المشاركة الأصلية كتبت بواسطة ahmed_m_ashraf
إسمحلي أفاجأك ... لما زنقت مدير ورشة فرع العامرية وقاللي هيكلم مهندس ياسر بتاع المقطم، كلمني تاني يوم وخد عندك ...
قاللي إن المهندس ياسر قال له إنه عملها لعربية واحده وكانت على مسئوليه العميل وكمان مضاه على كده!!! ومدير ورشة العامريه قاللي إنهم مش بيعملو كده غير للعربيات القديمة لما بتكون سربنتينة التكيف السخن عايزه تتغير والعميل يرفض تغييرها.
الخلاصة أنا قررت ملعبش في العربية وأسيبها على وضعها وأحاول أظبط الموضوع بالعزل، بس مش العزل التقليدي إللي جنب دواسة البنزين، لأ أنا رايح بكره إن شاء الله فرع العامرية عشان نحاول نزود العزل وراء التابلوه، بالتحديد وراء الفبره الفضي إللي فيها الأزرار والكاسيت، إدعولي بس العمليه تنجح وصدقوني ده هيبقى أحسن حل لو نجح منغير منوجع دماغنا بأي لعب في العربية ممكن يظهر له مشاكل بعد سنه ولا حاجة.
وعلى فكره أستاذ أمير، مشكلة الحراره دي مش غلطه في تصميم العربية ولا هي نازله لينا عزلها مضروب ولا محتاج شكوى ولا قضية ولا هيتحل من الشركة الأم. الموضوع وما فيه العربية تصميمها كده وبتنزل كده في كل البلاد إللي بتتباع فيها سواء في أوروبا أو أي حته ثانيه، إحنا بالنسب لينا عربية ب ٧٠ أو ٨٠ ألف حاطين فيها دم قلبنا، العربية بالنسبه ليهم عربية منخفظة التكلفة ولا يمكن تلاقي فيها كل شئ ١٠٠٪، ده غير إنها بالنسبة ليهم مصلحة لبرودة الجو، يبقى إجتهادك لتحاول الوصول بيها للمستوى المرضي، ووالله عربيات كتير ممكن تلاقي فيها منغصات زي دي، أنا كنت قريت موضوع لعضو معاه تويوتا ياريس وفيها نفس الكلام وكان بيشرح إزاي يحلها. لو أي عربية في أي فئه سعرية كانت كاملة الأوصاف مكنش حد غلب ولو كده ليه الواحد يشتري بي إم لما ممكن يركب لوجان بنفس العزل مثلا ولا إيه؟ الكواليتي درجات والحمد لله إننا ممكن نزود درجة الكواليتي بشوية شغل بسيط ومش مكلف.
غير كده في المجمل العربية زي الفل وأرجع وأقول ... والله لولا كلام الأعضاء عن السخونية ماكنت خدت بالي غير من سخونية وش التابلوه، وبرضه مكنتش هحط في دماغي، الموضوع ٨٠٪ منه وسواااااااااااس.
معلش طولت، بس حبيت أنقل وجهة نظري وتحليلي للموضوع عشان إللي كتر الكلام في الحكاية دي قلبله دماغة زيي، يحاول ياخد رست ويبص لثلاث أرباع الكوب الممتلئ (وأكتر) :copy of m-s5: