول مرة تروح بعد الثورة مرور بورسعيد لازم تجيب ملف فحص من الخزينة وتروح تفحص
عند مكان الفحص جنب موقف دمياط الجديد لان الملفات كلها اتحرقت فى الثورة وكله رااااااااااااااااح
3- التحريات
هى خطوة بيعملها المالك الجديد لاثيات ان هو من مواليد بورسعيد ومقيم بها اكثر من عشر سنوات وهى كالاتى:
هتروح عندب باب 20 جمركى هتلاقى الشباب الى واقف هناك هيتلمو عليك زى النمل يشوفو انت عاوز ايه لان طبعا ممنوع اى حد يدخل الجمارك من غير تصريح والتصريح ده بيبقى مع المستخلصين والموظفين المهم هتقوله عايز جواب تحريات باسم المالك الجديد وموجه لقسم الشرطة التابع ليه
( بورفؤاد اول او تانى ... العرب المناخ الضواحى الزهور )
المهم هيطلعلك الجواب على طول تدى للراجل الى فيه النصيب
وتاخد الجواب وتطلع بيه ع القسم وتاخد صورة بطاقة المالك ويستحسن هو يروح بنفسه لان بتوع القسم بيغتتو
هتدخل على شيخ الحارة فى مكتب سيادته_ ده لو لقيته لانه على طول برة بيتحرى_ وتديله عشرين جنيه وصورة البطاقة هيعملهالك فى ثانية:grinder::grinder::grinder: تروح تمضيها من ظابط المباحث والماءمور ولازم تتختم بختم النسر ارخم اقسام فى التحريات هى الشرق والزهور واحسنهم بورفؤاد اول
انت بقى والقسم الى تبعه وشيخ الحارة ومزاجه بس كله بالفلوس يفك
4- مرحلة تجميع الورق وموافقة الجمرك ( المهمة المستحيلة):
فى هذه المرحلة يظهر بطل جديد وهو المستخلص الجمركى وانت ترتاح شوية
حيث انه هو الى هيخلصلك الورق بتاع الجمرك ويحبلك موافقة الجمرك على نقل ملكية العربية ودى بتاخد يومين او تلاتة وهو بيقولك ع الورق الى هة كالاتى:
1ز بطاقة صاحب العربية ( الاصل)
2. بطاقة المشترى( الاصل)
3. التوكيل من البائع للمشترى( الاصل)
4. جواب التحريات ( اصل وصورة)
5. قسيمة زواج المالك الجديد( اصل وصورة) او الطلاق
6. قيد عائلى للمالك الجديد ( مش على طول بيطلب بس اعمله احتياطى) من الاحوال المدنية الى قدام الجبانة القديمة
7. دفتر العربية( بتاع السفر)
8.
شهادة البيانت الموجهة الى جمارك بورسعيد
9؟. جواب من جهة العمل موجه للجمارك بورسعيد
تكلفة المرحلة دى من 250 الى 400 جنيه على حسب المستخلص ويستحسن يكون حد معرفة ولكن لو متعرفش مستخلص بتروح
اى مكتب تخليص جمركى من الى قدام باب 20 وهم يخلصولك المرحلة دى
طبعا المستخلص بيعمل عدد لانهائى من الاجراءات داخل الجمرك وبيدفع حوالى 250 او 300 جنيه عشان منغفلش حقه
ملحوظة: فى المرحلة دى المفروض بتاخد العربية وتوديها عند باب 30 وتسيبها للمستخلص عشان يرفع بصمة الشاسيه والموتور بس مبيحصلش الكلام وبيمشوها عادى
5_ عقد الملكية و توثيقه
هتلاقى بعد يومين او تلاتة المستخلص بيتصل بيك وبيزفلك نباء ان عقد الملكية خلاص طلع من الجمرك وانك هتروح توثقه من الشهر العقارى لولولولولولولولوىىىىىىى
وانت بتاخد منه العقد خلى بالك انه لازم يكون مختوم من ورا بختم ( لامانع من التسجيل) وبيتكب اسم المالك الجديد ورقم العربية
بعد كده بتروح الشهر العقارى بتاع المرور الى عند ميدان الصيادين فى شارع النصر وتوثق العقد ولازم يكون معاك شهادة البيانات الموجهة للشهر العقارى ( زى اى عربية عادية)
بعد كده هتصور العقد الموثق صورتين وش وضهر وتديهم للمستخلص تانى
6- مرحلة الترخيص الجديد
طبعا هتستنى يومين كمان عقبال ما يتبعت اخطار من الجمرك للمرور الى تبعه المالك الجديد عشان تنقع ترخص
وبعد كده تروح المرو وترخص عادى خاااااالص بشهادة البيانات الموجهة للمرور
بس متدفعش الضريبة لان يا اما الرخصة ساربة او لو منتهية بتدفعها وانت بتطلع شهادات البيانات فى الاول..........................
والف مبروك يا سيدى على العربية الجديدة وكل نقل ملكية وانت طيب
:Copy of m-s5::Copy of m-s5::Copy of m-s5::Copy of m-s5::Copy of m-s5::Copy of m-s5::Copy of m-s5::Copy of m-s5::Copy of m-s5:
اتمنى انى اكون افدتكم بالموضوع <<<<<<<< وشكرا لحسن متابعتكم
