مشكلة كبيرة أحتاج مساعدة عاجلة ....غسلتها كاركير وياريتني ما غسلت !!!!!!
السلام عليكم ورحمة الله وبركاته
السادة الأفاضل تحياتي لحضراتكم جميعا
مش حاطول عليكم بإختصار شديد غسلت سيارتي كاركير شامل عند شركة في مساكن شيراتون وشغلهم يعني نوعا ما مش بطال ولكن مش دي المشكلة... المشكلة إني بعد ما مشيت من عندهم ورحت مشوار العاشر من رمضان وبعدين روحت والعربية باتت لتاني يوم وبعدين ركبتها ورحت مشوار تاني وفجأة العربية قفشت مرة واحدة وقطعت وسط الشارع ولولا ستر الله لكان حصل حادث مروع فركنت وطفيت الكونتاكت
وبالفحص لقيت فيوز الـ efi ضارب
قلت بسيطة ورحت مغيره وبمجرد ما فتحت الكونتاكت تاني وقبل ما أدور لقيت الفيوز الجديد ضرب في الحال هو كمان قلت وبعدين بقي.... المهم زقيت العربية وركنتها طول اليوم في الشمس يمكن يكون من أثر الغسيل اللي حصل إمبارح خصوصا انه اتوصي بالصالون والموكيت في الغسيل بناء علي ملاحظاتي علي الشغل وياريتني ما لاحظت حاجة ولكن الحمد لله
وآخر اليوم من شوية بسيطة تاني حاولت ولا جديد وغيرت نفس الفيوز حوالي 15 مرة ويضرب في الحال باسثناء 3 مرات صدفة كده دارت فيهم ولكن أول ما أدوس بنزين بعدها يضرب فورا وطبعا العربية بتطفي إنما العادي يضرب قبل ما أدور أصلا
ياتري السبب فعلا الغسيل ؟؟ طب والحل إيه؟؟
ياريت تفيدوني من فضلكم لأني في ضيق وكرب شديد بسبب المشكلة دي ولأني مش عاوز أجرب أغير أي حاجة وأنا وحظي علشان مافيش حاجة حصلت في العربية غير موضوع الغسيل ده فقط لا غير.
يعني لا عملت صيانة ولا غيرت حاجة معينة مثلا والعربية دلوقت مركونة مش بتدور وأنا من غيرها حياتي بتكون مشلولة بشكل كامل.
أشكركم وخالص تحياتي لكم