صيانة ال10,000 بمركز غبور الجديد (بالعبور) تقرير سريع وصور !
الــسلام علــيكم,
الحمد الله كملت 10,600 كم بالسيارة (الانترا 2012 AUTO GL )
وحجزت ميعاد للصيانة يوم الجمعة (امبارح) الساعة 11 صباحا.
مواعيد العمل لحد 4:30 بس مش بيسقبلوا عربيات بعد 1:30.
المكان :
المكان سهل جدا الوصول اليه و على بعد دقائق من سكان مدينة نصر و العبور و جسر السويس.
هو على طريق القاهرة الاسماعيلية. الكيلو 22.
المركز كبير جدا .. انا اتفاجئت بصراحة .. هو مقسوم نصين .. نصف صيانة و نصف تاني معرض كبير ..
الصيانة من الجانب .. بتخش تركن العربية و تدخل تطلب رقم و تاكد على حجزك .. بينده عليك بالرقم يروح يستلم معاك العربية و يشوف طلباتك .. و بعدين تتفضل في الاستراحة فوق.
الاستراحة كبيرة جدا بعرض المركز كله ..
بس للاسف المركز لم يتم من الانتهاء منه 100% .. يعني التشطيب و الحاجة لسة فيه شوية حاجات مخلصتش .. في كافتيرا ظريفة و بتعمل كل حاجة تقريبا ...
الشاشات متركبة بس مش شغالة - مفيش WIFI لسة - مفيش اي حاجة للاطفال (لسة).
صالة الانتظار بتبص على ناحيتين .. ناحية فيها المعرض و الناحية التانية جزء الصياانة نفسه الكبير جدا !
----
انطباعات !
اولا عن العربية .. الحمد الله مكانش عندي اي مشاكل زيادة او شكوى . والى يومنا هذا مريحاني جدا الحمد الله و مقللتش باصلها لسة في 7 شهور.
المركز ..
للاسف قبل مابدأ اقيم .. مش حقدر اديله اكثر من 6/10. بسببين رئيسين .. السبب الاول غبور نفسه .. السبب الثاني الوقت !
اسيبكم الاول مع شوية صور ؟
اعذروني على جودة الصور .. كنت متنرفز جدا و مش طايق نفسي ..
http://kareemkamel.com/imagez/?di=1WYD
ده جزء صغير جدا من الاستراحة ..
http://kareemkamel.com/imagez/?di=855O
مدخل المعرض
http://kareemkamel.com/imagez/?di=LNTJ
المعرض
http://kareemkamel.com/imagez/?di=7BWU
المعرض
http://kareemkamel.com/imagez/?di=C1G5
الصيانة
http://kareemkamel.com/imagez/?di=4VZY
الصيانة
http://kareemkamel.com/imagez/?di=8DEL
الصيانة
http://kareemkamel.com/imagez/?di=CXTW
الصيانة
http://kareemkamel.com/imagez/?di=8GRY
سيارتي وحيدة في الصيانة :)
---
نرجع تاني للتقييم ..
الحجز كان الساعة 11 صباحا.
وصلت 10:45
دخلت العربية و دخلت اتاكدت من الحجز الموظفة .. واديتني رقم ! قلتلها ده رقم ليه ؟
قالتلي علشان دورك ! قلتلها دوري ليه منا حاجز في ميعاد وجاي فيه !
قالتلي اه بس للاسف المركز مش شغال بكامل طاقته لسة فميش مهندسين كفاية !
المهم اخدت الرقم .. كان 69 و الي بينادى عليه حاليا كان 49 !
قلت مش مشكلة ده مركز كبير حيخلص في دقائق ..
الساعة .. .11 ... 11 و نصف ... 12 ... 12 و نصف (ساعة ونصف بعد ميعاد الحجز)
تكرموا نادوا على رقمي علشان "اسلم العربية" اصلا !
قابلت المهندس ... محترم و مهذب .. سالني عايز ايه قلتله صيانة ال 10 .. شرحلي حيتم فيها ايه و قالي ثمنها كام تقرييبيا و قالي ان فلتر الزيت و الهواء مجانا ... بس الهواء مش حيركب المرة دي حيركب في الصيانة الي جاية ...
امضي .. مضينا ..
طلع معايا برة يستلم العربية ... شالي شوية حاجات مكنتش واخد بالي منها بصراحة (الولاعة - شاحن موبايل - فلاشة .. الخ )
قالي خلاص اتفضل في الاستراحة قدامك ساعة و نصف كدة ! .. طلعت الاستراحة .. المدام كانت معايا .. قعدت تتمشى بال iPod مع نفسها (بتحب المشي عكسي انا) نزلت اتفرج على الجينيسيس كوبيه و السوناتا ...
المهم الوقت سرقني اتفكر صلاة الجمعة .. طلعت برة المركز .. اني الاقي جامع ... مفيش .. سالت قالي اقرب واحد على بعد 1 كم !
