عرض للطباعة
السلام عليكم ورحمة الله وبركاته
استفسار لأهل الخبرة و الناس اللى ساكنة بالقرب من الطرق السريعة
عاوز أعرف بالنسبة للضوضاء وتلوث الجو مع العلم ان البرج بحرى و 11 دور وبعيد عن الدائرى حوالى 30 متر مباشرة و لو أخدت شقة تنصحونى بالدور الكام وهل هيبقى فيه مشكلة بالنسبة لمذاكرة الأولاد والنوم.
وشكرا لنصيحتكم
ايه يا جماعة محدش عنده فكرة
منصحكش لو مجروحة
أما بالنسبة للضوضاء فليها حل في الشبابيك لكن فكر كويس وأستخير
دى بتكون حسب رغبه الواحد انا شخصيا لو الشقه ببلاش مخدهاش لعده اسباب اولا دخان العربيات ال هيطلع عليك كميه عربيات يوميا على الدائرى وكل دا هيكون فى صدرك على طول دا تفكيرى انا
شكرا لكل اللى رد
للعلم هى مش مجروحة والدائرى فى المنطقة دى أرضى
وبفكر اخد فى السابع مثلا
بس عاوز اعرف لو حد هنا جرب الوضع عامل ازاى؟
بلاش احسن عشان الدخان و الكاوتش المحروق و عوادم السيارت و الازعاج
بلاش علي الدائري مباشره وخصوصا الحته اللي قدام الهضبه الوسطي كميه تراب ورمل فظيعه
ارجع ورا شويه
دور في المعراج خلف كارفور
نفس الاسعار تقريبا
مشكله الادوار العاليه في مصر مشكله عويصه بتبان بعد كام سنه من عمر العماره عند الاحتياج لتجديد مرافقها
وطبعا مشاكل الصيانه معروفه
منصحكش بدور عالي ابدا
وربنا يوفقك
شوف أهم حاجة الموصلات ايه ظروفها و لو معاك عربية شوف الركنة والطرق والزحمة خاصة في أوقات الذهاب والرجوع من الشغل وشوف المنطقة وشكل الناس اللي هاتسكن معاك في العمارة
الحاجات دي أهم من الضوضاء
على الاقل الضوضاء تعرف تجيب شبيابيك تعزل الصوت ...
أما الزحمة والموصلات والركنة والامان فالحاجات دي ما تعرفش تعمل فيها حاجة
انا بشكر كل الناس اللى ردت
هى الميزة حاجتين
1-انها مش مجروحة
2-المواصلات سهلة جداً
بس موضوع الضوضاء والدخان هيخلينى افكر تانى
على العموم انا بفكر حتى اخدها استثمار
انا بروح عند خال خطيبتي وساكن باردو علي الدائري
بجد مبقدرش استحمل ساعتين علي بعض من دوشة العربيات
وكلاكسات المقطورات
بجد شيء فظيع مع العلم اني ساكن في شبرا مصر يعني دوشة باردو :)
هو اول ما سكن مكنش بيعرف ينام لدرجة ان ابنة الكبير كان بيروح ينام في شقتهم القديمة :)
بس مع الوقت اتعود