سوق بسرعه وخلي البلد تستفيد منك

النهارده الساعه 2 الفجر كنت بتمشي انا ووالدتي علي الكورنيش بعد زياره دكتور الاسنان
ولقيت الكورنيش فاضي بشكل غريب شويه عن ما الواحد متعود عليه في الوقت ده في الصيف
قولت بركه يا جامع خلينا نتنفس شويه من وسط زحمه المصيفين
وكالعاده
والمنظر اللي اصبح بالنسبالي شبه يومي كل ما امشي علي البحر
ولو ملقيتهوش او مشوفتش اثاره بحس ان فيه حاجه غريبه
بس المرادي كانت بالنسبالي غريبه شويتين
مع انها نتيجه طبيعيه
لقيت زحمه وصوت اسعاف والعربيات
طبعا انا بتكلم عن حادثه علي البحر
بس المنظر لما قربت لقيت عربيه مرسيدس تقريبا e250
متزوقه وراكنه في اليوتيرن
وناس لابسين سواريهات وبدل واقفين
وعربيتين اسعاف داخلين والمسعفين نازلين يجروا منهم
وبرضه علشان مكونش سبب في الزحمه مرضيتش اقف اتفرج مع ان الفضول حيقتلني
وانا راجع بقي شوفت المنظر
عربيه كارينز ركبت جزيره اليوتيرن
ومرمطت عامود النور وطلعته باسمنته من الارض
وطبعا الناس اللي كانت فرحانه والعيله اللي كانت ملمومه في الفرح
حيتلموا في المستشفي لزياره مصابينهم
او في المقابر لتعزيتهم برضه
وكله بسبب التهور والغباوه والجري ورمي النفس في التهلكه
بس برضه الموضوع ليه جانب ايجابي
البلد بتستفيد والناس بتشتغل
عامود النور ب15 او 25 الف جنيه
سواقين الاسعاف اشتغلوا بدل ما هما عواطليه
المسعفين طبقوا الي اتعلموه
ظباط المرور اشتغلوا
الناس المعديين اتفرجوا ولقوا حاجه يتكلموا فيها
عمال الكهربا حياخدوا اوفر تايم وهما بيركبوا العامود تاني
التوكيل او تجار الحوادث حياخدوا فلوس
المستشفيات حتاخد فلوس
ومجالات شغل كتير اوي حتستفيد
بس برضه الناس مش حتاخد عظه ومش حتبطل جري
فالي يجري يخليه جدع ولما يرشق ميرشقش في حد معدي او واحد ماشي في امان الله بعربيته
عنده عواميد النور ومصدات الاسمنت ماليه الدنيا
وربنا يجعل موضوعي عظه للناس اللي بتجري

كلامك عين العقل ويسعدني ان اكون اول من يعلق على الموضوع واحنا ياما فدنا المجتمع بالحوادث بتعتنا d:

من لم يمت بالسيف مات بغيره :))



ربنا يستر علينا ياباشا

اقتباس:

---

المشاركة الأصلية كتبت بواسطة gmc

كلامك عين العقل ويسعدني ان اكون اول من يعلق على الموضوع واحنا ياما فدنا المجتمع بالحوادث بتعتنا d:

---

والله يا باشا اللي بيزعل الواحد ان الناس بتتاخد من عز فرحتها
لقمه الاكتئاب والحزن

اقتباس:

---

المشاركة الأصلية كتبت بواسطة i_boy

من لم يمت بالسيف مات بغيره :))



ربنا يستر علينا ياباشا

---

بس دا انتحار ورمي نفس في التهلكه يا باشا

يااااااااااه هى دى حادثة أنا شفت حوادث أجمد من دى بكتييييييييييييييييييير دى حادثة لمس أكتاف مش أكتر

لا حول ولا قوة إلا بالله...ايه كارينز دي إللي بيجروا بها؟؟ العربيات العالية مشكلة يا جماعة

لا حول ولا قوة الا بالله
طب مش هنجرو
ومش هنخلو حد يستفيد بقا "بالاسكندرانى "
بالعند فيك بقا هههههههههه
ربنا يسترها مع الجميع .. السرعة ف البلد دى احطر ما يمكن واخرتها وحشة