و مش لاقي حد رايح ... قلت اتمشي .. طلعت على طريق الاسماعيلية ... لقيتلك 4 كلاب طلعوا من تحت الارض .. الف يمين الف شمال ... واقفين .. اهش ... مفيش ! رحت جايب زلطة و حدفتها جنب واحد فيهم ... قفش عليا ...
قضيتها جري لحد المركز تاني .. ببص ورايا لقيت الكلب تعب في السكة و ريح ... والجو حر جدا !
دخلت استغفرت .. وصليت في المصلى الي عاملينه مع كام عامل هناك و قلت امري لله !
خلصت صلاة .. طلعت ابص على الصيانة من الاستراحة .. ان الاقي عربيتي دخلت ! ابدا !
الساعة بقت 1:45 .... وهما مستلمين العربية 12:30 ... قلت اتقل .. كان في صلاة ...
الساعة 2:15 لقيت عربيتي دخلت ! فرحت !
فضلت واقفة ... 15 دقيقة
فضلت واقفة ... 30 دقيقة
فضلت واقفة ... 45 دقيقة
اتحركت ! جات في حتة اقرب .. والحمد الله العامل بدا شغل فيها الساعة 3 !
العامل من النوع المحترف جدا .. لدرجة انه كل 5 دقائق يقف يهرج مع زميله ويحدفه على بعض فوط ... و لا كان في ناس شايفاهم من فوق ...
الساعة 3 ! 45 دقيقة لتغيير زيت و تنظيف فلتر هواء و تربيط عفشة و غسيل الحوض ... لا فيه CHECK COMPUTER ولا نيلة ...
العربية خرجت برة الصيانة !
حمد ربنا ! قلت اكيد حتتغسل بقى ...
نزلت استنى تحت ...
قعدت ... 10
20
30
45
الساعة 3:45 ! لقيت حد بينادي على رقمي ... تعالى يا عم ادفع !
ادفع وماله !
كام يا سيدي ...
240 زيت (بدون ضرائب)
فلتر زيت مجاني
فلتر هواء مجاني
كشف تكييف مجاني (قالك .... )
230 جنيه مصنعيات ؟؟؟ ( 2.5 ساعة عمل !!!!)
6 جنيه وردة ..(الله يرحمها بقى )
المهم الحساب كله 535 جنيه بعض الضرائب ... دفعنا ختملي الدفتر ...
قالي ايه ده انت معملتش صيانة ال 5000 ... قلتله لأ .
قالي دي مهمة ! قلتله في ايه ؟
قالي تغيير زيت و فلتر .. ! قلتله زيت و نيلة ايه اذا كان الزيت 10 الاف ؟؟
قالي اه يبقى شيك على العربية ... قلتله شيكت عليها انا كانت كويسة ... مش لازم ادفعلكم 230 جنيه علشان تيشكولي ... قعد يضحك .. قالي بس خالي بالك حيضايقوك في الضمان قدام .. قلتله يولعوا .. قعد يضحك !
طلعت بقى استلم العربية ...
لا اتغسلت .. و لا اتنيلت .. امال 45 دقيقة كانت بتعمل ايه الله اعلم !
حاطين بلاسيتيك على كرسي السواق و دواسة كرتون ..
سايلبي الفتر بتاع الهواء على الكرسي !
راميلي بقيت الزيت في العلبة على الارض ..
ايدي العمال الجميلة مطبعة في الكراسي و الفرش !
رجعت اتخانق مع المهندس ... الساعة 4 .. المهندس مشي !
حمدت ربنا اني خلصت علشان كنت خللت انا والمدام من الانتظار و مشيت !
بس كدة ...
الخلاصة ؟ بصراحة الموضوع ممكن يديك فكرة خاطئة .. يعني هما مش سئيين اوي زي اوماترا مثلا (توكيل فيات الحرامية) او منصور ! (ازبل توكيل دخلته في حياتي) ...
بس كونسبت "الوقت" ده .. ملغي من عندهم ... يعني كل حاجة ببرود و ببساطة ... حاجة تاخد 5 دقائق حتاخد 50 دقيقة ...
مرضتش برده اتخانق اوي قلت يمكن يوم الجمعة مش كل العمالة شغالة خصوصا ان المركز تحت في الصيانة في مكان يتسع لبتاع 50 عربية بيمنما كل العربيات الي كانت شغالة مع بعض معدوش 10 ... بس برده دي مشكلتي انا ..
بصراحة حروح بعد كدة Modern Service على طول ... ماشي اضيق بكتير
ماشي الاستراحة اصغر من حمام بيتنا ...
بس بصراحة عملت الصيانة كلها في 45 دقيقة !! و مشيت !
وهو ده اهم حاجة عندي ... لا شياكة ولا Playstation !
الوقت !! انا مش جاي اتعرف واحب فيكم !
كفاية كدة علشان مبقاش سريع خالص التقرير ده :)
بالمناسبة شفت الاكسنت RB الهاتشباك ظريفة.
