عرض للطباعة
السلام عليكم
إيه رأيكم فى الابيزا ؟
وسعرها لو حالتها كويسة كام ؟؟
بدور على عربية تكون قطع غيارها متوفرة ورخيصة وسهلة فى الصيانة وموفرة فى البنزين وتستحمل السفر كتير
متتعبنيش يعنى لأن دى أول عربية اجيبها وهتعلم عليها ...
فهل الابيزا مناسبة لاحتياجاتى دى ؟؟
السلام عليكم
بعد التحية
شوف يا استاذ محمد انا هقولك عن الابيزا حجات فى حدود علمى عنها و على فكرة انا معايا ابيزا 98 من الزيرو يعنى امتلكها من 14 عام تقريبا وماشى بيها اكتر من 220000 كيلو متر ورأي الشخصى فى العربية هى اكثر من ممتازه هى ثابتة و مريحه و استهلاكها فى البنزين قليل فى السفر من 5 الى 5.5 لتر فى الـ 100 كيلو و داخل المدينة من 8 الى 9 لتر حسب ظروف الطريق و طريقة سواقتك وده بالتكييف و الباور
وعلى فكرة ماشاء الله مافيش يوم نزلت الصبح و انا رايح شغلى ادورها ما دارتش معملتهاش و لا مرة الحمد لله
انما تعطلت بيا مرة و احده بسبب طرمبة البنزين و غيرتها
وسعر العربية اللى حالتها ممتازه (نادره شوية) متوسط سعر 35 الف و انا ارشحلك موديل 98 و 99 هى 1000cc انما معقولة جدا و افضل من 1300cc ببعض الكماليات و الفروق
و اخيرا ربنا يوفقك
مع تحياتى محمد مصطفى
تمام زي ما قال لحضرتك الأستاذ محمد مصطفي
العربية أعتمادية جدا وموفرة جدا وفيها كل المميزات الي تخليها الأختيار رقم 1
انا شخصياً لما حبيت اشتري عربية كنت بدور علي عربية كاملة وموفرة
لقيت اني عشان اركب عربية كاملة يبقي هدفع اقل حاجة 35 وعربية موديل قديم
او 45 فيما فوق لو موديل حديث
لقيت الأبيزا موديل حديث (99) وكاملة
واقتصادية
والمانية
وكحال كل الألماني
لازم صيانات عشان ماتوقفش منك
قطع غيار معمرة
تمتاز الأبيزا عن غيرها بسهولة الصيانة وتوافر قطع الغيار
دة تقييمي للأبيزا كسيارة
جزاكم الله خيرا على المعلومات دى ...
طب أنا حاليا بعد كتير من البحث بقارن بين عربيتين ...
هيونداى إكسيل
ابيزا
ميزانيتى حوالى 33 - 34 ...
احتياجاتى زى ما ذكرت إن العربية تكون قطع غيارها متوفرة ورخيصة وسهلة فى الصيانة وتستحمل السفر وتكون مكيفة ...
بعد البحث اكتشفت الآتى ..
الإكسيل : قطع غيار أرخص - منتشرة - الميكانيكية بيفهموا فيها .... لكنها بتعوم فى السرعات الأعلى من 120
الابيزا : موتورها قوى وثباها كويس وشبابية وألمانى وقطع غيارها معمرة ... لكن قطع غيارها أغلى ومش أى ميكانيكى يعرف يتعامل معاها ومش سهل تلاقى واحدة كويسة عشان الشباب بيبهدلوها ...
===================
فإيه رأيكم فى المقارنة دى ؟؟
وشايفين إيه المناسب منهم لاحتياجاتى ؟؟
أنا بميل للابيزا لكن حاسس إن الاكسيل عملية أكتر
خصوصا إن مهم عندى جدا مسألة قطع الغيار الرخيصة والمتوفرة ...
معلش تعبتكم معايا بس عشان دى أول عربية ...
أولا بالنسبة للمقارنة فهي سليمة بنسبة كبيرة جداً
فعلا الأكسيل متوفرة وقطع غيارها ارخص بكتير من الأبيزا وميكانيكية كتيرة جدا بيفهموا فيها
لكن الأبيزا
ثبات وقوة تحمل واعتمادية وقطع غيار معمرة
وبالنسبة للميكانيكية فمع البحث هتلاقي اكيد حد جمبك وانت مش واخد بالك منه او علي الأقل قريب منك
بالنسبة لقطع الغيار فهي متوفرة ولكن بجد اسعارها اعلي بكتير من الكوري عموما
لكن كعمر افتراضي هتلاقيه اطول بكتير
يكفي ان التيل مشيت عليه لحد لما كان فاضل فيه حوالي مليميتر ومع ذلك الفرامل بتمسك ومش بتصفر
قيس علي كدة مكونات وقطع كتيرة جدا عمرها الأفتراضي بجد اطول من الكوري والياباني
وابسطها البوجيهات والفلاتر بتمشي عليها مسافات اطول من الكوري والياباني
عزل العربية للأصوات والحرارة
الأمان زي الأيموبلايزر
الأنجيكشن وتوفير الوقود
يكفي انك تقدر تركبها كاملة وهتلاقي فيها كماليات مش موجودة في كوري وياباني موديلات 2010 زي الأيموبلايزر والديلاي في نور الصالون والمفتاح بالريموت وانذار وسنتر فبريكة وفرش قطيفة وكماليات اخري كتير بجد لا تتوافر الا في الألماني او الأوربي بوجه عام
تحياتي
والله المستعان
،
،
السلام عليكم
انا حالتى زى حالة الاستاذ محمد بالظبط اول مرة هشترى عربية وتقريبا برضو هتعلم عليها هههههههههههههههه وبرضو مايل للابيزا بس بصراحة عاوز موديل من 2000 الى 2003 بيقولو انها فى الشكل يعتبر احلى الموديلات القديمة فى الابيزا بس ياترى ياجماعة برضو زى ما سال الاستاذ محمد ايه اخبار اسعارها فى الوقت ده لو عربية حالتها كويسة وايه اخبار قطع الغيار والصيانة بتاعتها برجاء الرد وشكرا ليكم جميعا
اخوكم حسين