مشكلة في الموتور وال ار بي ام

السلام عليكم...
كل يوم بدور العربية بالمفتاح فقط من غير رجلي متكون على دواسة البنزين...

النهاردة تاني مرة يحصل معايا الآتي:

1. دورت المفتاح في الكونتاكت لقيت ال rpm ناطت لحد ال 2000 تقريبا
2. صوت الموتور كان عالي كاني دايس بنزين وانا رجلي بعيد
3. طفيت ودورت تاني نفس المشكلة
4. استنيت اشوف هيحصل ايه لقيت العربية عادي بتسخن و ال rpm بينزل
5. ال rpm وصل تقريبا 6500 او 7000
6. بس ال rpm مش ثابت اوي
7. مشيت بالعربية بس حسيت انها تقيلة شوية ولو شلت رجلي من البنزين بتبطء اكتر من المعتاد نسبيا .

هل في تفسير واعمل ايه احسن انا قلقان اوي
العربية صني 2012 مانيوال عاملة حتى اليوم حوالي 4550 كم.
شكرا

ممكن البنزين الي حطيته مش كويس

لو مش منهم يبقى ده عيب كهربا بس الغريبه ان العربيه جديده ؟؟؟

عموما متعملش فيها حاجه خليك ماشي بيها لغاية موعد الصيانه الي جاي

الافضل طبعا الذهاب لاحد مراكز خدمة نيسان وشرح ما حدث بالتفصيل
الموضوع ده كان بيحصل معايا فى عربيتى 2010 احيانا وكان السبب ضفيرة الكهرباء والمشكلة اتحلت بتغييرها فى الضمان

الضفيره

ولو الضفيرة هيرضوا يغيروها؟ ممكن ادور العربية ميظهرش العيب؟؟

تقريبا ثرموستات معلق

يعني ايه يافندم؟
ممكن حضرتك تفسرلي اكتر؟
شكرا

الثرموستات وظيفتة انة يثبت درجة حرارة المحرك عند حرارة تشغيل معينة
وهو بدورة شغلة كلة والعربية باردة لازم يعلى الـ rpm وفعلا بيوصل لـ 2000 او 1500 حتى يصل المحرك لدرجة الحرارة الاعتيادية وبعديها تقل عدد لفات الموتور للعدد الطبيعى وهو 750 لفة/دقيقة فى وضع الثلانسية
الحالة دى امر طبيعى جدا وهو دة الصح .... بس فى ناس بتشيل الثرموستات خالص فميحصلش عندهم كدة
ومن مخاطر الثرموستات انة يعلق فيسخن المحرك لدرجة خطر
------------------------------------------------------------------------------

1. مشيت بالعربية بس حسيت انها تقيلة شوية ولو شلت رجلي من البنزين بتبطء اكتر من المعتاد نسبيا

نقطة ان العربية بتبطء اكثر من المعتاد لما تشيل رجلك من الاكسراتير دى بتخص درجة السلانسية المظبوط عليها المكنة
او ممكن يكون فلتر البنزين مش نظيف ومحتاج تغيير
او ممكن يكون البنزين مش كويس ولو الشك فى البنزين حاول تخلص معظم التنك 95% منة ومون العربية من محطة غير ال مونت منها اخر مرة مع تغير فلتر البنزين



حبيب قلبى انا متابع ان شاء الله معاك
بسيطة مفيش حاجة ان شاء الله

انا رحت اوتوايجيبت النهاردة وكان المهندس متفهم جدا لشكوتي...المهم خدوا العربية حوالي ساعتين وبعدين المهندس قالي العيب في الضفيرة ولازم تتغير.....بس القطعة بتيجي من مصنع نيسان نفسه من اسبوعين الى تلات اسابيع...قالي احنا ظبطنا العربية اقصى استطاعة ....قلتله ان شاء الله نركب الضفيرة بعد رمضان علطول مع صيانة ال 5000 كم ...قالي كمان الضفيرة محتاجة من 4 الى 5 ساعات شغل في العربية؟؟
هو التوكيل كده هيدفعني حاجة من تمن الضفيرة؟؟؟؟؟؟؟؟؟
سألتوا من باب الفضول الضفيرة بكام قالي من 4500 الى 5000 جم
شكرا للسادة الأفاضل اللي ساعدوني بأرائهم

طيب لية مسألتوهوش في وقتها ؟ عموما ممكن تتصل تسألهم..

متابع ان شاء الله..

لا اطمن الضفيرة بتتغير فى الضمان وانا وكتير من الاعضاء غيرناها فى اتوايجيبت او السبع او غيرهم كمان بس انا مثلا حظى انها كانت موجودة فى السبع وقت صيانتى لل40.000 كم وكده كده ما اتأخرتش عن وقت الصيانة العادية اللى بتاخد وقت كبير

فعلا زى ما قالك دكتور يوسف اطمن
الضفيرة بتتغير فى الضمان
وان شاء الله تتغير وكل المشاكل تتحل

بس مش تنسى تتطمنا عليك

متشكر جدا جدا...
انشاء الله هكتب اللي حصل يوم الصيانة عشان الناس تستفيد من اي معلومة.

منتظرين التقرير ان شاء الله و الضفيرة في الضمان و لا تدفع اي شيئ .