اعراض تلف بلية الدبرياج في اللوجان
السلام عليكم و رحمة الله و بركاتة
كل سنة و انتم طيبين يا جماعة
بقالي اكتر من اسبوعين بسمع صوت خشونة و وررررة بيظهر و العربية دايرة سالنسيه و الصوت دا بيختفي اول ما ادوس دبرياج
و بلاحظ كمان في رفعة رجلي من علي الدبرياج بصوت طقة بسيطة كده من الفتيس و طبعا بيظهر صوت الورررة دا اول ما اسيب الدبرياج
في مركز الخدمة اللي عندنا في الاقصر قالوا ان الصوت دا بلية دبرياج محتاجة تتغير و ممكن يتغير معاها طقم ديسك و اسطوانة !!!! سألت عليهم لقيت البلية 770 جنيه و الديسك +الاسطوانة 1300 جنيه !!! يعني 2000 جنيه !!! في الايام الناشفة دي
ناس تاني قالت لأ الصوت دا مش صوت بلية خاااااالص دا صوت فتيس لأن صوت البلية بيظهر لما تضغط علي الدبرياج مش اما يكون مرفوع
انا بصراحة الكلام دا قالقني جدا لأني اصلا شاكك في الفتيس بسبب صوت ونة زي ما اشتكيت قبل كدا و رحت المركز الرئيسي في المقطم 4 مرات اخرهم كان من شهرين و الناس قالوا مافيش صوت في الفتيس و كل حاجة طبيعية جدا و انا عملت كدا اثباتا لحقي لو الفتيس فيه مشكلة قد تظهر في المستقبل
علي فكرة انا في شهر فبراير اللي فات رحت التوكيل في المقطم و اشتكيت من صوتت الونة دا و العربية فضلت عندهم 10 ايام و اما استلمتها قالولي انهم غيروا عمود شجرة و ترس الرابع !!
انا دلوقتي مش عارف اعمل ايه
المفروض ان العربية خرجت من الضمان في 21/6/2012 بس انا كنت اخدت وعد من م/ياسر انه لو حصل تطورات في الفتيس هو هيقف معايا و هيجيب لي حقي لنه بشتكي من الموضوع دا من وقت ما العربية كانت لسه عاملة 20 الف كيلو من سنتين خصوصا و ان ضمان الفتيس بينتهي مع مرور 3 سنوات مش 100 الف كم
تنصحوني بايه يا رجالة
هل الصوت دا بلية ... و لو بلية لازم اغير معاها ديسك و اسطوانة ؟؟؟ سحب العربية كويس و مفيهوش مشكلة .. ؟؟ وتنصحوني اني اغيره برا التوكيل لو هناك فرق سعر كبير
ممكن يكون فعلا المشكلة في الفتيس مع ان صوت الفتيس متغيرش علي اي سرعة
ايه الحل اللي تقترحوه عليا