الموضوع: انا شاب و عاوز اتجوز تقدر تساعدني اتبرع و لو بجنيه

المشاركة الأصلية كتبت بواسطة samehafez

لو انت اتجننت و خدت القرار ان انت تتجوز يبقي هتاخد علي دماغك عاوز تعرف ليه اقوللك انا ليه
اول حاجة لازم الشقة اقل شقة ممكن يتعاش فيها تعملها مش اقل من 250 الف همم جميل
و عندك الشقة دي محتاجة عفش قول مش هتدفع مهر و هتفرشوا الشقة بالنص يعني 25 الف بالميت و 6الاف للمطبخ يعني 31 الف .... لوز اوي نخش بقي علي الاجهزة و بعد محاولات مضنية لاقناع الهانم بان الناس ممكن تعيش بتلاجة 14 قدم مش لازم التلاجة المستفزة اللي ب12 الف جنية دي و طبعا في المقابل سعادتك هتوافق علي غسالة الاطباق و تكييف غرفة النوم القصة هتوقف علي 17 الف قول 20 الف اجهزة
جميل جدا و كتب الكتاب في مسجد الشرطة تقريبا بقي شئ مقدس لازم مسجد الشرطة ليه مش عارف يعني مش كفاية هاريينا مخالفات لا لازم كمان يستنفعوا في الجواز ما علينا ادي 4 الاف
الفرح بقي خش علي اي دار من دور القوات المسلحة قول 20 الف نصيبك منهم 10 الاف يعني سعادتك دافع
250 + 31 +20 +4+10 =315 الف جنية
فيه موضوع انا خليته في الاخر الشبكة
الكلام بيكون ان دي هدية منك للعروسة و دي حسب مقدرتك و الكلام الجميل ده بس تثبيييت يعني انتم ماشيين ببتفرجوا علي محلات الدهب انت و خطيبتك و فجاةالله الطقم ده حلو اوي ممكن تجيبهوللي في الشبكة تخش سعادتك كاي شاب فييس و تسال بكام ده 60 الف طبعا المشكلة ان البنات بيجلهم طرش من ناحية الارقام .... يعني سعادتك واقف مذهوول و الهانم عادي ماسكة الطقم و بتقلب فيه و انت اللي طالع عليك بيقول 60 الف ....عادي و لا هي هنا يا ماما بيقول 60 الف ...لا حياة لمن تنادي يا حاجة بيقول 60 الف عادي فيين بعد ما تخرجوا من المحل تقوللك ايه رايك فيه ....راي مين في ايه يا حبي ده تمنه 60 الف جنيه ...ااهه بس لازم ندور علي حاجة شبهه بس تكون ارخص طبعا ربنا يسهل ..بقوللك ايه منخلي موضوع الشبكة دي لما يجي وقتها
المهم يا صديققي من و اقع حال الاخوة السابقين متوسط 15 الف و ده لو ربنا كرمك
يعني 330 الف جنيه عشان تتجوز ليييه
انا اروح افتح بيهم مشروع احسن
طيب الشباب تتجوز ازاي ........انا لما كنت بكلم الحاج في موضوع الجواز اول ما فتحت معاه الحوار قلتلله حضرتك عارف ان الشيخ بن باز افتي بجواز صرف اموال الزكاة علي تزويج اليتامي قاللي اه قولتلله يرضيك اليتامي يتجوزوا و ابنك لا ... ضحك و قاللي انت عاوز ايه ؟
المهم يا جماعة الرحمة مطلوبه و معلهش انا طولت نكمل بعدين ....
و لنا لقاء اخر

هههههههههههههههههههههههه.. .عسل يا سامح..والله كلامك عسل. يا ريتني كنت قرأت الكلام دة من 3 سنوات فاتوا كان نفعني كتيييييييييييييييييير

دة حال كل الشباب

اتجوز على قدك
انا اتجوزت فى اديق الحدود و ادينا بنيبنى نفسنا واحده واحده
و الحمد لله

المشاركة الأصلية كتبت بواسطة waellolo26

والله كلا مك ضحكنى جداااااااااااااااااااااا انتا زى الفل.
أقولك حاجة والله على ما أقول شهيد : أنا كنت زيك كدة بالظبط يعنى كنت بحسبها بالورقة والقلم وطبعا ده واقع محتووم فى حياتنا دلوقتى بس والله لما نويت نية خالصة لوجه الله انى عايز اتجوز عشان ربنا يعصمنى من الخطأ و أكمل نص دينى والله الأمور مشيت بطريقة لا يمكن تخيلها فمجرد انى رحت اتقدمت لأهلها تانى يوم وسعيت فى الموضوع ولجأت الى الله وتتضرعت اليه سبحان الله فجأة لقيت نفسى متجوز فى 3 اشهر وحياتى كلها اتغيرت وجالى شغل جديد ووو...
الخلاصة انك ترمى تكالك على الله وتتقى الله وتعقد النية وتعزم .. وصدقنى مش هتصدق اللى هيحصلك ..
وربنا يكرمنا جميعا وعلى فكرة مش شرط الواحد ربنا يحققلو حلمه على طول انا مثلا قعدت 5 سنين عقبال مربنا كرمنى واتجوزت وعقبال معرفت الطريق الصح اللى كان لازم امشى عليه من زمان .

يا اخى سبحان الله كأنك بتتكلم على لسانى

انا الحمد لله اخلصت النيه لله فى الزواج لابتعد عن طريق الشيطان وخطبت من غير ما يكون عندى شقة
فعلا الحياة اتغيرت بس فى خلال سنتين بالظبط كنت متجوز

فعلا ... يا جماعه ...والله ربنا بيرزقها ويفتحها للي اخلص النية في الزواج ..وخصوصا للعايز يبعد عن الكبائر وشرها ....

وربنا يرزقك بعروسة تكون راضية ...لانها بتفرق كتير .....عن واحده عايزه كل حاجه في نفس الوقت
مع ان الكمال لله وحده يأخي ....بس تقول ايه بقى

اسلوبك بينقل الموضوع كأنه فيلم و شايفينه ,

لكن انا اختلف معاك , لو كل الشباب لازم يتكلفوا المصاريف دي يبقى محدش هيتجوز خالص ,
الشقة ممكن تكون قانون جديد لمدة 10 سنين مثلاً و دي ممكن تدفع 10 آلاف مثلاً ,
و العفش ممكن من دمياط يعني حجرة نوم و صالون بـ 20 ألف ,
و أجهزة تلاجة و تليفزيون 3 آلاف ,
و الشبكة أقل واجب 5 آلاف ,
كتب الكتاب و الدخلة في أي مسجد و دا قول الف ,
طبعاً ده اللي عليك و عليهم الباقي على اساس ان الموضوع مناصفة ,
10+20+3+5+1 = 39 ألف ج
دا غير ان فيه ناس بتشتري حاجات قسط و ناس بتعمل جمعيات و ناس بتشتغل شغلانة تانية .. ,
ياما شباب إتجوزوا و لما حسبوا المصاريف تلاقيهم يستعجبوا انهم قدروا يجمعوا المبالغ دي ,
انت بس إنوي و ان شاء الله هتلاقي كل حاجة بتتيسر .

المشاركة الأصلية كتبت بواسطة abzaky

اتجوز على قدك
انا اتجوزت فى اديق الحدود و ادينا بنيبنى نفسنا واحده واحده
و الحمد لله

طيب ممكن حضرتك توضح الرينج بتاع أضيق الحدود ده يعني كام ألف جنيه؟؟