السلام عليكم ورحمة الله وبركاته
تحية طيبة للجميع

انا عربيتى صنى 2010 اوتوماتيك بدون ABS
بصراحة لو حد سألنى هى بتستهلك بنزين هقوله ايووووووووووووووون
و لو حد سالنى بتوفر فى البنزين هقوله ايييييييييييون برده

بقالى ييجى شهر بحسب استهلاكى فى الصفيحة فى الداخلى لاقيته حوالى 150 كم فى الصفيحة و بدون تكييف !!!

طبعا كان هيجرالى حاجة وخصوصا انى لسه مغير البوجيهات فى صيانة ال 20 الف!!

المهم انى كنت بعمل فى الطوالى من 200 الى 220 كم فى الصفيحة من فترات سابقة

يقوم يطلع فى دماغى انى اجيب آخر العربية فى موضوع البنزين و اشوف هل من الممكن تغيير اسلوب القيادة لاحصل على كيلومترات اعلى !!!

كان عندى مشوار جنب المطار و طبعا انا جاى من كفر الشيخ وراجع تانى ..... فقلت لازم اتبع ما يلى

*اولا مش هشغل التكييف

*هطلع بالعربية على الهادى يعنى ال RPM ميزيدش عن 1.5

* مش هكبس على دواسة البنزين و لا هعمل كيك داون خالص

* اغلب الطريق السرعة ما بين 60 و 80 كم و قليل جدا 90 و قليل جدا جدا 100 كم فى الساعة

* اغلب الطريق ال RPM لم يتعدى 2.5 اطلاقا (يعنى آخرى سرعة 100 كم فى الساعة )

* طبعا مكنتش مستعجل لانى لو مستعجل لو الصفيحة بتعمل 100 كم بس مش هرفض


و طبعا مستحملتش الحر و شغلت التكييف ييجى حوالى 20 كم و ذراعى الشمال تقريبا اتحرق من الشمس !!

المهم كنت مفول التانك و مصفر العداد و الحمد لله رحت و رجعت و عملت حوالى 305 كم

رحت البنزينه اجيب النتيجة قصدى اشوف استهلكت كام لتر .... لاقيتنى عملت المسافة دى ب 20.6 لتر

يعنى اللتر الواحد بسم الله ما شاء الله عامل حوالى 14.8 كم و الصفيحة عاملة حوالى 295 كم


طبعا بعد الموضوع دا بقى صعبان عليا انى مش بسافر يوميا و اتمتع بالاستهلاك دا

و حاولت برده اغير من اسلوب القيادة فى الداخلى بس النتيجة مش هتفرق كتير عن 150 كم بالتكييف

و طبعا الاستهلاك الداخلى دا بيبقى فى اسبوع تقريبا و كل يوم تسخين و تدوير كام مره !!!

حبيت انقل التجربه و فى انتظار التعليقات