صيانة 50000 للاوبترا فى شرم الشيخ و ياريت تفيدونى
مساء الخير يا اخوانى
صيانة ال كم 45000 اللى بيتغير فيها طقم السيور و البلى فاتتنى علشان ضغط الشغل، العربية وصلت 48800 كم و لقيت فرصة النهاردة و رحت عملت الصيانة عن شارم اوتو موتيف اللى هو مركز خدمة شيفروليه و اويل فى شرم الشيخ، هم حسبوها صيانة ال 50000 كم بس المهم اللى اتعمل طبقا للفاتورة هو الأتى:
- سير دينامو 90 جنيه
- سير كاتينة 90 جنيه
- بلية كاتينة ثابتة 210 جنيه
- بلية كاتينة متحركة 250 جنيه
- طقم بوجيهات بوش 50 جنيه
- فلتر بنزين 45 جنيه
- فلتر تكييف 115 جنيه
- مصنعية 350 جنيه
اللى اتعمل برة الفاتورة:
- تربيط عفشة
- رجلشة فرامل اليد
- كشف على الزيوت و مياه التبريد
- كشف على التكييف
- تنضيف المنافول
- تنضيف فلتر الهواء
- كشف على الانوار
انا بصراحة متلخبط علشان مكنتش مركز معاهم و طول الوقت على التليفون فى شغل، بس لما رجعت حسيت ان فى حاجة ناقصة، هو مش المفروض فى شدادات بتتغير برضوا مع البلى؟ انا كلمت المركز و سألت قالولى ان السعر شامل البلية بشدادها، بس مقارنة باسعار صيانات زيها منشورة فى المنتدى انا حاسس ان السعر قليل.
ايه رأيكم ادام الله فضلكم.
كام ملحوظة سريعة على المركز:
- المصنعية هناك بالساعة، ساعة الاوبترا ب 100 جنيه
- المكان نضيف و الورشة صغيرة و بينها و بين الاستراحة المكيفة حائط زجاج تقدر بسهولة تتابع كل الشغل.
- الموظفين و صاحب المركز ناس زوق و متعاونين.
- الصنايعية مش سوبر بس بيهتموا بالتفاصيل و نضافة العربية.