كيفية ارسال الشهادات مع cv

**egyboy** · 10-07-2012 11:44 AM

السلام عليكم

احبائى اعضاء المنتدى المميز نايل موتورز

كنت عايز استفسر منكم ايه افضل طريقة لارفاق الشهادات الخاصة بالكورسات مع cv

لانى عايز ابعت ال cv نسخة ورقية باليد

وبالتالى انا عندى شهادات اخدتها من الكورسات زى مثلا شهادة icdl

فهل اصورها كورقة عادية وارفقها ولا اصورها صورة الوان ولا اطبعها من الكمبيوتر واحاول اعملها نسخة هاى كوبى ولا ايه رايكم افضل طريقة ؟

شكرا جزيلا

**zrzr1** · 10-07-2012 12:30 PM

اعملها سكان ع الكمبيوتر واطبعها الوان شكلها بيكون افضل واحتفظ بنسخه من السي في والشهادات ع الايميل دايما

**egyboy** · 10-07-2012 01:07 PM

بارك الله فيك على ردك

طيب فى خامة للطباعة اسمها فوتو بتهيالى دى بتكون زى خامة الشهادات الاصلية

ولا اطبعها الوان على ورق عادى اللى هو a4

::::

وكمان عندى شهادات ليست موجودة على الكمبيوتر فلو عملتها سكانر اكيد هتبقى الجودة بتاعتها ضعيفة لما اجى اطبعها غير الشهادة اللى موجودة على الكمبيوتر اصلا طباعتها جودة افضل !

:::

وسؤال كمان دلوقتى جهزت ال CV فى حدود ورقتين A4 + مثلا نقول 6 شهادات

طيب احطهم فى دوسيه ولا ظرف ولا يكونوا فى ايه بالظبط علشان اسلمهم باليد

واكتب حاجة على الدوسيه من بره ولا الموضوع بيكون ازاى

معلشى اسئلتى بدائية شوية :)

ياريت لو تفيدنى فى النظام بيبقى ازاى فى CV

وشكرا مرة تانية لتواصلك

**Ahmed_Rahem** · 10-07-2012 01:38 PM

الافضل تحط السيرة الذاتية مع صورة (او سكان واطبع، سواء الوان او ابيض واسود، المهم تكون واضحة) الشهادات فى ظرف مقفول ويكتب علية الجهة الموجة الية - شئون العاملين مثلاً - والسبب - تقديم لوظيفة محاسب.

**GMC** · 10-07-2012 01:42 PM

حتكتب ال Cv على الكمبيوتر لو معندكش خلفيه اي محل طباعه يعملهولك في ثواني

بعدها لو عايز تعمل الشهادات بالالوان يا اما على الطباعه اسكان وبرنت او اي محل عنده ماكينة طباعه اللوان

او اسكان من عندك وعلى فلاشه وبرنت عنده بالالوان

حتحط كله في ملف واحد وطبعا فايل ابيض شفاف متكتبش عليه حاجه انت في السي في بس

تبقى خابط اسمك بالخط العريض فوق الورقه ههههههههههههههههه وتحتيها بقى البيانات كلها والمؤهلات والسلطات

وكله وطبعا بعد ورقتين السي في حط باقي اوراق الشهادات وممكن استكير صغير على الفايل تكتب عليه اسم الجهه او مسمى الوظيفه

طبعا فايل ابيض بنص ولا بجنيه من اي مكتبه الي فيه فتحه من تحت تحط في الورق وبعدين ابقى دبسه

من تحت مره ولا اتنين عشان بس لو الفايل وقع الورق ما يقعش وربنا يوفقك ان شاء الله

ونصيحه مني ليك لما تقدم في حته ومتتقبلش لا تيأس متعرفش ربنا مخبيلك ايه

**aser_007** · 11-07-2012 01:21 AM

طب يا جماعة لو عايز اترجم شهادات واخدها من مصر طبعا واخدها بالعربي وعايز اترجمها بالانجليزي ... اترجمها في اي حته ... لو حد جرب مكان للترجمة كويس .....
وايه وضع الختم بتاع الشهادة لمما تترجم !!!

**GMC** · 11-07-2012 07:52 AM

العفو ياباشا وبالنسبه للترجمه والطباعه واي حاجه خاصه بالورق

عارف كوبري ثروة عن كلية تجاره

ادي انت داخل على الكوبري اهو قبله في يمين ادخل الشارع ده كله محلات طباعه وترجمه

واياك تترجم بترجمة جوجل مع نفسك يعني اعرف واحد عملها وكانت الترجمه مسخره ههههههههههههههههههه

**Ahmed_Rahem** · 11-07-2012 10:40 AM

المشاركة الأصلية كتبت بواسطة aser_007

طب يا جماعة لو عايز اترجم شهادات واخدها من مصر طبعا واخدها بالعربي وعايز اترجمها بالانجليزي ... اترجمها في اي حته ... لو حد جرب مكان للترجمة كويس .....
وايه وضع الختم بتاع الشهادة لمما تترجم !!!

السؤال مفروض يكون انت محتاج الترجمة لية؟ حتقدمها لمين؟
لو علشان ان السيرة الذاتية مكتوبة بالانجليزى بس، يبقى مش ضرورى الترجمة، لانك مفروض كاتب فى السيرة الذاتية اسم الشهادة بالانجليزى، ولو عملت كدة شكلها وحش.
طب انت عايز الترجمة علشان هتبعت السيرة الذاتية لبرة - مكتب توظيف مثلاً او شركة فى الخارج - يبقى الاهم نوع الشهادات اية؟ لو كمبيوتر على تعليم انجليزى على كورس تدريب ممكن متبعتهمش اصلاً وتكتب اسم الشهادة وخدتها امتى فى السيرة الذاتية وتضيف الجملة دى
referance upon request
ولكن شهادة الجامعة تجيبها من الجامعة بالانجليزى. طب لو حكمت انهم طالبين الشهادات بالانجليزى،
الحل الاول زى شهادة الجامعة تروح المكان الى انت واخد منة الشهادة وتطلب شهادة بالانجليزى، طلعت خير وبركة، رفضوا، تطلع على مكتب ترجمة معتمد - ولازم معتمد - وتطلب ترجمة الشهادة، بيحط صورة الشهادة مع ترجمتها واقرار منة بصحة الترجمة وختم وبيدبس الاتنين مع بعض.
وربنا يوقفك