الكورنيش عندكم =الدائري عندنا
بس مع فارق التريلات واللي بتعمله فينا
تبقي ماشي في امان الله ابتداء من الظلط والطوب ومرور بالبضاعة اليل بتقع والسواقينن اللي ضاربين نهاية في اللي بيلبسو فيك وماتفقش غير في الاخرة :-)

هو حد عرّف الناس دي ان الجري بالعربيات ده اهلاك لنفسه و للغير و خطر .. و زرع في نفسهم القيم دي .. عن طريق توعية و لوحات ارشادية و اعلانات و اختبارات و امتحانات؟

أو أصلا هل من المطلوب لمّا حد يطلع رخصه انه يكون عارف اداب المرور .. ولّا معنى الخطوط اللي في الأرض .. او حتى عوامل الأمان؟ المطلوب منه بس انه يعدي من بين الأقماع .. لا تعليق.

و هل اللي بيعمل حادثه زي دي بتتسحب منه رخصته 6 شهور مثلا .. و يتعمل له اختبار بعدها تاني .. عشان يعرف انه لو عمل كده تاني هتتسحب رخصته للأبد .. و يكون عبره لغيره و كل اللى تسول له نفسه انه يجري.

للأسف المنظومة كلها فاسدة .. هو مافيش شك غلطان .. بس مع غياب الوعي و الارشاد .. الناس بتنسى القيم و المبادىء و حاجات تانية كتير.

أملنا في الفترة اللي جايه كبير .. و الحمل تقيل .. و ربنا يقدرنا جميعا اننا نصلح اللى باظ.

اقتباس:

---

المشاركة الأصلية كتبت بواسطة kar!m

هو حد عرّف الناس دي ان الجري بالعربيات ده اهلاك لنفسه و للغير و خطر .. و زرع في نفسهم القيم دي .. عن طريق توعية و لوحات ارشادية و اعلانات و اختبارات و امتحانات؟

أو أصلا هل من المطلوب لمّا حد يطلع رخصه انه يكون عارف اداب المرور .. ولّا معنى الخطوط اللي في الأرض .. او حتى عوامل الأمان؟ المطلوب منه بس انه يعدي من بين الأقماع .. لا تعليق.

و هل اللي بيعمل حادثه زي دي بتتسحب منه رخصته 6 شهور مثلا .. و يتعمل له اختبار بعدها تاني .. عشان يعرف انه لو عمل كده تاني هتتسحب رخصته للأبد .. و يكون عبره لغيره و كل اللى تسول له نفسه انه يجري.

للأسف المنظومة كلها فاسدة .. هو مافيش شك غلطان .. بس مع غياب الوعي و الارشاد .. الناس بتنسى القيم و المبادىء و حاجات تانية كتير.

أملنا في الفترة اللي جايه كبير .. و الحمل تقيل .. و ربنا يقدرنا جميعا اننا نصلح اللى باظ.

---

ياباشا شوف في اي دوله في العالم وانا سافرت كام حته كده حتت السرعه ديه بتبقى في دم الانسان

مهما كان البلد الي هوا فيها او مدى التوعيه او لو عمل حادثه تتسحب الرخصه او لو مشي بسرعه

ياخد نقاط ولو نقاط معينه اتجمعت الرخصه تتسحب 6 شهور او سنه على حسب الي عمله

بردوا بيمشوا بسرعه هو الي بيحد من موضوع السرعه برا والناس بتحترم القوانين

الرادار لا اكتر ولا اقل وكام عربية دورية مسخبية وردار مستخبي فا بتلاقي الناس بتمشي باحترام

يعني لو طريق الكورنيش في اسكندرية اترزع كام ردار كده في الشارع ثابت ومتحرك

شوف الناس حتقلب محترمه ازاي وتجيب ورا وطبعا المخالفه تبقى محترمه زي برا

بس طبعا مش كله بيمشي بسرعه وبهمجيه ناس ناس

ياراجل مكنتش اعرف ان الجري مفيد كده
ده طلع حاجه كويسة اهو :)